قازاقستاندا ا ە س سالماي-اق، ۋرانعا ەلەكتر ەنەرگياسىن ايىرباستاۋعا بولماي ما - مينيسترلىك جاۋاپ بەردى
ق ر ەنەرگەتيكا مينيسترلىگىنىڭ ماماندارىنا ورتالىق كوممۋنيكاتسيالار قىزمەتىندە وتكەن بريفينگىدە وسىنداي سۇراق قويىلدى، دەپ حابارلايدى قازاقپارات ءتىلشىسى.
ەنەرگەتيكا مينيسترلىگى ەلەكتر ەنەرگەتيكاسىن دامۋ دەپارتامەنتىنىڭ ديرەكتورى ايدوس دارىبايەۆتىڭ سوزىنە قاراعاندا، مۇنداي بارتەرلىك كەلىسىم قازاقستانعا ەلەكتر تاپشىلىعى بولمايدى دەگەن كەپىلدىك بەرە المايدى.
«ءبىز ەلەكتر ەنەرگياسىن يمپورتتايتىن بولساق، تاۋەلدىلىككە تاپ بولامىز. ءبىزدىڭ ۇلتتىق قاۋىپسىزدىگىمىزگە زيانى تيەدى. ءبىز 2035 -جىلعا دەيىنگى ەنەرگەتيكالىق تەڭگەرىم تۇجىرىمداماسىن دايىنداعان كەزدە ءوزىمىزدىڭ ەكونوميكامىزدىڭ قاجەتتىلىگىن تولىق قامتاماسىز ەتۋ ءۇشىن قانشا قۋات كوزىن سالۋ كەرەكتىگىن بەلگىلەدىك. سول مۇمكىندىككە جەتكىزۋ ءۇشىن جۇمىس ىستەيمىز. ويتكەنى ءار ءتۇرلى جاعدايلار بولۋى مۇمكىن. قازاقستان رەسپۋبليكاسى ءوز الدىنا جۇمىس ىستەيتىن ۋاقىت بولسا، ءوزىمىز تۇتىناتىن ەنەرگيانى تولىعىمەن ءوزىمىز ءوندىرۋىمىز كەرەك»، - دەدى مامان.
ال اتوم ەنەرگەتيكاسى جانە ونەركاسىبى دەپارتامەنتىنىڭ ديرەكتورى جاسلان قاسەنوۆتىڭ ايتۋىنشا، ۋران نارىعىنىڭ ءوز ەرەجەلەرى بار.
«رەاكتوردى ورناتىپ بەرەتىن تاراپ پەن تەحنولوگيانى تۇتىنۋشى تاراپ كەلىسسوز كەزىندە وتىندى قايدان الاتىنىن الدىن الا بەكىتىپ الادى. سوندىقتان ءسىز ايتىپ وتىرعان وزبەكستاندا ا ە س سالۋ كەلىسسوزى بويىنشا وتىن ماسەلەسى دە شارتقا ەنىپ قويدى دەپ توپشىلايمىن. ءتىپتى ۋران بەرۋ ارقىلى وزگە ەلدەن اتوم ەنەرگياسىن پايدالاندىق دەگەن كۇننىڭ وزىندە قاۋىپسىزدىك ماسەلەسى بار. ءيا، ءبىز ۋران جەتكىزىپ تۇرۋىمىز مۇمكىن. ءبىراق ەلەكتر قۋاتى بويىنشا ءبارىبىر تاۋەلدى بولامىز. ۋران نارىعى قازاقستانمەن عانا شەكتەلمەيدى. ءقازىر ول بيرجا الاڭدارى ارقىلى ساتىلادى»، - دەدى ايدوس دارىبايەۆ.
اۆتور: ەسىمجان ناقتىباي
