ۆينوكۋروۆ وليمپيادا تاريحىندا قالعان قازاقستاندىققا سىيلىق جاسادى
بەيجىڭ وليمپياداسىندا ءوز ونەرىمەن تاريحتا قالعان اجىعاليەۆ وزىنە سىيلىق جاساعان اتاقتى ۆينوكۋروۆپەن قالاي تانىسقانى تۋرالى Instagram-دا جازدى.
اجعاليەۆتىڭ ايتۋىنشا، ول قازاق ۆەلوسپورتى اڭىزىنىڭ ۇيىندە قوناقتا بولعان.
«بۇل كۇن مەنىڭ ەسىمدە ۇزاق ساقتالادى!
كەشەگى جازبادان ءبىر كۇن وتپەي، بۇگىن تۇستەن كەيىن ماعان بەيتانىس ءنومىر قوڭىراۋ شالدى. ول الەكساندر ۆينوكۋروۆتىڭ ءوزى بولىپ شىقتى. ول مەنىڭ جازبامدى وقىپ، وليمپياداداعى جوعارى ناتيجەممەن قۇتتىقتاۋ ءۇشىن ۇيىنە شاقىردى. مەن ءۇشىن ونىڭ قوڭىراۋى توسىن سىي بولدى. ماعان @vinobike ۆەلوسيپەدىن سىيلايدى دەپ ءتىپتى ويلامادىم!
الەمدىك ۆەلوسپورتتىڭ اڭىزعا اينالعان چەمپيونى جانە ناعىز تۇلعا @alexandrvinokurov-قا العىسىمدى ايتامىن! ءبىزدىڭ سپورتقا جاساپ جاتقان ىستەرىڭىز ءۇشىن جانە ماعان كورسەتكەن قولداۋىڭىز ءۇشىن راقمەت»، - دەپ جازدى سپورتشى.
بەلگىلى ۆەلوشاباندوز اجىعاليەۆكە سىيلاعان ۆەلوسيپەد جاڭا جەڭىستەرگە جەتۋىنە سەپتىگىن تيگىزەتىنىن تىلەپ، جاۋاپ بەردى.
«@abzal_azhgaliyev-پەن جىلى كەزدەسۋ بولدى. بەيجىڭدەگى قىسقى وليمپيادا ويىندارىندا لايىقتى ونەر كورسەتكەنى ءۇشىن بۇكىل سپورت قاۋىمى اتىنان العىس ايتىپ، الەم چەمپيوناتىنا ساتتىلىك تىلەدىم. بۇل @Vinobike ۆەلوسيپەدى ساتتىلىك اكەلىپ، جەڭىسكە جەتۋگە كومەكتەسەدى دەپ سەنەمىن! # teamkz»، - دەدى ۆينوكۋروۆ.
بەيجىڭ وليمپياداسىندا اجىعاليەۆ 500 مەترگە جۇگىرۋدەن ءتورتىنشى ورىن الىپ، مەدالعا ءبىر قادام جاقىندادى. 500 مەترگە شورت-ترەكتەن جەكەلەي سىندا فينالعا شىققان تۇڭعىش قازاقستاندىق سپورتشى رەتىندە تاريحتا قالدى.
