رەسمي وكىل قازاقستاندىقتاردى ۋكراينادان ەۆاكۋاتسيالاۋ تۋرالى پىكىر ءبىلدىردى

«سوڭعى بىرنەشە كۇن بويى الەمنىڭ نازارى ۋكراينادا. ءبىزدىڭ كيەۆتەگى ەلشىلىكتىڭ قىزمەتكەرلەرى كۇنى- ءتۇنى جۇمىس ىستەۋدە. قازاقستاننىڭ ازاماتتارىنا كومەك كورسەتىپ قانا قويماي، ورنالاسقان ەلدەرىندەگى جاعداي جونىندە وزەكتى اقپاراتتى دا جىبەرىپ تۇرادى. شۇعىل اقپارات الماسۋ، تۋىنداعان ماسەلەلەردى جەدەل شەشۋ ماقساتىندا ارينە بەلگىلى ءبىر مەسسەندجەردە جۇمىس چاتىن اشتىق. سول چاتتا بىرگە قۋانىپ، بىرگە كۇرسىنىپ جاتامىز. ۋكرايناداعى ارىپتەستەرىمىزگە سۇراقتاردى جاۋدىرىپ، سول تۇرعان جەرىندە جاۋاپ بەر دەپ جازاتىنىمىز دا بار. كەشە عانا ب ا ق- قا ارنالعان بريفينگتە ايتىپ وتكەنىمدەي، ق ر ازاماتتارى بار بىرنەشە اۆتوبۋس شەكاراعا قاراي جولدا كولىك كەپتەلىسىندە تۇردى. ولاردىڭ جارتىسى شەكارادان ءوتىپ، امان- ەسەن پولشانىڭ اۋماعىندا ازاماتتارىمىزدىڭ ەكىنشى توبى كەلگەنشە قوناق ۇيگە ورنالاستىردى. ايتايىن دەگەنىم، ءبىرىنشى توپپەن ىلەسىپ كەلە جاتقان ديپلوماتتاردىڭ ءبىرى قىز بالا. جاعداي شيەلەنىسكەن العاشقى كۇننەن باستاپ 24 ساعات ۇيقى مەن دەمالىستى كورمەي قىزمەتىن ادال اتقارىپ كەلەدى. قاشان تەلەفونمەن قوڭىراۋ شالساڭ دا، بىردەن جاۋاپ بەرىپ، تولىق وزەكتى اقپارات بەرەدى. داۋسىنان بايقالىپ تۇرادى قوبالجىعانى، ءبىراق بىلدىرمەيدى. تەك پولشاعا كەلگەندە كوڭىلى بوساپ، كىشكەنە ەموتسياعا بەرىلدى. الايدا ديپلوماتتارعا ونداي مىنەز كەرەك ەمەس، سوندىقتان جارتى ساعاتتان كەيىن «كەشىرىم سۇرايمىن، قايتادان قاتاردامىن، تاپسىرما بار ما» دەپ چاتقا جازدى. لەيلا حانىم، قازاق ديپلوماتياسىنىڭ بەتكە ۇستار وكىلى دەپ تانيمىن ءسىزدى. تاعى كىشكەنە ۋاقىتتان كەيىن ەلدە قاۋىشامىز دەگەن سەنىمدەمىن. قىز بالا بولعاندىقتان رەپاترياتسيالىق رەيسپەن ەلگە قايتارىپ جاتىرمىز. مەن بىلەتىن لەيلا بولسا قازاقستانعا كەلىپ دەمالىپ جاتپاي، سىرتقى ىستەر مينيسترلىگىنە كەلىپ، ۋكرايناداعى جاعدايعا بايلانىستى قۇرىلعان جۇمىس توبىنىڭ جۇمىسىنا كىرىسىپ كەتەتىنى انىق» ، - دەپ جازدى رەسمي وكىل.