ەكى جىلدان بەرى جابىق بولعان «جەمەنەي» كەدەن بەكەتى اشىلدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ەكى جىلدان بەرى جابىق بولعان «جەمەنەي» كەدەن بەكەتى اشىلدى – CNR

15- اقپان كۇنى تاڭەرتەڭ «Xinjiang Mustang Group Co., Ltd» كومپانياسى ەكسپورتتاعان 48 توننا مۇناي قۇبىرى جابدىعى تيەلگەن ەكى ۇلكەن جۇك كولىگى «جەمەنەي» كەدەن بەكەتىنەن شىعىپ، قازاقستاننىڭ ماڭعىستاۋ وبلىسىنىڭ اقتاۋ قالاسىنا بەت الدى، دەپ حابارلايدى قىتايدىڭ CNR باسىلىمى.

اتالعان ب ا ق- تىڭ حابارلاۋىنشا، كەدەندىك رەسىمدەۋدىڭ كەدەرگىسىز ورىندالۋىن قامتاماسىز ەتۋ ءۇشىن جەمەنەي شەكارالىق ايماعى جۇك ەكسپورتىن باسقارۋ جانە جونەلتۋ توبىن قۇرىپ، 80-نەن استام كاسىپورىنمەن بەلسەندى بايلانىسقا شىعىپ، ەكسپورتتالاتىن تاۋارلاردىڭ تۇرلەرى مەن مولشەرىن انىقتادى. تارتىمدى ىسكەرلىك ورتانى قۇرۋ ماقساتىندا جۇك ەكسپورتى بويىنشا ەسەپ بەرۋ توبى قۇرىلدى. سونداي- اق اتالعان كەدەن بەكەتىندە جابىق سيكلدى باسقارۋ جانە ەپيدەميانى بولدىرماۋ ەرەجەلەرى قاتاڭ ساقتالادى.

«قىتاي مەن قازاقستان اراسىنداعى «جەمەنەي» كەدەن بەكەتى - 100 جىلدان استام تاريحى بار كونە شەكارالىق وتكەل. قازاقستان جاعىندا مايقاپشاعاي كەدەن بەكەتى بار. «جەمەنەي» شەكارا وتكەلى قىتاي، قازاقستان، رەسەي جانە موڭعوليانىڭ تۇيىلىسكەن ايماعىندا ورنالاسقان. بۇل شەكارا بەكەتى ساۋدا لوگيستيكالىق ارنالارى مەن «جىبەك جولى» ەكونوميكالىق بەلدەۋى بويىنشا شىڭجاڭ بولىگىنىڭ سولتۇستىك وڭىرىندەگى ماڭىزدى بولىگى بولىپ تابىلادى. ول شىڭجاڭنىڭ سىرتقا ەسىك اشۋ باعدارلاماسىندا ەرەكشە ستراتەگيالىق مانگە يە»، دەپ جازادى CNR باسىلىمى.

موڭعوليا قۇراماسىنىڭ بەيجىڭدە كيگەن كيىمى ح و ك- نىڭ مۇراجايىنا سىيعا بەرىلەدى - Kaznews

موڭعوليا ۇلتتىق وليمپيادا كوميتەتىنىڭ باسشىلارى حالىقارالىق وليمپيادا كوميتەتىنىڭ ىنتىماقتاستىق جونىندەگى ديرەكتورى دجەيمس ماكلەودپەن جانە ۇ و ك- نىڭ ۇيىمداستىرۋ جۇمىستار بويىنشا ديرەكتورى دجەروم پاۋمەن كەزدەسىپ، ىنتىماقتاستىق ماسەلەلەرىن تالقىلادى، دەپ حابارلايدى Kaznews.

موڭعوليا ۇلتتىق وليمپيادا كوميتەتى سىرتقى بايلانىستارىن كەڭەيتۋگە، ۇلانباتىر قالاسىندا حالىقارالىق كونفەرەنتسيالار مەن سەمينارلار ۇيىمداستىرۋعا نيەت ءبىلدىرىپ، باسقا دا وزەكتى ماسەلەلەر بويىنشا پىكىر الماسقان.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، حالىقارالىق وليمپيادا كوميتەتىنىڭ مادەني مۇرا قورىنىڭ ءوتىنىشى بويىنشا 2022 -جىلى بەيجىڭدەگى وليمپيادا ويىندارىنىڭ اشىلۋ سالتاناتىندا كيگەن شاڭعىشى ب. اچبادراحتىڭ ۇلتتىق كيىمى مەن باس كيىمى شۆەيتساريانىڭ لوزاننا قالاسىنداعى ح و ك وليمپيادا مۇراجايىنا سىيعا تارتىلادى. «سپورتشىلار جابىلۋ سالتاناتىندا كيىمدەرىن كيىپ، ەرتەڭىنە وليمپيادا مۇراجايىنا تاپسىرۋعا كەلىستى»، دەپ جازادى Kaznews.

بەيجىڭدەگى 2022 قىسقى وليمپيادا ويىندارىنا موڭعوليادان 2 سپورتشى قاتىسقان.

وزبەك فۋتبولشىسى - الماتىنىڭ «قايرات» كلۋبىنىڭ ويىنشىسى اتاندى - «ءوزا»

فۋتبولدان وزبەكستاندىق جارتىلاي قورعاۋشى جاسۋر جالوليددينوۆ بيىلعى ماۋسىمدى الماتىنىڭ «قايرات» كلۋبىندا جالعاستىرادى، دەپ حابارلايدى «ءوزا» مەملەكەتتىك اقپارات اگەنتتىگى.

كلۋبتىڭ حابارلاۋىنشا 20 جاستاعى جارتىلاي قورعاۋشى الماتى كلۋبىمەن وسى جىلدىڭ ماۋسىم ايىنا دەيىن كەلسىمگە وتىرعان. كەلىسىمشارت بويىنشا «قايرات» كلۋبىندا فۋتبولشىنى ساتىپ الۋ قۇقىعى بار ەكەنى ايتىلعان.

جاسۋر جالوليددينوۆ كاسىبي مانسابىن 2018 -جىلى تاشكەنتتىڭ «بۋنديكور» كلۋبىندا باستاعان. 2020 -جىلى ماسكەۋ «لوكوموتيۆ» ساپىنا ويناپ، كەيىن «تامبوۆ»، «ءاندىجان» جانە تاشكەنتتىڭ «لوكوموتيۆ» كوماندالارىندا ونەر كورسەتكەن. جاسۋر جالوليددينوۆتىڭ «لوكوموتيۆ» كلۋبىمەن 2023 -جىلدىڭ سوڭىنا دەيىن كەلىسىمشارتى بار تاعى بار.

يران- قازاقستان- وزبەكستان بىرلەسكەن ەكونوميكالىق كوميسسياسىنىڭ وتىرىسى تەگەراندا وتەدى - Parstoday

يران سىرتقى ىستەر ءمينيسترىنىڭ ورىنباسارى كەلەسى اپتادا تەگەراندا وزبەكستان جانە قازاقستانمەن بىرلەسكەن ەكونوميكالىق كوميسسيانىڭ وتىرىسى وتەتىنىن مالىمدەدى، دەپ حابارلايدى Parstoday اقپاراتتىق اگەنتتىگى.

يران سىرتقى ىستەر مينيسترلىگىنىڭ وكىلى مەحدي سافاري كەلەسى اپتادا تەگەراندا وزبەكستان جانە قازاقستانمەن بىرلەسكەن ەكى ەكونوميكالىق كوميسسيانىڭ باس قوساتىنىن جەتكىزدى.

«جيىندا كاسىپكەرلەر مەن جەكە سەكتور وكىلدەرى قاتىسىپ، بىرلەسكەن كوميسسيا وتىرىستارىمەن ءبىر مەزگىلدە يراننىڭ ساۋدا- ونەركاسىپ پالاتاسىندا وسى ەلدەردىڭ كاسىپكەرلەرىمەن ەكونوميكالىق كونفەرەنتسيالار وتكىزەدى. وسى بىرلەسكەن كوميسسيالاردا قول قويۋعا دايىندالعان قۇجاتتاردىڭ جوبالارىندا دا بارلىق سالالارداعى ەكىجاقتى ىنتىماقتاستىقتاردى نىعايتۋ ءۇشىن كەلىسىمدەر قاراستىرىلعان»، - دەدى مەحدي سافاري.

بەيجىڭ-2022: قىسقى پاراليمپياداعا قاتىساتىن قازاقستان قۇراماسى انىقتالدى - «حالىق گازەتى»

بەيجىڭ-2022 XIII قىسقى پاراليمپيادا ويىندارىنا قاتىساتىن قازاقستان ۇلتتىق قۇراماسى بەلگىلى بولدى، دەپ حابارلايدى قىتايدىڭ «حالىق گازەتى» اقپاراتتىق پورتالى «قازاقپارات» - قا سىلتەمە جاساپ.

«ق ر ۇلتتىق پاراليمپيادا كوميتەتى ءمالىم ەتكەندەي، بەيجىڭدە وتەتىن پاراليمپيادا ويىندارىنا قازاقستاننان بەس سپورتشى كەلەدى. ولار - الەكساندر گەرليتس، ەربول حاميتوۆ، سەرگەي ۋسولتسيەۆ، يۋريي بەرەزين جانە دەنيس پەترەنكو»، دەپ جازدى قىتايلىق ب ا ق.

ايتا كەتەيىك، قازاقستاننىڭ پاراليمپيادالىق سپورتشىلارى ەكى سپورت ءتۇرى بويىنشا: شاڭعى جارىسى جانە بياتلوننان سىنعا تۇسەدى. الدىن الا جوسپار بويىنشا، XIII قىسقى پاراليمپيادا ويىندارى 2022 -جىلدىڭ 4-13 - ناۋرىزى ارالىعىندا بەيجىڭدە وتەدى. ويىندارعا 50 ەلدەن 736 سپورتشى قاتىسادى دەپ كۇتىلۋدە. سپورتشىلار قار سپورتى (تاۋ شاڭعىسى، شاڭعى جارىسى، بياتلون جانە سنوۋبورد) جانە مۇزداعى سپورت (شانامەن حوككەي جانە مۇگەدەكتەر ارباسىندا كەرلينگ) بويىنشا ەكى كاتەگوريا بويىنشا التى سپورت تۇرىنەن 78 ءتۇرلى جارىسقا قاتىسادى.

احمەت بايتۇرسىن ۇلىن انكارادا ەسكە الدى - TRT

قازاق ءتىل ءبىلىمىنىڭ نەگىزىن قالاۋشى احمەت بايتۇرسىن ۇلىنىڭ تۋعانىنا 150 جىل تولۋى اياسىندا انكارادا ەسكە الۋ شاراسى بولدى.

«قازاق ءتىلىنىڭ بەتبۇرىس كەزەڭى» اتتى احمەت بايتۇرسىن ۇلىنىڭ 150 جىلدىعىنا ارنالعان حالىقارالىق كونفەرەنسيا انكارادا تۇرىكسوي عيماراتىندا بولىپ ءوتتى. ماعىنالى شارانى تۇرىك مادەنيەتىنىڭ حالىقارالىق ۇيىمى تۇرىكسوي، قازاقستاننىڭ تۇركياداعى ەلشىلىگى جانە تۇرىك ءتىلى قاۋىمداستىعى (TDK) باس حاتشىلىعى بىرلەسىپ ۇيىمداستىردى، دەپ حابارلايدى تۇركيا راديو تەلەۆيزيا پورتالى.

كونفەرەنسيانىڭ اشىلۋنا تۇرىكسويدىڭ باس حاتشىسى دۇيسەن قاسەيىنوۆ، قازاقستاننىڭ تۇركياداعى ەلشىسى ابزال ساپاربەك ۇلى جانە ت ت ق پرەزيدەنتى پروفەسسور، دوكتور گيۋرەر گۇلسيەۆين قاتىسىپ، ءسوز سويلەدى.

حالىقارالىق كونفەرەنسيادا قازاقستاننان ا. بايتۇرسىن ۇلى اتىنداعى ءتىل جانە عىلىم ينستيتۋتىنىڭ ديرەكتورى، پروفەسسور انار فازىلجان، ل. گۋميلوۆ اتىنداعى ەۋرازيا ۋنيۆەرسيتەتى تۇركولوگيا كافەدراسى وقىتۋشىسى پروفەسسور امانتاي ءشارىپ، قىرعىزستاننان شىڭعىس ايتماتوۆ اتىنداعى ءتىل جانە ادەبيەت ينستيتۋتىنىڭ ماناس تانۋ ءبولىمىنىڭ مەڭگەرۋشىسى پروفەسسور مەەرىم كولبايەۆا، ازەربايجاننان ۇلتتىق عىلىم اكادەمياسى نەسيمي ءتىل ءبىلىمى ينستيتۋتىنىڭ تۇرىك تىلدەرى ءبولىمىنىڭ ديرەكتورى ەلچين يبراحيم، وزبەكستاننان تاشكەنت مەملەكەتتىك پەداگوگيكالىق ۋنيۆەرسيتەتىنىڭ قازاق ءتىلى مەن ادەبيەتى كافەدراسىنىڭ مەڭگەرۋشىسى ەرگاش ابدۋۆاليتوۆ جانە تۇركيادان انكارا حاجى بايرام ۆەلي ۋنيۆەرسيتەتىنىڭ زاماناۋي تۇرىك ديالەكتىلەرى مەن ادەبيەتى كافەدراسىنىڭ پروفەسسورى گۇلجانات قۇرمانعالييەۆا ەرجيلاسۋن بايانداما جاساعان.

تۇرىكسويدىڭ باس حاتشىسى قاسەيىنوۆ ءوز سوزىندە 20 - عاسىردىڭ باسىنداعى قازاقستانداعى ۇلت- ازاتتىق قوزعالىس جەتەكشىلەرىنىڭ ءبىرى، مەملەكەت قايراتكەرى، عالىم، ءارى ادەبيەت قايراتكەرى، الاش وردا ۇكىمەتىنىڭ مۇشەسى ا. بايتۇرسىن ۇلىنىڭ 150 جىلدىق مەرەيتويىنا وراي تۇرىكسوي شاڭىراعىندا كونفەرەنسيا وتكىزىلگەنىنە قۋانىشتى ەكەنىن جەتكىزدى.

قاسەيىنوۆ سونىمەن بىرگە تۇرىك الەمىنىڭ ورتاق زيالىسى بولىپ تابىلاتىن بايتۇرسىن ۇلىنىڭ ءوز ەڭبەكتەرىمەن تەك قازاق تىلىنە عانا ەمەس، تۇركى الەمىنىڭ باسقا تىلدەرىنە دە ماڭىزدى ۇلەس قوسقانىن اتاپ كورسەتتى.

قازاقستانداعى ۇلتتىق سانا قوزعالىسى بولىپ ەسەپتەلەتىن الاش قوزعالىسىنىڭ 20- عاسىردىڭ باسىندا تۇرىك الەمىنىڭ ءار تۇكپىرىندە ورىن العان ازاتتىق پەن تاۋەلسىزدىك قوزعالىسىنىڭ اجىراماس بولىگى ەكەنىن ايتقان ەلشى ابزال ساپاربەك ۇلى بولسا بايتۇرسىن ۇلىنىڭ قازاق حالقىنىڭ تۇڭعىش پروفەسسورى ەكەنىن دە ەسكە سالدى.

القالى جيىندا سونىمەن بىرگە تۇرىكسوي باسىپ شىعارعان جازۋشى سەرىكباي وسپانوۆتىڭ «ۇلت ۇستازى» اتتى كىتاپ تانىستىرىلدى.

اۆتور: بەيسەن سۇلتان