فۋتبول: قازاقستان سۋپەركۋبوگىن كىم يەلەندى

نۇر-سۇلتان. قازاقپارات - قوستانايدىڭ «توبىل» كومانداسى بيىل فۋتبولدان قازاقستان سۋپەركۋبوگىنىڭ يەگەرى اتاندى، دەپ حابارلايدى قازاقپارات ءتىلشىسى.

سۋپەركۋبوكتى وتكەن ماۋسىمنىڭ چەمپيونى - قوستانايلىق «توبىل» مەن كۋبوك يەگەرى - الماتىلىق «قايرات» ساراپقا سالدى.

كەزدەسۋ بارىسىندا قوس كوماندا العا قاراي ۇمتىلدى. وسىنداي ءساتتىڭ بىرىندە الماتىلىق كوماندا قورعاۋشىلارى وزدەرىنىڭ ايىپ الاڭىندا قارسىلاستى شالىپ شىقتى.

باس تورەشى دانيار ساحي ون ءبىر مەترلىك نۇكتەنى كورسەتتى. قوستانايلىق سەرىكجان مۋجيكوۆ پەنالتيدەن ءمۇلت كەتكەن جوق.

ءبىرىنشى كەزەڭنىڭ سوڭىنا تامان الماتىلىق كلۋبتان ج و ا و پاولونىڭ الىستان تەپكەن دوبى قاقپا تورىندا تۋلاپ جاتتى.

ەكىنشى كەزەڭدە ەكى كوماندا تاعى ءبىر گول سوعۋ مۇمكىندىگىن ىزدەدى. 62-مينۋتتا «توبىل» قاقپاسىنا بەلگىلەنگەن پەنالتيدى «قايرات» فۋتبولشىسى ريكاردۋ الۆەش نىساناعا تۋرا باعىتتاي العان جوق.

ەسەسىنە 83-مينۋتتا قوستانايلىق فۋتبولشى ايبار جاقسىلىقوۆ جەڭىس گولىن سوعىپ كەتتى.

وسىلايشا «توبىل» قارسىلاسىنان 2:1 ەسەبىمەن باسىم ءتۇستى. قوستانايلىق كلۋب ەكىنشى جىل قاتارىنان سۋپەركۋبوك يەگەرى اتاندى.

ەسكە سالساق، بيىل ەل بىرىنشىلىگى 5- ناۋرىزدا جالاۋىن كوتەرەدى. العاشقى تۋردا 5- ناۋرىزدا «كاسپي» (اقتاۋ) مەن « قىزىلجار»، «تۇران» (تۇركىستان) مەن «تاراز»، «اتىراۋ» مەن «اقسۋ» (پاۆلودار وبلىسى)، «استانا» (نۇر-سۇلتان) مەن «شاحتەر» (قاراعاندى)، «ورداباسى» (شىمكەنت) مەن «ماقتاارال» (تۇركىستان وبلىسى) كوماندالارى كەزدەسەدى.