ءبىزدىڭ ءۇي سونىڭ ىرگەسىندە ەدى
تاعىلىمدى حابار تاماشا ءوربىدى. عيبراتتى كوپ اڭگىمەلەر ايتىلدى. ولەڭ وقىلدى. ادەبيەتتىڭ جاي- كۇيى تالقىلاندى.
ءبىزدى سول حاباردا تولقىتقان، تولعاندىرعان ەرەكشە ءبىر ءان ەدى. ءان دەگەندە، ءجۇرسىن ەرماننىڭ اتاقتى «قاسىمنىڭ ءۇيى» دەگەن ولەڭىنە جازىلعان عاجاپ اۋەن. اۆتورى - سول باعدارلاماعا شايىردىڭ شاشباۋىن كوتەرە كەلگەن اقىن سەرىك قاليەۆ.
«دەگەنى قايدا - باسىلدى قۇيىن؟
اقىلىم جەتپەي، اشيدى ميىم:
ۆينوگرادوۆ كوشەسىندەگى،
قيراتىپ جاتىر قاسىمنىڭ ءۇيىن» ،
دەپ باستالعان عاجاپ تۋىندى ادامدى بىردەن وزىنە باۋراپ اكەتەدى.
ءاندى تىڭداپ وتىرعاندا كەز كەلگەن مىقتى اقىننىڭ باسىنداعى تراگەديا - ول اقيقاتىندا بۇكىل ادامزات باسىنداعى اۋىر تاعدىر ەكەنىن ۇعاسىڭ.. .
«جۇيرىگىم ەدى جىر كوشىندەگى،
باۋىرىن جازىپ ءبىر كوسىلمەدى.
قيراتىپ جاتىر قاسىمنىڭ ءۇيىن.. .
ءبىزدىڭ ءۇي سونىڭ ىرگەسىندە ەدى!»
ويلانىپ قالماسىڭا شارا جوق.. . ءبىراز ۋاقىتقا دەيىن ءۇنسىز قالعىڭ كەلەدى. ءىشىڭدى وي جەيدى. ءوز- ءوزىڭدى سۇحباتقا شاقىراسىڭ.. .
اقىن سوندا داۋىلپاز قاسىم ءۇيىنىڭ ىرگەسىندەگى قاي ءۇيدى ايتتى؟
بالكىم ول ءوزىنىڭ الا قۇيىن اقىن تاعدىرى بۇيىعى عانا كۇن كەشىپ جاتقان كىشكەنە قۇجىراسىن مەڭزەدى.. . بالكىم، ءبارىمىزدىڭ دە بۇل ومىردە تۇراق ەتەتىن، مەكەن قىلاتىن عۇمىر- قوسىمىزدىڭ ءبىر كۇنى قيراي قۇلايتىنىن ايتتى؟
بالكىم، بالكىم.. .
بىزدىڭشە، سول قيراپ جاتقان شايىر شاڭىراعىنىڭ ىرگەسىندە بارلىعىمىزدىڭ ءۇيىمىز تۇر ەدى.
كەيىن.
كەيىن الگى حابار كوپ وتپەي ەلىمىزدە دۇربەلەڭ باستالدى. قايعىلى قاڭتار وقيعاسى ورىن الدى.
كەشە عانا ءيسى قازاققا بايتاق استانا بولعان، ءالى دە رۋحاني ەلوردامىز سانالاتىن ارۋ الماتىمىز وتقا وراندى، وققا ۇشتى. قانشاما جازىقسىز جاندار شاھيد كەشتى.. . ءزاۋلىم عيماراتتار قيرادى، شاھار اياۋسىز تونالدى. شىنىلار شاعىلدى، ەدەندەر وپىرىلدى.
قوعام الاساپىران كۇيگە ءتۇستى. ءبىرى - شىن جان ۇشىردى. تاۋەلسىزدىگىمىزگە شىن مانىندە ءسات سايىن قاۋىپ ءتونىپ كەلە جاتقانىن، ازاتتىعىمىز قىل ۇستىندە تۇرعانىن شىرىلداي ايتتى. ءبىرى - ورتەنگەن ءۇيدىڭ قاسىنا كەلىپ قويىنىڭ باسىن ءۇيىتىپ العىسى كەلدى.
سول قارالى قاڭتار تراگەدياسى كەزىندە ارۋ شاھاردا ورتەنگەن، قيراعان، شاڭىراعى ورتاسىنا تۇسە وپىرىلا قۇلاعان ءار ءۇيدىڭ ىرگەسىندە ءسىز بەن ءبىزدىڭ ءۇيىمىز تۇردى.
ونى ءبىراز ەل سەزدى، ءبىراز ەل قاننەن- قاپەرسىز ءتاتتى ۇيقىلارىندا جاتا بەردى.
ەسەنعالي راۋشانوۆتىڭ «جوق، كۇن تۇتىلعان جوق، مەنىڭ كوڭىلىم تۇتىلدى» دەپ باستالاتىن عاجاپ ولەڭى بار. ءدال سول سياقتى. الماتى ورتەنگەن جوق، ءبىزدىڭ وزەگىمىز ورتەندى. ەگەر ءبىز «ءار قازاق - مەنىڭ جالعىزىم» دەگەن ءسوزدى شىن ءتۇسىنىپ ايتا العان بولساق، وندا ءبىزدىڭ ءۇي سول الماتىنىڭ قيراعان ءار عيماراتىنىڭ ىرگەسىندە، جوقشىلىقتىڭ جاسىل جالىنىنا ورتەنىپ ولگەن بەس بالدىرعاننىڭ جىرتىق لاشىعىنىڭ قاسىندا تۇرۋى كەرەك ەدى.
ميراس اسان
egemen.kz
