ادامزات ۋكراينا ءۇشىن الاڭداۋلى

نۇر-سۇلتان.قازاقپارات - بۇگىندە الەم جۇرتى ۋكرايناداعى احۋالدى باقىلاپ، جاعدايعا الاڭداپ وتىر. باتىس ەلدەرى رەسەيدى سانكتسيامەن تۇساپ، ەكونوميكاسىن تىعىرىققا تىرەۋگە تىرىسقانىمەن، سوعىس ءورتىنىڭ باسىلار ءتۇرى جوق.

بىرىككەن ۇلتتار ۇيىمى وتكەن بەيسەنبىدە باستالعان شابۋىلدىڭ سالدارىنان ۋكراينادا كەم دەگەندە 136 بەيبىت تۇرعىن، ونىڭ ىشىندە 13 بالا قازا تاپقانىن مالىمدەدى. ب ۇ ۇ- نىڭ ادام قۇقىقتارى جونىندەگى جوعارعى كوميسسارىنىڭ وكىلى ليز تروسسەلل زارداپ شەككەندەردىڭ ناقتى سانى الدەقايدا كوپ بولۋى مۇمكىن دەيدى. سونىمەن قاتار ب ۇ ۇ شابۋىلداردان زارداپ شەككەندەر سانى 400 گە جۋىق دەگەن دەرەك ايتتى.

رەسەي اسكەرى ۋكرايناعا سولتۇستىك، وڭتۇستىك جانە شىعىس باعىتتان شابۋىلداعان. ەلدىڭ سولتۇستىك- شىعىسىندا ورنالاسقان حاركوۆ قالاسىندا ۇرىس بىرنەشە كۇننەن بەرى ءجۇرىپ جاتىر. رەسەيدىڭ قارۋلى كۇشتەرى ۋكراينانىڭ وڭتۇستىگىندە شابۋىلىن كۇشەيتكەنگە ۇقسايدى. رەسەيدىڭ قورعانىس مينيسترلىگى وڭتۇستىكتەگى حەرسون قالاسىن باسىپ العانىن مالىمدەدى. ۋكراينا استاناسى كيەۆ تە - باسقىنشىلار كوزدەگەن نىسانداردىڭ ءبىرى.

بىرىككەن ۇلتتار ۇيىمى ۋكراينادان 700 مىڭعا جۋىق ادام شەكارا اسقانىن ايتادى. ەۋروپادا بوسقىندار ماسەلەسى تاعى دا كوتەرىلدى. كورشىلەس ەلدەر ولاردى ءتيىستى ورىندارعا جايعاستىرىپ، كۇندەلىكتى قاجەت زاتتارمەن قامتاماسىز ەتىپ وتىر. ال ەلدە قالعان ازاماتتار قارۋ الىپ، وتان قورعاۋشىلار قاتارىنا قوسىلدى.

ۋكراينا جەرىندە بولىپ جاتقان سوعىس رەسەي ەكونوميكاسىنا عانا ەمەس، الەم ەلدەرىنە دە كەرى اسەر ەتەتىنى ايتىلىپ كەلەدى. ماسەلەن، ۇلى بريتانيادا سارسەنبىدە گاز بەن شيكى مۇنايدىڭ قۇنى كۇرت ءوستى، بۇل ەل نارىعىنداعى باعانىڭ ودان ءارى وسۋىنە الىپ كەلىپ، تۇرعىنداردىڭ ەلەكتر ەنەرگياسىنا تولەمىن ارتتىرۋى مۇمكىن.

سونداي- اق رەسەيدىڭ مەملەكەتتىك بۇقارالىق اقپارات قۇرالدارىنىڭ جاريالانىمدارى ءبىرقاتارى ەۋروپا ايماعىندا تاراتىلمايتىن بولدى. بۇعان قوسا الەۋمەتتىك جەلىلەردە دە جالعان اقپاراتپەن كۇرەسۋ ماقساتىندا رەسەيلىك باسىلىمداردىڭ اككاۋنتى بۇعاتتالىپ جاتىر.

ۋكراينا ايماعىنداعى باسقىنشىلىقتى توقتاتىپ، ەكى جاقتى كەلىسىمگە شاقىرعاندار قاتارى كوبەيىپ وتىر. قىتاي اتىستى توقتاتۋ ءۇشىن بەلگىلى ءبىر قادامعا بارۋعا دايىن ەكەنىن ايتتى. قىتايدىڭ سىرتقى ىستەر ءمينيسترى ۋاڭ ي ۋكراينالىق ارىپتەسى دميتري كۋلەبامەن تەلەفون ارقىلى سويلەسكەننەن كەيىنگى حابارلاماسىندا «بەيجىڭ بەيبىت تۇرعىنداردىڭ زارداپ شەگۋىنە اسا الاڭداۋلى» ەكەنىن جەتكىزگەن.

بىرنەشە كۇن بۇرىن رەسەي مەن ۋكراينا وكىلدەرى بەلارۋس جەرىندە العاشقى كەلىسسوزگە جينالعانى بەلگىلى. ناتيجەسىندە، ولار 5 ساعات بويى وزەكتى ماسەلەلەردى تالقىلاپ، ەل استانالارىنا ءوزارا كەلىسۋگە اتتانعان. رەسەي دەلەگاتسياسى كەلىسسوزدىڭ ەكىنشى راۋندىن جالعاستىرۋعا دايىن ەكەنىن جانە سارسەنبى كۇنى كەشكە ۋكراينا تاراپىن كۇتەتىنىن مالىمدەدى. رەسەي پرەزيدەنتىنىڭ باسپا ءسوز حاتشىسى دميتري پەسكوۆ كەزدەسۋدىڭ قالاي اياقتالاتىنىنا قاتىستى بولجام جاسامادى. ۋكراينا پرەزيدەنتىنىڭ كەڭەسشىسى ولەكسىي ارەستوۆيچ باسپا ءسوز ءماسليحاتىندا بەلارۋستەگى كەلىسسوزدەرگە الدىڭعى راۋندتاعى دەلەگاتسيا مۇشەلەرى قاتىساتىنىن ايتتى.

رەسەيدىڭ ارەكەتىن ايىپتاعان باتىس ەلدەرى ۋكرايناعا قولداۋ ءبىلدىرىپ، سانكتسيالاردى كۇشەيتە بەرەتىنىن اشىق بىلدىرۋدە. دەگەنمەن شابۋىلدى توقتاتۋ ماسەلەسى ازىرگە شەشىمىن تابار ەمەس.

مەرۋەرت بۇركىتبايەۆا

egemen.kz