ۋكرايناداعى قازاقستاندىقتار پولشا ارقىلى ەلگە جەتكىزىلمەك

نۇر- سۇلتان. قازاقپارات - قازاقستان ۋكرايناداعى ازاماتتارىن رەپاترياتسيا رەيسى ارقىلى ەلگە جەتكىزبەك. بۇل تۋرالى قازاقپارات قازاقستاننىڭ ۋكرايناداعى ەلشىلىگىنە سىلتەمە جاساپ حابارلايدى.

«2022 -جىلدىڭ 25-26-اقپانىندا «Air Astana» اۋە كومپانياسى قازاقستاننىڭ ازاماتتارى ءۇشىن رەپاترياتسيا رەيسىن جۇزەگە اسىرۋ جوسپارلانۋدا. اتالعان رەيس كاتوۆيتسە قالاسىنان (پولشا) جۇزەگە اسىرىلادى. قازاقستان ازاماتتارى ءۇشىن ۋكراينا- پولشا شەكاراسىنان اۋەجايعا دەيىن ۆيزاسىز «جاسىل ءدالىز» قامتاماسىز ەتىلەدى. ازاماتتاردان مۇمكىندىگىنشە ەرتەڭ لۆوۆ قالاسىنا كەلۋلەرىن سۇرايمىز، قابىلداۋ پۋنكتى - زامكنەنا كوشەسى، 3/1 مەكەنجايى بويىنشا قازاقستان رەسپۋبليكاسىنىڭ قۇرمەتتى كونسۋلدىعى، تەل. 380322403670، 380679892819»، - دەلىنگەن حابارلامادا.

قوسىمشا اقپارات الۋ ءۇشىن «Air Astana» وكىلدەرىنە كەلەسى تەلەفوندار ارقىلى حابارلاسۋعا بولادى: 380500511117، 380509815449. ەسكە سالا كەتەيىك، بۇگىن رەسەي پرەزيدەنتى ۆلاديمير پۋتين ۋكراينا اۋماعىندا ارنايى اسكەري وپەراتسيا جۇرگىزۋ تۋرالى شەشىم قابىلداعانىن ايتتى.

وسىعان بايلانىستى ۋكراينا پرەزيدەنتى ۆلاديمير زەلەنسكي ەل حالقىنا ۇندەۋ جاريالاپ، ۋكراينا اۋماعىندا اسكەري جاعداي رەجيمى ەنگىزىلگەنىن مالىمدەدى.

ايتا كەتەيىك، قازاقستان ۋكراينادان ەل ازاماتتارىن ەۆاكۋاتسيالاپ جاتىر. ۋكرايناداعى كۇردەلى جاعدايلارعا بايلانىستى قازىرگى ۋاقىتتا سول ەلدەگى ق ر ازاماتتارىنا تۇرعىلىقتى جەرلەرىندە بولۋ جانە ق ر ەلشىلىگىمەن جانە كونسۋلدىقتارىمەن تۇراقتى بايلانىستا بولۋ ۇسىنىلادى.