اق وليمپيادا ويىندارى نەسىمەن ەستە قالدى

نۇر- سۇلتان. قازاقپارات - الەم نازارىن وزىنە اۋدارعان اق وليمپيادا ويىندارىنىڭ الاۋى ءسوندى. وسى ورايدا بەيجىڭدە وتكەن قىسقى وليمپيادانىڭ باستى ەرەكشەلىكتەرىنە قىسقاشا شولۋ جاساپ وتسەك.

جازعى دا، قىسقى دا وليمپيانى وتكىزگەن تۇڭعىش قالا

بەيجىڭ قىسقى جانە جازعى وليمپيادا ويىندارىن قابىلداعان ەڭ العاشقى قالا رەتىندە تاريحقا قالدى. بۇعان دەيىن وليمپيادا ويىندارىنىڭ تاريحىندا ءبىر قالادا جازعى دا، قىسقى دا ويىندار ءوتىپ كورمەگەن. ەسكە سالساق، بەيجىڭدە 2008 -جىلى جازعى وليمپيادا ويىندارى وتكەن بولاتىن. ال 2022 -جىلعى وليمپيادانى وتكىزۋ قۇقىعى ءۇشىن قىتاي استاناسىنىڭ باستى باسەكەلەسى الماتى بولعان ەدى.

2022 -جىلعى ويىندار «تازا مۇز بەن قارداعى قۋانىشتى كۇن» ۇرانىمەن ءوتتى جانە 2008 -جىلعى وليمپيادانىڭ مۇراسىنا نەگىزدەلدى. سونداي- اق اق وليمپيادانىڭ سالتاناتتى اشىلۋ ءراسىمى مەن جابىلۋ سالتاناتى 2008 -جىلى جازعى وليمپيادا ويىندارى وتكەن ستاديوندا ءوتتى. تاعى ءبىر ايتا كەتەتىن جايت، قىسقى وليمپيادا مەدالدارى 2008 -جىلى بەيجىڭدە وتكەن جازعى وليمپيادا جۇلدەلەرىنە ۇقساتا جاسالعان. ونىڭ باستى سەبەبى - قىتاي استاناسى جازعى جانە قىسقى وليمپيادانى قاتار وتكىزگەن ءتۇڭعىش قالا ەكەنىن سەزىندىرۋ. ايتا كەتەر جايت، بەيجىڭ وليمپياداسىنىڭ جەڭىمپازدارى مەن جۇلدەگەرلەرىنە ارنالعان تۇعىر ەكولوگيالىق تازا جانە وڭدەلگەن ماتەريالداردان جاسالدى.

ءۇش قالادا ءبىر ۋاقىتتا وتكەن وليمپيادا

بەيجىڭ وليمپيادا ويىندارىن قابىلداۋشى استانا رەتىندە تاڭدالعانىمەن، جارىستار ءبىر ەمەس، ءۇش قالادا ءبىر ۋاقىتتا ءوتتى. ولار - بەيجىڭ، يانتسين جانە چجانتسزياكوۋ قالاسى. بەيجىڭ قالاسىندا بارلىق مۇز جارىستارى (كەرلينگ، حوككەي، كونكيمەن جۇگىرۋ سپورتى)، سونداي- اق قاردا ءتورت جارىستى (ەرلەر مەن ايەلدەر اراسىنداعى سنوۋبوردينگ پەن شاڭعى فريستايلىنداعى بيگ- ەير) ءوتتى. يانتسين - استانانىڭ قالا ماڭىنداعى اۋدانى، بەيجىڭنەن سولتۇستىك- باتىسقا قاراي 80 ك م جەردە، ۇلى قىتاي قابىرعاسىنىڭ ايگىلى بولىكتەرى - بادالين مەن دجۋنگۋگۋان ورنالاسقان جەردە. وندا شاڭعى، بوبسلەي، سكەلەتون جانە شانا سپورتىنان مەدالدار ويناتىلدى. ال ءۇشنشى قالا چجانتسزياكوۋ سولتۇستىك- باتىسقا قاراي كورشىلەس حەبەي پروۆينتسياسىندا ورنالاسقان. تانىمال قىسقى كۋرورت چۋنلي سنوۋبوردينگ، شاڭعى سپورتىنىڭ بارلىق ءتۇرى جانە بياتلوننان جارىستاردى قابىلدادى.

وليمپيادا الاۋىن العاش رەت ماشينالار دا الىپ ءجۇردى

بەيجىڭ وليمپياداسىندا تاريحتا العاش رەت الاۋدى ادامدار عانا ەمەس، ماشينالار دا الىپ ءجۇردى. ەستافەتا ءۇش وليمپيادالىق كلاستەر بويىنشا 12 كەزەڭنەن تۇردى. الاۋدى الىپ جۇرۋگە 14 پەن 86 جاس ارالىعىنداعى جالپى ەسەبى 1200 الاۋ ۇستاۋشى قاتىستى. تاعى ءبىر ەرەكشەلىگى - بەيجىڭ وليمپياداسىنا بارعاندارعا روبوتتار قىزمەت كورسەتتى. ولار قوناق ۇيگە جايعاسقان ادامدارعا كەرەك- جاراقتارىن جەتكىزىپ بەرۋگە قولعابىس ەتتى.

شەتەلدىك كورەرمەندەر كوگىلدىر ەكراننان عانا كوردى

بەيجىڭ وليمپياداسى قىتايدىڭ جاڭا جىلىمەن جانە ەلدىڭ ۇلتتىق كوكتەم مەرەكەسىمەن تۇسپا- تۇس كەلدى. بۇرىن وسى مەرەكە كەزىندە ەلگە تۋريستەر كوپ كەلەتىن. ودان بولەك وليمپيادا ويىندارىندا ءوز قۇراماسىنا جانكۇيەر بولۋعا الەمنىڭ تۇكپىر- تۇكپىرىنەن سپورتسۇيەر قاۋىم قىتايعا اعىلادى دەپ جوسپارلانعان ەدى. الايدا كوروناۆيرۋس، پاندەميا بارلىق جوسپاردى وزگەرتتى. ويىنداردى شەتەلدىك كورەرمەندەر تەك كوگىلدىر ەكران ارقىلى تاماشالادى. وسىلايشا، شەتەلدىك جانكۇيەرلەرلەردىڭ كەلۋىنە تىيىم سالىنعاندىقتان، وليمپيادا بيلەتتەرى تەك قىتاي تۇرعىندارىنا عانا ساتىلدى.

قاتاڭ سانيتارلىق تالاپ

سانيتارلىق تالاپتارعا كەلەر بولساق، بەيجىڭ وليمپياداسىنا كوروناۆيرۋسقا قارسى ۆاكتسيناتسيانىڭ تولىق كۋرسىن العان سپورتشىلار عانا قاتىستىرىلدى. سونداي- اق، قاتىسۋشىلار قىتايعا كەلگەننەن كەيىن جابىق سيكل جۇيەسىندە بولدى. وليمپياداعا كەلگەن بارلىق ازاماتتار تەك ماسكامەن جۇرۋگە مىندەتتەلدى. تەك جەڭىس تۇعىرىنا كوتەرىلگەن سپورتشىلارعا ماراپاتتاۋ كەزىندە عانا ماسكاسىن شەشۋگە رۇقسات ەتىلدى. بەيجىڭ وليمپياداسى سانيتارلىق تالاپ جاعىنان ەڭ قاتال وتكەن وليمپيادا بولدى. ءار ەلدەن كەلگەن قوناقتارعا قالا ارالاۋعا نەمەسە بەلگىلەنگەن ايماقتان تىس دۇكەندەرگە بارۋعا تىيىم سالدى.

وليمپيادا اشىلۋىنا ق ر پرەزيدەنتى قاسىم- جومارت توقايەۆ قاتىستى

اق وليمپيادانىڭ سالتاناتتى اشىلۋ راسىمىنە ق حر ءتوراعاسى شي جينپيننىڭ شاقىرۋىمەن قازاقستان پرەزيدەنتى قاسىم- جومارت توقايەۆ ارنايى بارىپ قاتىستى. سالتاناتتى اشىلۋ راسىمىنە قازاقستان پرەزيدەنتى قاسىم- جومارت توقايەۆ جانە ق ح ر ءتوراعاسى شي جينپينمەن قاتار ارگەنتينا، مىسىر، قىرعىزستان، پولشا، رەسەي، سينگاپۋر، سەربيا، تاجىكستان، تۇرىكمەنستان، وزبەكستان، ەكۆادور پرەزيدەنتتەرى، قاتار ءامىرى، بوسنيا جانە گەرتسەگوۆينا، گرەكيا، موڭعوليا جانە پاكىستان پرەمەر- مينيسترلەرى، كامبودجا كورولى، ساۋد ارابياسىنىڭ تاق مۇراگەرى، ابۋ- ءدابيدىڭ تاق مۇراگەرى، موناكونىڭ حانزاداسى، ليۋكسەمبۋرگتىڭ ۇلى گەرتسوگى، تايلاندتىڭ حانشايىمى، ب ۇ ۇ باس حاتشىسى، حالىقارالىق وليمپيادا كوميتەتىنىڭ پرەزيدەنتى، دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى، شانحاي ىنتىماقتىق ۇيىمىنىڭ باس حاتشىسى جانە باسقا دا ءبىرقاتار شەتەلدىك رەسمي تۇلعا قاتىستى.

تۋىمىزدى ەرەكشە كيىنگەن ەكى سپورتشى الىپ شىقتى

وليمپياداعا قاتىسۋشى مەملەكەتتەر سپورتشىلارىنىڭ سالتاناتتى شەرۋىندە قازاقستاننىڭ مەملەكەتتىك تۋىن شورت- ترەكشى ابزال اجىعاليەۆ پەن كونكيمەن جۇگىرۋشى ەكاتەرينا ايدوۆا الىپ ءوتتى. ولار الاڭعا ارنايى تىگىلگەن ساق پاتشايىمى مەن قازاق باتىرىنىڭ وبرازىنداعى كيىم ۇلگىسەمەن بۇكىل الەم نازارىن وزىنە اۋداردى. قازاقستان فورماسى ەڭ ءساندى فورما اتاندى بەيجىڭ تورىندەگى قىسقى وليمپيادادا قازاقستان قۇراماسىنىڭ كيگەن فورماسى ەڭ ءساندى كيىمدەر تىزىمىنە ەندى. بۇل تۋرالى حالىقارالىق وليمپيادا كوميتەتى مەن شەتەلدىك باسىلىمدار جارىسا جازدى.

جالپى سوڭعى وليمپيادالاردىڭ بارلىعىندا قازاقستان قۇراماسىنىڭ فورماسى ۇزدىكتەر قاتارىنان كورىنىپ ءجۇر. سونداي- اق وليمپيادادا تۇڭعىش رەت قازاقستان كومانداسىنىڭ ەكيپيروۆكاسىنا ەل اتاۋى لاتىن قارپىمەن قازاق تىلىندە «Qazaqstan» دەپ جازىپ شىقتى.

19 قازاقستاندىق وليمپياداعا تۇڭعىش رەت قاتىستى

بەيجىڭ وليمپياداسىنا قاتاسقان قازاقستاندىق 34 اتلەتتىڭ 19 ى ءتورت جىلدىق دوداعا العاش رەت قاتىستى. جالپى ەل نامىسىن قورعاعان سپورتشىلاردى اتاپ وتسەك: شاڭعى جارىسى - ۆيتالي پۋحكالو، ەۆگەنيي ۆەليچكو، كسەنيا شالىگينا، ۆالەريا تيۋلەنيەۆا، يرينا بىكوۆا، نادەجدا ستەپاشكينا جانە انگەلينا شۋرىگا. فريستايل- موگۋل - يۋليا گالىشيەۆا، اياۋلىم امرەنوۆا، ولەسيا گراۋر، اناستاسيا گورودكو، دميتري رەيحەرد جانە پاۆەل كولماكوۆ. شاڭعى اكروباتيكاسى - جانبوتا الدابەرگەنوۆا، اقمارجان قالمۇرزايەۆا جانە شەرزود حاشيربايەۆ. تاۋ شاڭعىسى - ەرلەر اراسىندا زاحار كۋچين (سلالوم مەن گيگانتتى سلالوم) مەن ايەلدەر اراسىنداعى سلالومدا الەكساندرا ترويتسكايا باق سىنادى. شاڭعىمەن سەكىرۋ - سەرگەي تكاچەنكو مەن دانيل ۆاسيليەۆ، سونداي- اق، شاڭعى قوسسايىسىنان شىڭعىس راكپاروۆ. بياتلون - گالينا ۆيشنيەۆسكايا- شەپورەنكو، الەكساندر مۋحين مەن ۆلاديسلاۆ كيرەيەۆ، كونكيمەن جۇگىرۋ سپورتىنان نادەجدا موروزوۆا، ەكاتەرينا ايدوۆا، دميتري موروزوۆ، يۆان ارجانيكوۆ پەن دەنيس كۋزين. شورت- ترەك - ابزال اجىعاليەۆ، دەنيس نيكيشا، ءادىل عالياحمەتوۆ، يانا حان جانە ولگا تيحونوۆا. وسىلايشا، قازاقستاندىق سپورتشىلار قىسقى وليمپياداعا 87 جولداما جەڭىپ العان ەدى.

قازاق قىزى سۇلۋىلىعىمەن جانكۇيەرلەرىن ءتانتى ەتتى

بەيجىڭدەگى قىسقى وليمپيادا ويىندارىنا تۇڭعىش رەت قىتايدا تۇراتىن ءۇش قانداسىمىز قاتىستى. ولار: كونكي سپورتىنان - اقنار اداق، شاڭعى سپورتىنان - بايان جالىن جانە قادىس بەدەلحان ۇلى. وكىنىشكە قاراي، ۇشەۋى دە جۇلدەگە ىلىنە العان جوق. ولاردىڭ اراسىنان كونتكيمەن جۇگىرۋدەن سىنعا تۇسكەن اقنار اداق سۇلۋلىعىمەن ءتۇرلى ەلدەن كەلگەن جانكۇيەرلەردى ءتانتى ەتتى.

وليمپيادادا ابايدىڭ «ايتتىم سالەم، قالامقاس» ءانى شىرقالدى

بەيجىڭ وليمپياداسىندا قازاقتىڭ باس اقىنى ابايدىڭ «ايتتىم سالەم، قالامقاس» ءانى شىرقالدى. بۇل اۋەنگە لاتۆيالىق مانەرلەپ سىرعاناۋشى دەنيس ۆاسيليەۆ قىسقا باعدارلامادا سىرعانادى. قازاق اقىنىنىڭ انىمەن مۇز ايدىنىندا قالىقتاعان ۆاسيليەۆ قىسقا باعدارلاما سايىسىندا 85,30 ۇپاي ەنشىلەپ، 16-ورىن الدى. ەكى باعدارلاما قورىتىندىسى بويىنشا دا لاتۆيالىق مانەرلەپ سىرعاناۋشى جۇلدەگە ىلىنە العان جوق.

جاڭا جارىس تۇرلەرىنەن مەدالدار ساراپقا سالىندى

وسى وليمپيادا ويىندارىنا ساۋد ارابياسى مەن گايتي ەلدەرى تۇڭعىش رەت قىسقى ويىندارعا قاتىستى. بەيجىڭدە وليمپيادا باعدارلاماسىنا جاڭادان ەنگەن جارىس تۇرلەرىنەن مادالدار ويتاتىلدى. ول سپورت تۇرلەرى: شورت- ترەكتەن ارالاس ەستافەتا، شاڭعى اكروباتيكاسىنان، شاڭعىمەن تۇعىردان سەكىرۋدەن جانە سنوۋبورد- كروسستان ارالاس كوماندالىق تۋرنير، فريستايلدان ەرلەر مەن ايەلدەر اراسىنداعى بيگ- ەير، سونداي- اق، مونوبوبتان ايەلدەر اراسىنداعى جارىستار. وسى قوسىمشا جارىس تۇرلەرى ارقىلى قىسقى ويىندار تاريحىندا العاش رەت گەندەرلىك تەڭدىك ماسەلەسى باستى نازارعا الدى. ناتيجەسىندە 2018 -جىلعى ويىندارمەن سالىستىرعاندا، جارىستارعا قاتىسقان ايەلدەر سانى 45 پايىزدان استى.

شورت- ترەكشىلەردىڭ تاريحي جەتىستىگى

بەيجىڭ وليمپياداسىندا شورت- ترەكتەن ەل تاريحىندا العاش رەت قوس سپورتشىمىز جەكەلەي سىننىڭ فينالىنا شىقتى. ناتيجەسىندە ابزال اجىعاليەۆ 500 مەترلىك قاشىقتىقتا فينالدا سىنعا ءتۇسىپ، 4-ورىنعا يە بولدى. ەكىنشى سپورتشىمىز ءادىل عالياحمەتوۆ 1500 مەترلىك باسەكەدە ۇزدىك وندىققا ەنىپ، وليمپيادانى 8-ورىنمەن اياقتادى. سونداي- اق، شورت- ترەكشىلەرىمىز تۇڭعىش رەت ارالاس ەستافەتادا الدىڭعى 5 تىكتەن تابىلدى. بەيجىڭ وليمپياداسىندا شورت- ترەكتەن 4- ورىن العان ابزال اجىعاليەۆكە قازاقستان رەسپۋبليكسىنىڭ پرەزيدەنتى قاسىم- جومارت توقايەۆ جەدەلحات جولداپ، ءدۇبىرلى دودادا ناعىز ەرىك- جىگەر كورسەتكەنى جانە جەڭىسكە دەگەن ۇمتىلىسى ءۇشىن العىس ايتتى.

اۆتور: كۇنسۇلتان وتارباي