قولداعى تەڭگەنىڭ ءبارىن دوللارعا ايىرباستاۋ كەرەك پە - ساراپشى كەڭەسى

الماتى. قازاقپارات - قارجى ساراپشىسى اندرەي چەبوتاريەۆ رۋبلمەن بىرگە السىرەپ جاتقان ءتول ۆاليۋتانىڭ ەرتەڭگى تاعدىرى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«تەڭگە قۇلدىراپ جاتىر، ويتكەنى ءبىزدىڭ ەكونوميكا رەسەي ەكونوميكاسىمەن بايلانىستى. بىزدەگى بۇكىل يمپورتتىڭ %40 ى، ياعني قازاقستان ساتىپ الاتىن ءاربىر ەكىنشى تاۋار بىزگە رەسەي فەدەراتسياسىنان كەلەدى. ءبىز بۇل تاۋارلاردىڭ كوبىن رۋبلگە ساتىپ الامىز. ترانزاكسيانىڭ %60 دان استامى رۋبلمەن جۇرەدى. بۇل ءبىزدىڭ ەكونوميكامىزدى رۋبل باعامىنا تاۋەلدى ەتەدى. سوندىقتان ءتول ۆاليۋتامىز رەسەيلىك ۆاليۋتامەن بىرگە قۇنسىزدانىپ جاتىر. بۇل - ءبىرىنشى فاكتور. ەكىنشى فاكتور - ۆاليۋتا نارىعىنداعى بايبالام. جاسىراتىنى جوق، بىزدە قانداي دا ءبىر دۇربەلەڭ تۋىنداعان جاعدايدا شوتتاعى اقشانىڭ ءبارىن شەشىپ الىپ، ءتىپتى جاقىندارىنان قارىز الىپ دوللارعا ايىرباستاي كەتەتىندەر كوپ. ءوزىمىزدىڭ ۇلتتىق ۆاليۋتاعا دەگەن سەنىمنىڭ تومەندىگى ونىڭ باعامىنا نۇقسان كەلتىرەدى. سۇرانىس ۇسىنىسقا قىسىم جاسايدى»، - دەيدى اندرەي چەبوتاريەۆ.

سپيكەر سونداي-اق تەڭگە باعامى ءارى قاراي قالاي قۇبىلاتىنىن ايتتى.

«بۇل اسكەري قاقتىعىس قالاي وربيتىنىنە بايلانىستى. قازىر ءبارى ساعات سايىن وزگەرىپ تۇر. بەيسەنبىدە ەنگىزىلگەن سانكسيالار وتە جەڭىل بولىپ كورىنگەن، ال دەمالىس كۇندەرى ونىڭ سوڭى الەمدە بۇرىن-سوڭدى بولماعان سانكسيالارعا ۇلاستى. سوندىقتان بۇل جەردە بىزگە ەشتەڭە بايلانىستى ەمەس»، - دەدى ول.

اندرەي چەبوتاريەۆتىڭ ويىنشا، قازىرگى باعامەن شەتەلدىك ۆاليۋتانى ساتىپ الۋ ءتيىمسىز.

«قازىر دوللار ساتىپ الۋ كەرەك پە؟ ونى اركىم ءوزى شەشۋى كەرەك. ءبىراق مەن قارىزعا العان اقشامەن ۆاليۋتا ساتىپ الماۋعا كەڭەس بەرەمىن. ياعني نارىقتى الداۋ ءۇشىن نەسيە الۋدىڭ رەتى جوق. %99 جاعدايدا موينىڭىزدا قارىز قالادى. ەگەر بۇگىن ساتىپ العىڭىز كەلسە، بيرجانىڭ اشىلۋىن، ياعني، 15:00-گە دەيىن كۇتۋگە كەڭەس بەرەمىن. سول كەزدە رەسمي ايىرباستاۋ باعامى بەكىتىلەدى. قازىر ءسىز بانكتىك قوسىمشالار مەن الماستىرعىشتاردان كورىپ وتىرعانىڭىز - الىپساتارلىق كۋرس قانا. ول ەشقانداي ناقتى ەرەجەلەرگە سايكەس كەلمەيدى»، - دەپ جاۋاپ بەردى ساراپشى.