ەلوردالىقتار ۇيىرمە ساپاسىنا كوڭىلى تولماسا، قايدا حابارلاسۋى كەرەك

نۇر-سۇلتان. قازاقپارات - نۇر-سۇلتان قالاسىندا بالالارعا ارنالعان تەگىن ۇيىرمەلەردىڭ جۇمىس ساپاسىنا قاتىستى ءوتىنىش- تىلەك نەمەسە شاعىم بولسا، ءتيىستى ورگانعا حابارلاۋعا بولادى، دەپ حابارلايدى قازاقپارات ءتىلشىسى.

بۇگىن ەلوردا اكىمدىگىندە بالالار مەن جاسوسپىرىمدەرگە ارنالعان شىعارماشىلىق ۇيىرمەلەر جانە سپورت سەكتسيالارى تاقىرىبىندا ونلاين فورماتتا باسپا ءسوز ءماسليحاتى ءوتتى.

بريفينگتە «تەگىن ۇيىرمەلەر قانشالىقتى ساپالى ۇيىمداستىرىلىپ جاتىر؟ ۇيىرمەلەردىڭ جۇمىسىن كىم قاداعالايدى؟ اتا- انالاردىڭ ايتۋىنشا، تەگىن ۇيىرمەلەر ءتيىستى دەڭگەيدە وتپەيدى»، - دەگەن ساۋال قويىلدى. ساۋالعا نۇر-سۇلتان قالاسى مادەنيەت باسقارماسى مادەني-كوركەم ءىس- شارالاردى ۇيىمداستىرۋ ءبولىمىنىڭ باسشىسى سالتانات مۋكسيموۆا جاۋاپ بەردى.

«ءبىز ءوز بەتىمىزشە ۇيىرمەنىڭ قانشالىقتى ساپالى ءوتىپ جاتقانىن تەكسەرە المايمىز. قۇزىرلى ورگان ەمەسپىز. ءبىراق، مادەنيەت باسقارماسى مەن ۇيىرمەگە جاۋاپتى مەكەمە اراسىندا كەلىسىمشارت بار. سول كەلىسىمشارتتىڭ اياسىندا ۇيىرمە قالاي ءجۇرىپ جاتقانىن قاداعالاي الامىز. ياعني اتا- انالار تاراپىنان ۇيىرمەنى وتكىزۋ بارىسى مەن ساپاسىنا قاتىستى ءوتىنىش- تىلەك نەمەسە شاعىم بولسا، ءبىز ول جاعدايدى انىقتاپ، تەكسەرە الامىز. بىزگە حابارلاسسا بولادى»، - دەدى ول.

سونداي-اق، باسقارما وكىلى ەرەكشە بالالارعا ارنالعان ۇيىرمە جۇمىسى تۋرالى ايتىپ ءوتتى.

«بۇعان دەيىن ايتقانىمداي، ەلوردادا 59 ۇيىرمە ءتۇرى بار. ەرەكشە بالالارعا ارنالعان ۇيىرمە سونىڭ ىشىنە كىرەدى، ءبىز ولاردى ءبولىپ-اجىراتپايمىز. ءۇش سالا بار. ينكليۋزيۆتى، ينتەراكتيۆتى جانە ارنايى. جالپى، ۇيىرمەگە قاتىسۋدا شەكتەۋ جوق»، - دەيدى س. مۋكسيموۆا.

بۇعان دەيىن ەلوردادا 15 مىڭعا جۋىق بالا تەگىن شىعارماشىلىق ۇيىرمەلەرگە قاتىسىپ جۇرگەنىن جازعان بولاتىنبىز.