وليمپيادا قورىتىندىسى: ەلسيار قاناعاتوۆ ەڭ ناشار ناتيجە كورسەتكەن سپورت ءتۇرىن ايتتى

نۇر- سۇلتان. قازاقپارات - سولتۇستىك وڭىرلەردە شاڭعى سپورتىن دامىتۋ ءتيىستى دەڭگەيدە ەمەس. بۇل تۋرالى بەيجىڭدەگى وليمپيادا ويىندارىنىڭ قورىتىندىسى بويىنشا باسپا ءسوز ءماسليحاتىندا ۇلتتىق وليمپيادا كوميتەتى سپورت ديرەكسياسىنىڭ ديرەكتورى ەلسيار قاناعاتوۆ ايتتى، دەپ حابارلايدى قازاقپارات ءتىلشىسى.

«وزدەرىڭىز بىلەسىزدەر، 34 سپورتشى 87 جولدامامەن وسى وليمپياداعا باردى. ارينە، جانكۇيەرلەر بىزدەن مەدال كۇتتى. بەيجىڭ وليمپياداسىندا 29 مەملەكەت ءتيىستى ناتيجەگە قول جەتكىزىپ، مەدال الدى. ۇلتتىق وليمپيادا كوميتەتى 1-دەن 8- ورىنعا دەيىن قورىتىندىلاپ قوياتىن ءوزىنىڭ باعالاۋى بويىنشا ءبىز 30- ورىنعا ابزال اجىعاليەۆتىڭ ناتيجەسىنىڭ ارقاسىندا يە بولدىق. ءبىز ەگەمەندىك العاننان بەرى قىسقى وليمپيادالارعا قاتىسقاندا 8 عانا مەدالگە يە بولىپپىز. ونىڭ تورتەۋىن ءبىر سپورتشى الىپ بەردى. وسى جولى العا باساتىنداي جاعداي بولدى. فريستايل- موگۋلدان يۋليا گالىشيەۆا قاتىستى جانە شورت- ترەكتەن دە ءۇمىتىمىز جاقسى بولدى. الايدا مەدالگە يە بولا المادى»، - دەدى ە. قاناعاتوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، ەلىمىز سپورتشىلارى اراسىندا شورت- ترەكتەن ءبىرشاما ىلگەرىلەۋ بولعانى بايقالدى. «سايىستا ابزال اجىعاليەۆتىڭ ناتيجەسىن كوردىڭىزدەر. ابزال ءوزىنىڭ سوزىندە دە شورت- ترەكتى ءالى دە دامىتۋ كەرەك ەكەنىن ايتتى، ءبىز دە بۇل ءۋاجىن قولدايمىز. كونكي سپورت تۇرىنەن دە بىزدە العا جىلجۋ بار دەپ ايتۋعا بولادى»، - دەدى ۇ و ك سپورت ديرەكسياسىنىڭ ديرەكتورى.

سونىمەن قاتار ول ەڭ ناشار ناتيجە كورسەتكەن سپورت ءتۇرى شاڭعى جارىسىنا قاتىستى ەكەنىن ايتتى. «سوڭعى جىلدارى شاڭعى سپورتىنىڭ ناتيجەسى تومەندەپ كەتتى. بۇل باعىتتا بۇقارالىق سپورتتى دامىتۋ ناشار بولىپ تۇر. سولتۇستىك وڭىرلەردە شاڭعى سپورتىن دامىتۋ ءتيىستى دەڭگەيدە ەمەس. سوندىقتان وسى وليمپيادانىڭ قورىتىندىسى بويىنشا شاڭعى، بياتلوننىڭ ناشار ناتيجەسىنە، جالپى بەيجىڭدەگى ناتيجەمىزگە دۇرىستاپ ساراپتاما جاساپ، دۇرىس جاۋاپتارمەن العا جىلجۋ كەرەك. بۇل تۇرعىدا سپورت تۇرلەرىن بۇقارالىق دامىتۋعا ەكپىن قويۋ قاجەت. اتاپ ايتقاندا، بۇقارالىق سپورتتى دامىتۋعا كوڭىل بولگەن ءجون. اۋىلدى جەرلەرگە دە سپورت كەشەندەرىن سالۋ وزەكتى»، - دەدى ە. قاناعاتوۆ.

بۇدان بۇرىن حابارلانعانداي، وسى سپورت تۇرلەرىنىڭ اراسىندا تەك شورت- ترەكشىلەرىمىز عانا بەيجىڭ وليمپياداسىندا وزدەرىنىڭ ەڭ جوعارى كورسەتكىشىن كورسەتە ءبىلدى. ابزال اجىعاليەۆ 500 مەتر قاشىقتىقتا مەدالعا سىنىق سۇيەم جەتپەي، وليمپيادا ويىندارىن 4- ورىنمەن اياقتادى.

اۆتور: رۋسلان عابباسوۆ