وليمپيادا ويىندارى تاريحىندا قازاقستان تۋ ۇستاۋشىلارىنىڭ كيىمى ۇزدىك دەپ تانىلدى

نۇر- سۇلتان. قازاقپارات - بەيجىڭدە قازاقستان كومانداسى تۋ ۇستاۋشىلارىنىڭ كيىمى وليمپيادا ويىندارى تاريحىنداعى ۇزدىك كوستيۋم دەپ تانىلدى.

بۇل تۋرالى بەيجىڭدەگى وليمپيادا ويىندارىنىڭ قورىتىندىسى بويىنشا باسپا ءسوز ءماسليحاتىندا ۇلتتىق وليمپيادا كوميتەتىنىڭ باس حاتشىسى اندرەي كريۋكوۆ ايتتى، دەپ حابارلايدى قازاقپارات ءتىلشىسى.

«تۋ ۇستاۋشىنىڭ كيىمى وليمپيادا ويىندارىنىڭ تاريحىندا ۇزدىك دەپ تانىلدى. ءبىز ونى ءساۋىر ايىنداعى رەسمي ءراسىم كەزىندە وليمپيادا مۋزەيىنە تاپسىرامىز»، - دەدى ا. كريۋكوۆ ورتالىق كوممۋنيكاتسيالار قىزمەتىندە.

وسى ورايدا لوزانناداعى مۋزەي قوناقتارى قازاقستان سپورتشىلارىنىڭ كيىم ۇلگىسىن تاماشالاي الادى. قىسقى اق وليمپيادا ويىندارىنىڭ اشىلۋ سالتاناتىندا قازاقستان كومانداسىنىڭ تۋ ۇستاۋشىلارى، كونكيشى ەكاتەرينا ايدوۆا مەن شورت- ترەكشى ابزال اجىعالييەۆ تاريحي وبرازداعى كيىممەن شىقتى. ولار ساق پاتشايىمى توميريس پەن قازاق باتىرىنىڭ كەيپىندە ەل الدىنا شىقتى. كوماندانىڭ تۋ ۇستاۋشىلارى كيەتىن كيىمدە نەگىزىنەن قازاقتىڭ ۇلتتىق ويۋ- ورنەگى «قوشقار ءمۇيىز» بەينەلەنگەن.

ايتا كەتەلىك، ورنەك ەلەمەنتتەرىن ديزاينەرلەر ءابىلحان قاستەيەۆ اتىنداعى مەملەكەتتىك ونەر مۇراجايىمەن بىرلەسىپ دايىندادى. توكيو-2020 وليمپياداسىندا دا وسىنداي قادام جاسالعان بولاتىن. سونىمەن قاتار، قازاقستان قۇراماسىنىڭ وليمپيادا كيىمى قىتايلىقتاردىڭ نازارىن اۋداردى. بۇدان بۇرىن حابارلانعانداي، حالىقارالىق وليمپيادا كوميتەتى بەيجىڭدەگى قىسقى ويىندارداعى ۇلتتىق قۇرامانىڭ ۇزدىك ءساندى كيىم ۇلگىسى ءتىزىمىن جاريالادى. ۇزدىكتەردىڭ قاتارىنا قازاقستاندىق سپورتشىلاردىڭ كيىم ۇلگىسى كىرگەن.

اۆتور: رۋسلان عابباسوۆ