ۋكراينا رەسەيمەن ديپلوماتيالىق قارىم- قاتىناستى ءۇزدى

كيەۆ. تاسس - قازاقپارات - ۋكراينا رەسەيمەن ديپلوماتيالىق قاتىناستى بۇزۋ جونىندە شەشىم قابىلدادى. بۇل تۋرالى بەيسەنبىدە وتكەن بريفينگتە ۋكراينا پرەزيدەنتى ۆلاديمير زەلەنسكي مالىمدەدى، دەپ حابارلايدى قازاقپارات ت ا س س اگەنتتىگىنە سىلتەمە جاساپ.

22 - اقپاندا زەلەنسكي ۋكراينا سىرتقى ىستەر مينيسترلىگىنەن رەسەيمەن ديپلوماتيالىق قارىم- قاتىناستى ءۇزۋ تۋرالى ءوتىنىش العانىن حابارلادى.

رەسەي پرەزيدەنتى ۆلاديمير پۋتين بەيسەنبى كۇنى تاڭەرتەڭ تەلەديدار ارقىلى سويلەگەن سوزىندە دونباسس رەسپۋبليكالارى باسشىلارىنىڭ ۇندەۋىنە جاۋاپ رەتىندە ارنايى اسكەري وپەراتسيا جۇرگىزۋ تۋرالى شەشىم قابىلداعانىن ايتتى. رەسەي باسشىسى ماسكەۋدىڭ جوسپارىندا ۋكراينا اۋماعىن وككۋپاتسيالاۋ جوق ەكەنىن باسا ايتتى. رەسەي فەدەراتسياسىنىڭ قورعانىس مينيسترلىگى رەسەيلىك اسكەريلەر ۋكراينا قالالارىنا سوققى جاسامايتىنىن، اسكەري ينفراقۇرىلىم جوعارى دالدىكتەگى قۇرالدارمەن شىعارىلاتىنىن حابارلادى. بەيبىت تۇرعىندارعا ەشقانداي قاۋىپ تونبەيدى، دەپ سەندىردى ۆەدومستۆو.

ەسكە سالا كەتەيىك، بۇگىن ۋكراينا پرەزيدەنتى ۆلاديمير زەلەنسكي ەل حالقىنا ۇندەۋ جاريالاپ، ۋكراينا اۋماعىندا اسكەري جاعداي رەجيمى ەنگىزىلگەنىن مالىمدەدى.

زەلەنسكي ءوز ۇندەۋىندە «ۋكراينا قورعانىپ جاتىر جانە ءوز بوستاندىعىن بەرمەيدى. ۋكراينالىقتار ءۇشىن تاۋەلسىزدىك پەن ءوز جەرىندە قالاۋىنا قاراي ءومىر ءسۇرۋ ەڭ جوعارى قۇندىلىق» دەپ ايتتى جانە رەسەيدىڭ شابۋىلىن ەكىنشى دۇنيەجۇزىلىك سوعىس كەزىندەگى فاشيستىك گەرمانيا ارەكەتىمەن سالىستىردى.

ايتا كەتەيىك، قازاقستان ۋكراينادان ەل ازاماتتارىن ەۆاكۋاتسيالاپ جاتىر. ۋكرايناداعى كۇردەلى جاعدايلارعا بايلانىستى قازىرگى ۋاقىتتا سول ەلدەگى ق ر ازاماتتارىنا تۇرعىلىقتى جەرلەرىندە بولۋ جانە ق ر ەلشىلىگىمەن جانە كونسۋلدىقتارىمەن تۇراقتى بايلانىستا بولۋ ۇسىنىلادى.