بۇرىنعى قورعانىس ءمينيسترى مۇرات بەكتانوۆ ۇستالدى

نۇر-سۇلتان. قازاقپارات - بۇرىنعى قورعانىس ءمينيسترى مۇرات بەكتانوۆ ۇستالدى جانە ۋاقىتشا ۇستاۋ يزولياتورىنا قامالدى، دەپ حابارلايدى قازاقپارات.

«2022 -جىلعى 19-اقپاندا باس پروكۋراتۋرا بۇرىنعى قورعانىس ءمينيسترى مۇرات كارىباي ۇلى بەكتانوۆقا قاتىستى قازاقستان رەسپۋبليكاسى قىلمىستىق كودەكسىنىڭ 452-بابى ارەكەتسىزدىك فاكتىسى بويىنشا سوتقا دەيىنگى تەرگەپ-تەكسەرۋدى باستادى»، - دەپ جازىلعان ق ر باس پروكۋراتۋراسىنىڭ حابارلاماسىندا.

باس پروكۋراتۋرانىڭ مالىمەتىنشە، 2022 -جىلعى 20-اقپاندا م. ك. بەكتانوۆ وسى قىلمىستى جاسادى دەگەن كۇدىكپەن ۇستالىپ، ۋاقىتشا ۇستاۋ يزولياتورىنا قامالدى.

«وزگە اقپارات تەرگەۋ مۇددەسىندە جاريا ەتۋگە جاتپايدى»، - دەيدى باس پروكۋراتۋرانىڭ باسپا ءسوز قىزمەتى.

اۆتور: ايجان سەرىكجان قىزى