ۇ ب ت تاپسىرۋ ءتارتىبى وزگەردى

نۇر-سۇلتان. قازاقپارات - ق ر ءبىلىم جانە عىلىم ءمينيسترىنىڭ ۇلتتىق ءبىرىڭعاي تەستىلەۋدى (ۇ ب ت) وتكىزۋ تارتىبىنە وزگەرىس ەنگىزەتىن بۇيرىعى شىقتى، دەپ حابارلايدى قازاقپارات ءتىلشىسى.

قۇجاتتىڭ جاڭاشىلدىعى ۇ ب ت- عا قاتىسۋ تۋرالى ءوتىنىش بەرۋ جانە ۇ ب ت وتكىزۋ مەرزىمدەرىن قامتيتىنىندا. سونداي- اق، تەست تاپسىرۋشىنىڭ سىناققا كىرگەن كەزدە وزىمەن بىرگە الىپ كىرۋىنە تىيىم سالىناتىن زاتتاردىڭ قاتارى كوبەيىپ وتىر.

ولار: - موبيلدى بايلانىس قۇرالدارى (ۇيالى تەلەفوندار، پلانشەتتەر، iPad (Ipad)، iPod (iPod)، سمارتفوندار، راتسيالار؛

- نوۋتبۋكتەر، پلەيەرلەر، مودەمدەر (موبيلدى مارشرۋتيزاتورلار)؛

- سمارت ساعات، سىمدى قۇلاققاپتار، سىمسىز، ميكرو قۇلاققاپتار، سىمسىز بەينەكامەرالار، GPS (جيپيەس) ناۆيگاتورلار، GPS (جيپيەس) ترەكەرلەر، قاشىقتان باسقارۋ قۇرالدارى جانە باسقا اقپارات الماسۋ قۇرىلعىلارى. وسى تالاپتاردى ورىنداپ تەستىلەۋ ورنىنا كىرگەننەن كەيىن مىنا ارەكەتتەر ارقىلى سىناق تاپسىرۋ قاجەت:

- تەستىلەۋ جۇيەسىنە كىرۋ ءۇشىن لوگين مەن پارولدى كورسەتۋ؛

- كومپيۋتەرگە ورناتىلعان الدىڭعى كامەرالار ارقىلى ادام بەتىنىڭ كولەمدىك- كەڭىستىكتىك فورماسىن اۆتوريزاتسيالاۋدان ءوتۋ؛

- «ۇ ب ت تەستىلەۋ» ينتەرفەيسىن اشۋ؛

- تەست تاپسىراتىن ءتىدىن تاڭداۋ، (!!!بۇل رەتتە تەستىلەۋ باستالعاننان كەيىن تەستىلەۋدى تاپسىرۋ ءتىلى وزگەرمەيدى)؛

- بەيىندىك پاندەر كومبيناتسياسىن تاڭداپ، دۇرىس تاڭداۋدى راستاڭىز؛

- ۇ ب ت تاپسىرۋعا كىرىسۋ. تەست تاپسىرۋشى اتالمىش جۇيەگە كىرىپ-شىققان سايىن كومپيۋتەردە ورناتىلعان الدىڭعى كامەرالار ارقىلى بەتىنىڭ كولەمدىك- كەڭىستىكتىك نىسانى اۆتوريزاتسيالاپ وتىرادى.

سونداي-اق، ۇ ب ت وتكىزۋ پۋنكتىندە ەلەكتر قۋاتى وشىرىلگەن جاعدايدا نەمەسە تەستىلەۋ جازباسى جۇرگىزىلمەيتىن باسقا دا فورس-ماجورلىق جاعدايلار كەزىندە تەستىلەۋ ۋاقىتشا توقتاتىلادى جانە تەستىلەۋ پروتسەسىن توقتاتا تۇرۋ جانە اۋىستىرۋ تۋرالى اكت جاسالا وتىرىپ، باسقا كۇنگە اۋىستىرىلادى.

ياعني، ۇ ب ت وتكىزۋ قاعيدالارىنىڭ تىزبەسىنە «تەستىلەۋ پروتسەسىن توقتاتا تۇرۋ جانە اۋىستىرۋ تۋرالى اكتىنى» جاساۋدىڭ ۇلگىسى قوسىلىپ وتىر. تەستىلەۋ پروتسەسىن توقتاتا تۇرۋ جانە اۋىستىرۋ تۋرالى اكتىنى تەستىلەۋ اكىمشىسى مەن وڭىرلىك مەملەكەتتىك كوميسسيا بىرلەسىپ جاسايدى. مينيستر بۇيىرىعىنداعى تاعى ءبىر وزگەرىس تەستىلەۋ كەزىندەگى ۇزىلىستەرگە قاتىستى.

اتاپ ايتساق، تەستىلەۋ باستالعاننان 120 مينۋت وتكەن سوڭ بەرىلەتىن ءۇزىلىس 15 مينۋتتان 3 مينۋتقا دەيىن قىسقارتىلدى. كورۋ، ەستۋ، تىرەك- قيمىل اپپاراتىنىڭ فۋنكسيالارى بۇزىلعان مۇقتاجدىعى بار بالالارعا تەستىلەۋ كەزىندە قوسىمشا 40 مينۋت بەرىلەدى. تەستىلەۋدىڭ ادەتتەگى ۇزاقتىعى - 240 مينۋت. بۇيرىقتىڭ تولىق ءماتىنىن مىنا سىلتەمەدەن كورۋگە بولادى.

اۆتور: ەسىمجان ناقتىباي