ازاماتتاردىڭ شىعىندارى زاڭدى تابىسىنان نەگىزسىز اسىپ كەتكەندە قانداي شارالار قابىلدانادى

نۇر-سۇلتان. قازاقپارات - بۇگىن ءماجىلىستىڭ جالپى وتىرىسىندا سىبايلاس جەمقورلىققا قارسى ءىس-قيمىل ماسەلەلەرىنە قاتىستى زاڭ جوباسىن ءبىرىنشى وقىلىمدا تالقىلاۋ كەزىندە قۇجاتتىڭ نەگىزگى باعىتتارى ءتۇسىندىرىلدى، دەپ حابارلايدى قازاقپارات ءتىلشىسى.

«ءبىرىنشىسى - زاڭسىز بايۋعا جاۋاپتىلىق قاراستىرۋ. ۇسىنىلىپ وتىرعان نورما - جەمقورلىققا قارسى ءىس- قيمىل جۇيەسىنىڭ نەگىزگى ىرگەتاسى دەپ اتاۋعا بولادى. ويتكەنى، جاسىراتىنى جوق، جەمقورلىقتىڭ ارقاسىندا دۇنيە جيناپ، ولاردى باسقالارعا تىركەپ، اكتيۆتەردى جاسىرۋ سحەماسى بارىنە ءمالىم. ال، وسى جاسىرىن بايلىققا زاڭسىز جولمەن يە بولعانىن دالەلدەۋ وڭاي ەمەس. سوندىقتان، ازاماتتاردىڭ شىعىندارى زاڭدى تابىسىنان نەگىزسىز اسىپ كەتسە، ءتيىستى شارالار قابىلداۋ قاجەت»، - دەدى ق ر سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى مارات احمەتجانوۆ.

ونىڭ ايتۋىنشا، وسىعان بايلانىستى، قولدانىستاعى زاڭمانامادا كوزدەلگەن 10 پايىزدىق جەكە تابىس سالىعىنان باسقا، مەملەكەتتىك قىزمەتشىلەردىڭ جاۋاپكەرشىلىگىن كۇشەيتۋ ۇسىنىلدى.

«اتاپ ايتقاندا، شەنەۋنىكتەردىڭ شىعىستارى مەن تابىستارىنىڭ ايىرماشىلىعى 1000 ايلىق كورسەتكىشتەن اسىپ تۇسسە فيسكالدىق سانكسيا قارالادى. ياعني ايىرماشىلىق سوماسىنىڭ 90 پايىزى اكىمشىلىك ايىپپۇل رەتىندە تاركىلەنەدى. دەگەنمەن ءاربىر جاعدايدا شىعىنداردىڭ زاڭدىلىعىن تۇسىندىرۋگە بارىنە مۇمكىندىك بەرىلەدى. ال ەگەر سول ايىرماشىلىق جىلدىق تابىستان اسىپ جاتسا جانە ونىڭ قايدان شىققانىن تۇسىندىرە الماسا، مانساپتىق جازا قارالادى. ول دەگەنىمىز - مەملەكەتتىك قىزمەتتەن ءۇش جىلعا تەرىس سەبەپتەرمەن بوساتىلادى»، - دەدى اگەنتتىك باسشىسى.

«جالپى، نەگىزسىز بايۋعا جاۋاپكەرشىلىك ەنگىزۋ - دەكلاراتسيانىڭ قيسىندى جالعاسى. وزدەرىڭىز بىلەسىز، دەكلاراتسيا تاپسىرۋ مەرزىمى كەزەڭدەرگە بولىنگەن. ءبىرىنشى كەزەڭدە - مەملەكەتتىك قىزمەتشىلەر. ولار بىلتىر كىرىستەرىن كورسەتتى. ەندى تابىستارى مەن شىعىستارىن سالىستىرۋ باستالادى. ەكىنشى كەزەڭدە - 2023-2024 -جىلدار: مەملەكەتتىك مەكەمەلەر مەن كۆازيسەكتوردىڭ قىزمەتكەرلەرى. ءۇشىنشى كەزەڭدە - 2024-2025 -جىلدار: زاڭدى تۇلعالاردىڭ باسشىلارى مەن قۇرىلتايشىلارى. سوڭعى كەزەڭ - 2025-2026 -جىلدارى دەكلاراتسيانى قالعان ازاماتتاردىڭ بارلىعى تاپسىرادى. سودان كەيىن عانا بارشا حالىقتىڭ اكتيۆتەرى مەن مۇلكى تۋرالى بەلگىلى بولادى. جاۋاپتىلىق تۋرالى نورما قولدانىسقا ەنەدى»، - دەدى م. احمەتجانوۆ.

وسى ورايدا ول ۇسىنىلعان شارا حالىقارالىق ستاندارت ەكەنىن، ب ۇ ۇ كوررۋپتسياعا قارسى كونۆەنسياسىنىڭ نەگىزگى تالابى بولىپ سانالاتىنىن جەتكىزدى.