ۋكراينا استاناسىندا قاربالاس پەن ۇرەي ۇدەي ءتۇستى
قالادا جانار- جاعارماي بەكەتتەرى مەن ساۋدا ورتالىقتارىندا كەزەك كوبەيىپ، شىعا بەرىس جولداردا كەپتەلىس بولدى. كيەۆ تۇرعىندارى بۇگىنگى تاڭدى ۇرەيمەن قارسى الدى. شاھاردىڭ بارلىق تۇسىنان ەستىلگەن اۋە دابىلى شىرت ۇيقىدا جاتقانداردىڭ شىرقىن بۇزدى. جارىلىستاردان قاۋىپتەنگەن تۇرعىندار قاۋىپسىز جەرگە تىعىلۋعا تىرىستى. ءبىرى - مەترونى، ەندى ءبىرى - تۋننەلدەردى پانالادى. شاھاردان باس ساۋعالاعان ادامدار دا كوبەيىپ، جولداردا كەپتەلىس پايدا بولعان.
- مەن اكە- شەشەمە بارماقپىن. ولار ۋكراينانىڭ ورتالىعىندا تۇرادى. سول جەر قاۋىپسىز دەپ ويلايمىن. تاڭسارىدە شابۋىل باستالادى دەپ حابارلانعان سوڭ 4 كە دەيىن كوز ىلمەدىم. سودان بوس ءسوز بولعان شىعار مىزعىپ كەتىپ ەدىم اكە- شەشەم تەلەفون شالىپ سوعىس باستالعانىن ايتتى.
- ارينە ءازىر جاعداي قيىن. ءبىز جەڭىسكە جەتىپ، بۇل قيىن ساتتەر ءالى ارتتا قالار دەپ ۇمىتتەنەمىن. كيەۆ ءمەرى ۆيتالي كليچكو شاھار تۇرعىندارىن سابىرلىققا شاقىردى. قالا باسشىسى شاھارعا كىرەبەرىس جولداردا قورعانىس بەكەتتەرى قويىلىپ، ءبىراز قيىندىقتار تۋىنداۋى مۇمكىن ەكەنىن ەسكەرتتى.
ۆيتالي كليچكو، كيەۆ قالاسىنىڭ ءمەرى:
- بۇگىن ۋكراينا عانا ەمەس ەۋروپا مەن الەم ءۇشىن دە قايعىلى كۇن. ۋكراينا قارۋلى كۇشتەرى ءبىزدىڭ جەرىمىزدى ەرلىكپەن قورعاپ جاتىر. ءبىز قالادا بارلىق ينفراقۇرىلىمنىڭ قالىپتى جۇمىس ىستەۋى ءۇشىن بار كۇشىمىزدى سالامىز. شاھارىمىزدى قورعاۋ ءۇشىن بارلىق شارالاردى قولعا الامىز. ءبىز جاۋعا تەك سابىرلىقپەن بىرلەسىپ قارسى تۇرا الامىز.
ۋكرايناداعى ەكىنشى الىپ شاھار حاركوۆتا دا جاعداي كۇردەلى. ادامدار ۇرەيگە بوي الدىرىپ، دۇكەندەردەن تۇرمىسقا قاجەتتى زاتتاردى جاپپاي ساتىپ الا باستاعان. كەي تۇرعىندار شاھاردى تاستاپ كەتۋگە تالپىنىپ جاتىر.
قالا تۇرعىنى:
- بۇل سۇمدىق. قازىرگى جاعدايعا بايلانىستى باسقا نە ايتۋعا بولادى. بالالاردى الىپ قاۋىپسىز جەرگە بارماقپىن.
ال لۆوۆقا جاقىن پولشامەن اراداعى شەكارادا ادام قاراسى كوپ. مۇندا كولىكپەن بىرگە جاياۋ جەتكەن تۇرعىندار دا جەتەرلىك. سوعىستان باس ساۋعالاعانداردىڭ اراسىنان وزگە ەلدىڭ ازاماتتارىن دا كەزدەستىرۋگە بولادى.
قالا تۇرعىنى:
- اسىرەسە تۇندە قورقىنىشتى. بارلىعى بومبا، بومبا دەپ ايقايلاپ، ارتىنان ءورت شىعىپ جاتقانىن كوردىك. ءتىپتى شەكارادان الىس ۋكراينانىڭ باتىسى دا اتقىلانىپ جاتىر. ەرتەڭ نە بولارى بەلگىسىز، سوندىقتان شەكارا اسىپ پانالاۋدى شەشتىك.
ستۋدەنت:
- ارينە جابىرقاپ تۇرمىز. ءبارىمىز دە بەيبىتشىلىك پەن تىنىشتىقتى قالايمىز. ەشكىم سوعىسقىسى كەلمەيدى. ادامدار جاپا شەگىپ جاتىر. ءبىز ستۋدەنتتەر، ەلدەن كەتۋدەن باسقا امالىمىز جوق. ورتالىق ەۋروپا ەلدەرى ۋكرايناداعى اسكەري قيمىلداردان باس ساۋعالاعانداردى قابىلداۋعا دايىندالىپ جاتىر. پولشا ءوز شەكاراسى ماڭىندا ورتالىقتار قۇرسا، ۆەنگريا ارنايى ءدالىز اشقان.
www.24.kz
