پوەزيا پاتشايىمى
ءبىز بۇل جەردە تاۋىپ ايتتىق، جاڭالىق اشتىق دەي المايمىز. ءبىز نەبارى تەك وسىناۋ ماڭگىلىك اقيقاتتىڭ تەڭدەسى جوق فورمۋلاسىن، سونىڭ ومىرشەڭ ءبىر شىنار- شىرايىن كورنەكتى اقىن فاريزا وڭعارسىنوۆانىڭ الەمى - پوەزياسى وزىنشە ءبىر شوقتاندىرىپ، ساۋلەلەندىرىپ، نۇرلاندىرىپ كەلەدى دەسەك استە ارتىقتىعى جوق. قايتا كەرىسىنشە، مىڭ- مىڭداعان وقىرماندارىنىڭ ءبىرى رەتىندە كەنەتتەن عايىپەرەن ءپارۋانا پىرگە قول بەرگەندەي تىم قۇدىرەتتەنىپ، تىم اسقاقتاپ، سول مەزەت ادامدىق تاعدىرىمىزعا ريزا ەكەندىگىمىزدى، ءسويتىپ جالپاق جاھانعا جار سالاتىنىمىزدى، وزىڭە ايان، ءبىراق تا وزگەگە ءجۇمباق مەيلىنشە ءبىر كۇي كەشەتىنىمىزدى استە جاسىرا المايمىز.
قانداي ازاپ سەزىنۋ، سەزۋ دەگەن!
سول ازاپتان ءازىرمىن بەزۋگە مەن.
جاننىڭ اعىستارىمەن سالىستىرساڭ،
تۇك ەمەستەي بۇرقانعان تەڭىز، كەمەڭ.
سەنى مەن مەن - قايتەمىز وزگەنى ءبىز،
جاقىنداماي، تىلدەسپەي وزدەرىمىز
تەرىس قاراپ تۇرىپ- اق سەزىنەمىز -
جاۋىرىنعا بىتكەن بە كوزدەرىمىز؟ !
بولماق ەمەس بىزدەردە اشىق، وكپە،
مەن - تامىرى، سەن - قايىڭ - باسى كوكتە،
جازاتايىم قۋراسام - سەن قۇلايسىڭ،
قاسيەت پە، بۇل الدە قاسىرەت پە؟
المايدى ەشكىم سەزىمدى اقى- پۇلعا،
ءالسىز وعان داڭقىڭ دا، ۋاقىتىڭ دا.
مەنىڭ باقىتتىلىعىم سول جالعاندا -
قاسىرەتتەن تۇرادى باقىتىم دا! - دەيدى اقىن فاريزا.
ال ولەڭنىڭ ونەبويىنداعى ءارى ومىرلىك، ءارى كوركەمدىك شىندىق قانداي عاجاپ، قانداي قۋاتتى! ونەر يەسىنىڭ بۇكىل تىرشىلىگى - دراماسى مەن تراگەدياسى، پەندە رەتىندەگى بولمىسى مەن دەرتى ولەڭ ورىمىندە قالايشا ءبىرتۇتاس شىققان! سەزىم مەن ويدىڭ، وي مەن سەزىمنىڭ بىردە تامىرعا، بىردە جاپىراققا الما- كەزەك ۇلاسىپ جاتۋى ليريكالىق تۋىندىنىڭ عاجايىپ كوركەمدىك ۇيلەسىمىن كورسەتىپ تۇرعان جوق پا!
اسىلى، ءاۋ باستان ميكەشە نە ماڭگۇرت، پاسىق ىشمەرەز نە قانشىققىجىل دۋايپات بولماساڭ، باس يمەۋىڭ، تابىنباۋىڭ استە مۇمكىن ەمەس.
ءتورت اياعىن تەڭ باسقان ولەڭ كەلىسىمىنە باس يمەي كور!
ءتورت قابىرعاسى تۇگەل ولەڭ قۇدىرەتى مەن سيقىرىنا تابىنباي كور!
اسىلى، باقىتىن - قاسىرەت نەمەسە قاسىرەتىن - باقىت كورەتىن اقىن شىندىعى مەن شىنشىلدىعىنا پاراپار كەلەتىن، شەندەس كەلەتىن نە بار ەكەن دەپ سول زامات ويشا شارق ۇراسىڭ، شارلايسىڭ. ولەڭدى قايتا وقيسىڭ، ءسويتىپ قايتا سۇيسىنەسىڭ. ءبىراق، ءبارىبىر اقىن قۇدىرەتىنە تەڭ تۇسەتىن ەشنارسە تاپپايسىڭ. مۇنى تەك فاريزاداي شىنايى تالانت، فاريزاداي شوڭ اقىن عانا ايتا الادى ەكەن.
اقىندىق ساپارىندا، ياعني كۇنى بۇگىنگە دەيىن جەمىستى شىعارماشىلىق عۇمىرىندا ءوزىنىڭ پوەزيالىق بولمىسىن قانجوسا جۇرەگىمەن، توعىزىنشى باللداي بۋىرقانعان - شامىرقانعان سەزىمدەرىمەن، شاربولاتتاي سۋارىلعان وي- پايىمدارىمەن ىلعي دا تولاسسىز ايتۋمەن، جىرلاۋمەن كەلەدى ەكەن.
ەندەشە فاريزاعا نەگە باس يمەسكە!
ەندەشە فاريزا اقىنعا نەگە تابىنباسقا!
فاريزا وڭعارسىنوۆانىڭ ءىرى اقىن ەكەندىگىنە اۋەلدە كۇمان بولعانمەن، كەيىننەن كۇمان تۋعان ەمەس. تالانتتىڭ تانىلۋ پروتسەسى ۇزاق بولماعانمەن، قالتقىسىز مويىندالۋى، مەترلەر ساناتىنا قوسىلۋ بارىسىنىڭ ەداۋىر سوزىلاتىنى جانە راس. اقىن فاريزا وسى بيىككە الدەقاشان كوتەرىلگەن دەپ بىلەمىز.
مىنە، سوندىقتان دا ءبىز فاريزاداي ءىرى اقىنىمىزدى، شىنايى اقىنىمىزدى، ءسوز جوق، ۇلتتىق ىرىسىمىز، ۇلتتىق قازىنامىز دەپ باتىل ايتۋعا ءتيىسپىز. تاۋەلسىزدىكتىڭ قازىر ەلىمىزگە، بىزدەرگە، وي- سانامىزعا تۇسىرگەن شيپالى- شۇعىلالى ءبىر نۇرى - ءبىر ساۋلەسى دەپ بىلەمىز. ونىڭ ۇستىنە كۇنى كەشەگە دەيىنگى قوعامدىق داۋىرلەردىڭ بويىمىزعا ءسىڭىرىپ كەتكەن بوداندىق پەن قوسۇرەيلىك، كىرىپتارلىق پەن جارامساقتىق سياقتى قۇلاقكەستى الەۋمەتتىك- پسيحولوگيالىق ەمبريوندارعا، پاسىق پيعىلدار ەپيدەمياسىنا قارسى جاپپاي پارمەندى ۆاكتسينا جۇرگىزۋ ءىسى مەملەكەتتىك دەربەستىگىمىز نىعايعان سايىن رۋحاني- الەۋمەتتىك تۇرعىدان نەعۇرلىم كۇشەيە تۇسەدى، نەعۇرلىم ارتا تۇسەدى دەپ ۇمىتتەنەمىز. سوعان سەنەمىز. سول ءۇشىن دە جۇمىلا كۇرەسۋگە ءتيىسپىز. سوعان ءوز ۇلەسىمىزدى قوسۋعا مىندەتتىمىز.
اقىننىڭ ءبىر باقىتى مەن ءبىر سورى - ونىڭ كوزى تىرىسىندە اڭىزعا اينالىپ كەتۋى. باقىتى - مىڭ- مىڭداعان قاراقۇرىم وقىرماندارىنىڭ كوڭىل ىڭكارىنىڭ تورىنەن ورىن الا بىلۋىندە. سورى - بايگەگە تۇسكەن قالامداستارىنىڭ، ارىپتەستەرىنىڭ ات توبەلىندەي ازعانتاي توبىنىڭ نە تۇزى كەم، نە اشىتقىسى اسىپ، بىقىرىپ كەتكەن تۋىندىلار بەرۋىنە تىكەلەي ءوزى «كىنالى» ەكەندىگىندە. بۇنداي «كەمتالانتتاردىڭ» (ا. سۇلەيمەنوۆ) ەركىنە، ىرقىنا سالساڭ، ءىرى تالانتتاردى تانۋدىڭ ءوزى - بەينە سولاردىڭ قاپيادا، ويدا- جوقتا جالاڭاياق شوق باسقانىنداي. مۇنى مۇردەم كەتكەن پەندەشىلىك بيشارالىقتىڭ، سانالى تۇردە ساسىق جەڭىسكە جەتكەن جەتەسىز پيعىلدىڭ تۇلدانعان داقپىرتى عانا دەمەسكە شاراڭ جوق... وسى ارادا ءبىر ءجايتتى جول- جونەكەي ايتا كەتكەن ءجون ءتارىزدى. ۋاكىتشا قياناتتىڭ وپا بەرمەيتىنىنە، ءتۇپتىڭ- تۇبىندە قارىمتا زاۋالى قايتاتىنىنا دالەل.
بۇدان اتتاي ون جىل بۇرىن وسى جولداردىڭ اۆتورى «سىن پەرنەسى» اتتى كىتابىنا ەنگەن ءبىر ماقالاسىندا: «ماسەلەن، سەنت-بيەۆ جوعارىدا ايتقان مارسەلينا دەبورد- ۆالمور تۋرالى: «ونا ۋجە پوەت، ونا - ساما پوەزيا» دەسە؛ ال پاۆەل انتوكولسكي مارينا تسۆەتايەۆا جايىندا: «مارينا تسۆەتايەۆا - نيكوگدا نە پوەتەسسا. ونا - پوەت» دەگەن قاناتتى افوريزمدەرگە اينالىپ كەتكەن باتىل دا ءادىل تۇجىرىمداردى فاريزا وڭعارسىنوۆا تۆورچەستۆوسىنا قاراتا ايتساق، اقيقات اۋلىنان الشاقتاماسىمىز كامىل» - دەپ جازعان ەدى. ءارى سالىستىرمالى، ءارى تۇسپالمەن ايتىلعان وسى پىكىرىمىزدى القالى ماجىلىستە قازىرگى اتىشۋلى قالامگەر ءبىر اعامىز مىسالعا كەلتىرىپ، مەيلىنشە مانەرلەپ وقىپ، جالعىز وقپەن ەكى قوياندى اتىپ العانىنا ءارى ءماز بولىپ، ءارى سول پىكىردى فاريزادان قيامەتتەي قىزعانىپ، ەر- توقىمىن باۋىرىنا الىپ، ولاي موڭكىپ، بۇلاي تۋلاعانىنان مەيلىنشە حاباردارمىز. فاريزا اقىننىڭ شىعارماشىلىعىن مانسۇقتاۋ، كوركەم سىنعا توپىراق شاشۋ، قوتىراش- باتىراشتىقپەن ءساتى مەن جولىن تاۋىپ سىنشىنى ءبىر مۇقاتىپ قالۋ، قاساقانا تۇردە مۇقاتىپ قالۋ، قاساقانا تۇردە اياقتان شالۋ ول قالامگەرگە ءارقاشان تۇك تە ەمەس. سىنشى سول جولى الا الماعان سىيلىعىن كەيىن ءبارىبىر الدى. ءبىراق تا وسىنىسى ارقىلى سول قالامگەردىڭ ءبىر جولعا ۋاقىتشا عانا پەندەشىلىك ايىزىن قاندىرعانى قانداي داۋسىز بولسا، و زاماندا- بۇ زامان كەلىگە سۋ تۇيگەن نەمەسە كۇبىگە قارا سۋ پىسكەن ىسقاياق شىعايبايلىق- قۋىسكوكىرەك پاسىق بولمىستى جاراپازان مەنمەنشىلدىكتى ناقتى كورسەتەتىنى دە سونداي داۋسىز اقيقات.
ماقالا اۆتورى وسى پىكىرىن بۇگىن دە قايتالاپ ايتادى. سول سالىستىرۋدى، سول تۇسپالدى تەك بار بولعانى ۇستەمەلەپ، ناقتىلاي تۇسەدى. فاريزا وڭعارسىنوۆا، ءسوز جوق، ءىرى اقىن. ءسوز جوق، فاريزا اقىن - تۇنىپ تۇرعان ومىرشەڭ پوەزيانىڭ ءوزى بولىپ تابىلادى. ويتكەنى، ول ءوزىنىڭ بۇكىل شىعارماشىلىق ەڭبەگىمەن، شىنايى تالانتىنىڭ ىرىلىگىمەن - پوەزيا پاتشايىمىنا اينالعان باقىتتى تۇلعا!
قازاق قىزدارىنىڭ - قارىنداستارىمىزدىڭ، اپكەلەرىمىزدىڭ، سىڭلىلەرىمىزدىڭ بايشەشەك سەزىمدەرىن، قىزعالداق شاقتارىن نەمەسە اجەلەرىمىزدىڭ، قارىنداستارىمىزدىڭ، سىڭلىلەرىمىزدىڭ، ياعني ارعى- بەرگى تاريحتاعى قازاق ايەلدەرىنىڭ تولعاۋى توقسان تاعدىرلارىن مەيلىنشە زور سۇيىسپەنشىلىكپەن، مەيلىنشە زور تاعزىممەن، مەيلىنشە زور شىندىقپەن، مەيلىنشە زور شابىتپەن اسقاق تا سۇلۋ جىرلاعان اقىن فاريزا وڭعارسىنوۆا، شىن مانىندە پوەزيا پاتشايىمىنا اينالعان سيرەك تۇلعا - دارا تۇلعا!
وعان اقىننىڭ سوناۋ «ساندۋعاش» (1966) جيناعىنان باستاۋ الىپ، «ماڭعىستاۋ مارجاندارى»، «مازاسىز شاق»، «اساۋ تولقىن»، «مەن سەنىڭ جۇرەگىڭدەمىن»، «سەنىڭ ماحابباتىڭ»، «شىلدە» (تاڭدامالى)، «سۇحبات»، «جۇرەك كۇندەلىگى» (تاڭدامالى)، «داۋا»، «وسيەت»، ەكى تومدىق تاڭدامالىلارى ارقىلى جالعاسقان، كۇنى بۇگىنگە دەيىنگى «شاشى اعارعان قىز» اتتى كىتاپتارىندا كوشەلى كورىنىسكە، دەربەس كوركەمدىك الەمگە اينالعان قۇلىن ءمۇسىن ليريكالارى، پاراساتقا تۇنعان پوەمالارى، ءپرينتسيپتى كوزقاراستارى ايقىن ماقالالارى- ەسسەلەرى تولىق دالەل بولادى. پوەزيا پاتشايىمى اتانۋ ءۇشىن جوعارىدا اتى اتالعان ولەڭ جيناقتارىنىڭ، كىتاپتارىنىڭ كەيدە جەكەلەي دە، كەيدە تۇتاستاي دا كەمەل كەپىل بولا الاتىنىن قالىڭ وقىرمان قاۋىم وتە جاقسى بىلەدى. ويتكەنى، ولاردىڭ ءوزى اقىننىڭ وسىناۋ كوركەمدىك الەمىنە شىنايى ءتانتى بولعانى سونشا، اقىن فاريزانى - ۇنەمى پوەزيا پاتشايىمى عوي دەپ ەركەلەتەدى.
كوزى تىرىسىندە اڭىزدىڭ اقيقاتقا، اقيقاتتىڭ اڭىزعا اينالعان ناقتى ءبىر كورىنىسى دە وسىندا ەمەس پە! اسىلى، مىناداي:
بىلمەيمىن:
جانارىڭنان سىر ۇقتىم با،
الدە ءوزىمدى سول ساتتە ۇمىتتىم با -
ءوزىڭ بولدىڭ ايتەۋىر بۇل كۇنگى ءانىم،
كوتەرىپ اپ كەتىپ ەڭ - بۇلقىنبادىم -
الدە ايمالاۋىڭا قۇنىقتىم با.
بىلمەيمىن:
قۇشاعىڭدا ءدىر ەتتىم بە،
الىپ- ۇشىپ بارا ما-اۋ جۇرەك مۇلدە...
ويلاعىم دا كەلمەدى ەشتەڭەنى،
كۇندىز بە الدە، بىلمەيمىن، كەشتە مە ەدى -
تەك ۇققانىم - جان بىرگە، تىلەك بىرگە.
بىلمەيمىن:
پاك سەزىمگە مۇقتاجداۋ كەزىم بە ەدى،
سەنىمىڭدى كوپ بولعان سەزىنگەلى.
سەزىنگەلى، سەنى ويلاپ، كوز ىلگەلى...
ىڭكارلىقتان، اياۋلىم، تىنا كورمە،
باقىت دەگەن ساتتەردەن تۇرا ما الدە؟
وندا ءوتىپ كەتپەگەي تەز ىلگەرى.
سول ساتتە
بۇلتتى اسپاننان جارق ەتىپ قارادى اق كۇن،
شۋاعىنا بويىمدى ارالاتتىم.
سەزىمىمنىڭ قاقپاسىن دارا قاقتىڭ.
ەلجىرەسىپ، ۇعىسىپ، سەنىپ بىرگە
اعىل- تەگىل سەزىممەن ەرىتتىڭ دە،
ءوزىڭ ماعان ءوزىم بوپ بارا جاتتىڭ.
نەمەسە:
بىلەمىن:
سۇيەم سۇيسەم ايتەۋىر قۇلاپ- تالىپ،
دۇنيەنىڭ بارلىعى جىراق قالىپ.
سەنى مەن مەن تۇسىنەر جاي تۋرالى
كورگەنىم جوق ەشكىمگە سىر اقتارىپ.
سەنى اڭسايمىن كوزىمنەن جاس اعىلا،
كوبەيدى عوي بۇل كۇندە شاش اعى دا.
سىر اشپايمىن ەش جانعا. شاعىنعاندا
بىرەۋ سەنىڭ ورنىڭدى باسادى ما…
سەزىم قولدان
ەشقاشان جاسالمايدى،
جاساعاندار ۇزاققا اسا المايدى. -
نە الداسىپ ءبىر- ءبىرىن كۇن كەشەدى،
مەن وندايعا كونبەسىم قاشان دا ايگى.
مەن سوندايمىن.
سۇيسەم ەگەر عۇمىرلىق ءسۇيىپ كەتەم،
باسقالارعا جۇرەگىم تۇيىق مەكەن.
الاسارسام، ەشكىمگە ۇقسامايتىن
سەزىمىممەن كوڭىلدى بيىكتەتەم، - دەگەن ليريكالىق ولەڭدەردى تۋدىرعان اقىننىڭ دۇربەلەڭى دە، ءدۇمپۋى دە جەتىپ ارتىلاتىن وسىناۋ ومىردە اڭىزعا اينالماۋى، سۇيىسپەنشىلىككە بولەنبەۋى، پوەزيا پاتشايىمىنىڭ تەك وزىنە بۇيىرعان باسىرە تاعىنا كوتەرىلمەۋى مۇمكىن ەمەس قوي!
ادام جان- دۇنيەسىنىڭ، اسىرەسە ايەل جان- دۇنيەسىنىڭ بۇكىل بولمىسى ءبىز سانالى تۇردە تولىق كەلتىرگەن وسىناۋ ەكى ولەڭدە قانشاما شىنشىلدىقپەن، قانشاما تەرەڭدىكپەن، قانشاما وسالدىقپەن، قانشاما نازىكتىكپەن، قانشاما ورشىلدىكپەن، قانشاما قايسار- جىگەرمەن، قانشاما ىنتىزار، قانشاما ۇمىتشەڭ، قانشاما كۇرەسكەر شابىتپەن بەرىلگەن، جىرلانعان دەسەڭشى!
اقىن فاريزانىڭ قازاق پوەزياسىنا اكەلگەن شىنايى دا توسىن جاڭالىعى، وزىندىك دەربەس پوەتيكالىق قولتاڭباسى - وسىناۋ ليريكالىق تۋىندىلاردىڭ بۇكپەسىز اقتارىلا ءبىلۋ، بۇكپەسىز سىرلاسا ءبىلۋ، بۇكپەسىز سەنىم ارتا وتىرىپ، بۇكپەسىز سەندىرە ءبىلۋ قۇدىرەتىندە - تالانت سيقىرىندا جاتىر دەپ بىلەمىز. ءارى قاتقىل، ءارى وتكىر، ءارى اساۋ، ءارى مويىنسۇنا وتىرىپ - ءارى ايالاپ، ءارى ماپەلەپ، ءارى جۇباتىپ، ءارى جىگەرلەندىرىپ وتىرىپ سەنىڭ ادامدىق بولمىسىڭدى، تاعدىرىڭدى، ءىس- ارەكەت، وي- پيعىلىڭدى، باستان كەشكەنىڭ مەن تىرشىلىكتەن كۇتەرىڭدى، ياعني ءبارى- ءبارىن ءبىر قاۋىزعا تاماشا سىيدىرىپ، ءبىر دانگە عاجاپ ءسىڭىرتىپ، دارىتىپ كورسەتە بىلۋىندە جاتىر.
اقىندىق شەبەرلىك پەن قۇدىرەتتىڭ تامىرى دا، ءنارى دە، قۇپياسى دا، كىلتى دە - فاريزا ولەڭدەرىنىڭ ءوز ءونبويىندا وزگەشە ءبىر كەلىسىممەن كورىنىس تاۋىپ جاتۋىندا.
وسىدان بولسا كەرەك، اعىلشىننىڭ ءۇلى اقىنى دجون دوننىڭ: «مالو نازۆات چەلوۆەكا مالىم ميروم. چەلوۆەك سوستويت يز بولشەگو چيسلا چاستەي، چەم مير» - دەۋىنىڭ كوكەيگە كونا كەتەتىنىن اقىن فاريزا ولەڭدەرى مەيلىنشە ادەمى دالەلدەپ بەرە الادى. جوعارىداعى ءۇش ولەڭ وسىنى كورسەتەدى.
اقىن فاريزا ءوز ولەڭدەرى ارقىلى قازاق ليريكاسىندا كۇنى كەشەگە دەيىن سارتاپ بولعان بايانداۋشىلىق، تىزبەلەۋشىلىك مونولوگقا سۇيەنگەن اۆتورلىق «مەننىڭ» - ليريكالىق كەيىپكەردىڭ ءورىسىن تارىلتىپ، ورەسىن تومەندەتىپ، ەستەتيكانىڭ قاراجاياۋ كريتەريلەرىن تاس- تالقان ەتتى.
اقىن فاريزا ءوز ولەڭدەرى ارقىلى قازاق پوەزياسىنا مۇقاعالي ماقاتايەۆ، تولەگەن ايبەرگەنوۆ، جۇمەكەن ناجىمەدەنوۆ، قادىر مىرزاليەۆ، تۇمانباي مولداعاليەۆتىڭ بۋىنى باتىل اكەلگەن دراماتيزم مەن تراگيزمگە تولى ليريكالىق اۋەندى، فيلوسوفيانى ودان سايىن بايىتا ءتۇستى. ول ءوزىنىڭ دەربەس كوركەمدىك الەمىمەن سولاردىڭ قالقاسىندا، تاساسىندا، ىعىندا قالىپ قويعان جوق. وي ورمانى مەن سەزىم سەلىنىڭ شىعارماشىلىق ىقپالىنا مالتىعىپ قالىپ، تۇنشىققان دا ەمەس. ارىپتەس اعالارىنىڭ وكشەسىن باسا ءجۇرىپ، ولەڭدەگى ءوز ولكەسىن تاۋىپ، ءوز كۇمبەزىن تۇرعىزىپ، ءوز كوركەمدىك الەمىن وقىرماندارىنا تاماشا كورسەتتى، تاماشا مويىنداتتى، ءارى تابىندىردى. قازاق پوەزياسىنىڭ ءبىر انتەيى - ءابدىلدا تاجىبايەۆتىڭ كەزىندە فاريزا ولەڭدەرى تۋراسىندا جازعان ماقالاسىن وقىساڭىز، بۇعان كوزىڭىز جەتە تۇسەدى.
سوندىقتان شىعار، اڭىزعا اينالعان اقىن فاريزا وڭعارسىنوۆا ءوزىنىڭ پوەزيا پاتشايىمى اتتى رۋحاني تاعى مەن ءتاجىن لايىقتى تۇردە زاڭدى الىپ وتىر دەيمىز. ويتكەنى، ۇلى مۇقاعالي ماقاتايەۆ:
فاريزا، فاريزا اقىن، فاريزا قىز!
دۇنيەدە اقىنداردىڭ ءبارى جالعىز، - دەپ بەكەر ايتپاعان. بۇل جولداردىڭ ومىرلىك تيەسىلى ناقتى اقيقاتى دا استە كۇدىك تۋدىرمايدى.
ەلىن سۇيمەگەندەردەن،
جەرىن سۇيمەگەندەردەن،
ءوزىن تۋعان حالقىنىڭ
جانىن ۇقپاعانداردان،
اندەي تەرەڭ مۇڭىمدى،
ءسۇتىن ەمگەن ءتىلىمدى
سەزىپ بىلمەگەندەردەن
جانىم جىلاپ، سەندەلگەم، - دەگەن اقىن فاريزانىڭ ەندى بىردە:
ەرتەڭدەردى، جەردى ويلاپ،
ادامدى ويلاپ، ەلدى ويلاپ؛
جەر كۇرسىنسە كوز ىلمەي،
جانى اۋىرعان وزىمدەي،
كۇنمەن بىرگە كۇلمەسەم،
مەن وسىلاي جۇرمەس ەم،
ونەر دەرتىن بىلمەس ەم! -
دەۋىندە قانشاما شىندىق، قانشاما ماقسات، قانشاما قۋات، قانشاما پارىز جۇگى جاتىر! فاريزا اقىن كەمەل ليريكالىق تۋىندىلارىن، مەنىڭشە، ءوزىنىڭ بويىنا جاراتىلىسىنان سىڭىرگەن، ءارى ءتول ۇرپاعى رەتىندە مۇراگەرلىك ەتىپ، تىرشىلىگىندە جالعاستىرىپ كەلە جاتقان انا ماحابباتىمەن، ياعني ايەل زاتىنىڭ پەشەنەسىنە ىرىس- نەسىبە رەتىندە ءتاڭىرى ءوزى سىيلاعان انالىق ماحابباتپەن جازعاندىقتان پوەزيا پاتشايىمىنا اينالىپ وتىر دەگەن پىكىرىمىزدى مەيلىنشە مەنشىكتەپ، مەيلىنشە قاداپ ايتۋعا، مەيلىنشە ماقتانىش تۇتىپ ايتۋعا ءبىر وقىرمانى رەتىندە قۇقىمىز بار دەپ بىلەمىز.
بۇعان پوەزيا پاتشايىمىنىڭ - مەملەكەتتىك سىيلىقتىڭ لاۋرەاتى، حالىق جازۋشىسى، قوعام قايراتكەرى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، كورنەكتى اقىن فاريزا وڭعارسىنوۆانىڭ شىرقاۋ كوركەمدىك الەمى ناقتى دالەل.
سايلاۋبەك جۇمابەك
2000 ج.
