حالىق ءارتىسى كۇلاش بايسەيىتوۆا قازا بولعاندا ونىڭ التىن بۇيىمدارىن توناپ كەتكەن كىم؟
بۇل تۋرالى kazakh-tv حابارلايدى.
قازاق ەلىنىڭ بۇلبۇل ءانشىسى، ماڭدايىنا بىتكەن جارىق جۇلدىزى ماسكەۋدەگى قوناق ءۇي بولمەسىندە جۇرەگى توقتاپ قالىپ، ماڭگىلىك ساپارعا اتتانىپ كەتە باردى...
ءانشىنىڭ ونسىزدا قان قىسىمى ءاردايىم بىردە تومەندەپ، بىردە باسى اۋىرىپ، دەنساۋلىعى سىر بەرىپ جۇرەتىن. وعان دا كوپتەگەن سەبەپتەر بولدى. ءبىر جاعىنان نەبارى 22 جاسىندا قازاقستاننىڭ حالىق ءارتىسى، ال 24 جاسىندا ك س ر و حالىق ءارتىسى دارەجەسىن العان ءانشى رەتىندە وزگە ونەر يەلەرىنىڭ سەبەپسىز جالا جاۋىپ، قىزعانىشىنا سەبەپ بولسا، ەكىنشى جاعىنان كۇيەۋىنىڭ وپاسىزدىعى ءانشىنىڭ ۋايىمىن ودان سايىن ۇدەتتى. ال ءبىر ەمەس، ەكى بالاسىنىڭ قايعىلى ءولىمى ءانشىنى ەسەڭگىرەتىپ جىبەرگەن ەدى.
وسىلايشا، كۇلاشتىڭ ومىرىندە قيىندىق پەن اجال بىرىنەن سوڭ ءبىرى بولا بەردى. ايەل ادامنىڭ ءوزى تابيعاتىنان نازىك جاراتىلىس قوي. ەتتەن جاراتىلعان جۇرەك بۇل اۋىرلىقتىڭ جۇگىن بىردەي كوتەرە الماعان بولار. ءومىرى تىم كەلتە بولدى. نەبارى 45 جىل عۇمىر سۇرسە دە، ودان ۇزاق جاساعان ادامداردىڭ جاساماعانىن جاسادى. دارىن يەسىنىڭ جۇلدىزى تەز جانىپ، تەز ءسوندى. ءبىراق، ونەرى مەن ءومىرى - قۇپيا مەن سىرعا تولى.
قارلىعاش بايسەيىتوۆا، كۇلاشتىڭ قىزى:
«الىستان ەسەپسىز ادامنىڭ قاراسى كورىندى. بارلىعى ءبىزدىڭ ۇيگە قاراي قادامداپ كەلە جاتتى... انامنىڭ ەڭ جاقىن دوستارى، جانىندا كوپ جىل بىرگە جۇرگەن مۇحتار اۋەزوۆ، عابيت مۇسىرەپوۆ، ەۆگەني برۋسيلوۆسكي باستاعان ءبىر توپ ادام قايعىلى حاباردى ەستىرتۋ ءۇشىن كەلگەن ەكەن. ونى ەستىپ بارشامىز قايعىردىق. اسىرەسە، ناعاشى اجەم مەن اكەمە اۋىر ءتيدى.»
قارالى ءۇي قايعىرۋدان باس الماي جاتسا، بەلگىسىز بىرەۋ كۇلاشتىڭ ماڭداي تەرىمەن تاپقان التىن ساعاتىن، قىمبات اشەكەي- بۇيىمدارىن، قىزدارىنا تاپسىرىسپەن ەسىمدەرى جازىلعان التىن جۇزىكتەرىمەن قوسا دىمىن قالدىرماي توناعان.
بۇل جاعداي ءانشىنىڭ جەتىسى نە قىرقىن بەرىپ جاتقاندا ورىن الۋى مۇمكىن. تۋعان- تۋىستارى، ارىپتەستەرى، ونەردەگى دوستارى، اۋىلداستارى، كورشىلەرىن قوسقاندا كۇلاشتىڭ ولىمىنە جينالعان قاۋىمنىڭ قايسىبىرىنەن كورەسىڭ؟ ءىزىن ءىز-ءتۇسسىز جوعالتقان ۇرىنى ەشكىم ىزدەگەن دە جوق. ىزدەۋگە مۇرشا دا بولعان جوق...
