اۋىل جاستارىنا ارنالعان «ورلەۋ» اتتى جاڭا پارتيالىق جوبا ۇسىنىلدى

نۇر-سۇلتان. قازاقپارات - اۋىل جاستارىنا ارنالعان «ورلەۋ» اتتى جاڭا پارتيالىق جوباسى ۇسىنىلادى.

بۇل تۋرالى «Nur Otan» پارتياسىنىڭ كەزەكتەن تىس سەزىندە پارتيانىڭ اتقارۋشى حاتشىسى اسحات ورالوۆ ءمالىم ەتتى، دەپ حابارلايدى قازاقپارات.

«Jas Otan» جاستار قاناتىنىڭ جۇمىسىن تولىقتاي قايتا جاڭعىرتۋ اسا ماڭىزدى. «Jas Otan» قاتارىنا جاستار اراسىندا شىن بەدەلى بار ناعىز كوشباسشىلاردى تارتامىز. اۋىل جاستارىنا ارنالعان «ورلەۋ» اتتى جاڭا پارتيالىق جوباسىن ۇسىنامىز»، - دەدى ا. ورالوۆ.

ونىڭ اياسىندا ەلىمىزدىڭ تۇكپىر- تۇكپىرىندەگى جاستاردىڭ تۇلعالىق دامۋىنا، شىعارماشىلىق قابىلەتتەرىن شىڭداۋعا ارنالعان، ولاردى كاسىپ اشىپ، تابىستى بولۋعا ىنتالاندىراتىن كەشەندى شارالار جۇزەگە اسىرىلادى.

«بۇدان بولەك، جاس ۇرپاقتى وتانسۇيگىشتىككە باۋليتىن «قايسار» اتتى جاڭا اسكەري-پاتريوتتىق جوبا ىسكە قوسىلادى. ەل قورعايتىن، مەملەكەتىمىزگە قىزمەت ەتەتىن ەرجۇرەك ازاماتتاردى تاربيەلەۋگە باسىمدىق بەرىلەدى»، - دەدى پارتيانىڭ اتقارۋشى حاتشىسى.