اۋە قورعانىسى كۇشتەرىنىڭ ماماندارى بىلىكتىلىكتەرىن شىڭداۋدا

بۇل تۋرالى قازاقپارات قورعانىس مينيسترلىگىنە سىلتەمە جاساپ حابارلايدى.
ۇشۋدى باسقارۋ توبى دەگەنىمىز - ەكيپاجداردىڭ ۇشۋ تاپسىرمالارىن تولىق، ۋاقىتىلى جانە قاۋىپسىز ورىنداۋىن قامتاماسىز ەتۋ ءۇشىن جەردەن باسقارۋدى جۇرگىزەتىن ارنايى دايارلانعان وفيتسەرلەر ساناتى. ماماندار اۋەدەگى جانە ۇشۋ كەزىندەگى تۋىنداعان كەيبىر كۇردەلى جاعدايلاردا ەكيپاجدارعا بىلىكتى كومەك كورسەتۋدەگى بىلىمدەرىن جەتىلدىرەدى. ولار ءتۇرلى ۇشۋ كەزەڭدەرىندە ەكيپاجدار مەن اۆياتسيالىق بولىمشەلەردى تىكەلەي باسقارۋ بارىسىندا شەشىمدەر قابىلداۋ الگوريتمدەرىن ءىس جۇزىندە پىسىقتايدى. پراكتيكالىق داعدىلاردى بەكىتۋ ءۇشىن «ۆيرتۋالدى اۋەايلاق» جاتتىعۋ كەشەنى جانە ل-39 ۇشاعىنىڭ جانە مي-8 م ت تىكۇشاعىنىڭ ۇدەتكىشتەرى پايدالانىلادى. بۇل وقۋ قۇرىلعىلارى كۋرستىڭ وقۋ باعدارلاماسىن مەڭگەرۋدىڭ تيىمدىلىگىن ەداۋىر ارتتىرادى.
«ۇشۋدى باسقارۋ - كۇردەلى جانە جاۋاپتى ۇدەرىس. بۇل كوپ جاعدايدا جاۋىنگەرلىك ازىرلىكتىڭ جاي- كۇيىنە، جەكە قۇرامنىڭ اۋەدەگى ماشىقتانۋ دەڭگەيىنە، ۇشۋ دايارلىعىنىڭ قاۋىپسىزدىگى جانە اۆياتسيالىق تەحنيكانى اپاتسىز پايدالانۋعا بايلانىستى بولادى. جىلدا وتەتىن كۋرستار العان ءبىلىمىمىزدى بەكىتۋگە جانە وسى سالاداعى جاڭا ازىرلەمەلەرمەن تانىسۋعا مۇمكىندىك بەرەدى»، - دەپ اتاپ ءوتتى قىزىلوردا اۆياتسيالىق كومەنداتۋراسىنىڭ باستىعى پودپولكوۆنيك عاني نارىكبايەۆ.
جىل سايىنعى وقىتۋ اۆياتسيالىق تەحنيكانى پايدالانۋ قاۋىپسىزدىگىنىڭ دەڭگەيىن ارتتىرۋ، تەوريالىق ءبىلىمدى تەرەڭدەتۋ جانە مامانداردىڭ كاسىبي داعدىلارىن جەتىلدىرۋ ماقساتىندا جۇرگىزىلەدى. بيىلعى جىلى اۋە قورعانىسى كۇشتەرىنىڭ قۇرىلىمدىق بولىمشەلەرىنەن 24 اسكەري قىزمەتشى وقيدى. ساباقتىڭ جالپى كولەمى 99 ساعاتتى قۇرايدى. وقۋ سوڭىندا تىڭداۋشىلار كەشەندى ەمتيحان تاپسىرىپ، وقۋ باعدارلاماسىن مەڭگەرگەنى تۋرالى كۋالىك الادى.