وكىلەتتىگىن توقتاتقان بەكبولات تىلەۋحان باسقا دەپۋتاتتارعا ءوتىنىش ايتتى

ايتا كەتەيىك، پالاتانىڭ جالپى وتىرىسىندا دەپۋتات بەكبولات تىلەۋحاننىڭ وكىلەتتىگى مەرزىمىنەن بۇرىن توقتاتىلدى. ول مىندەتتەرىن اتقارۋدان ءوز ەركىمەن بوساتۋ تۋرالى ءوتىنىش بەرگەن.

وسى ورايدا ول بۇگىن ءماجىلىس مىنبەرىنەن سويلەگەن سوزىندە جاڭا قىزمەتى بويىنشا ءومىرىنىڭ كەلەسى كەزەڭىنە قادام باسىپ جاتقانىن ايتتى.

«سىزدەرمەن جۇمىس ىستەگەن ءبىر ءساتىم - ءومىرىمنىڭ ءبىر بەلەسى، كەزەڭى، ياعني مەن ءۇشىن باقىتتى جاقسى شاعىم. تايىمدا تانىپ، تۇلپارداي قىلىپ توپقا قوسقان اۋەلى ەلباسىنا راحمەت. نۇراعامىزدىڭ باستاعان جولىن ارى قاراي جالعاستىرىپ جاتقان مەملەكەت باسشىمىز قاسىم-جومارت كەمەل ۇلىنىڭ قامقورلىعىنا، جاساپ جاتقان ماراپاتتارىنا شەكسىز العىسىمدى بىلدىرەمىن. پارلامەنت قابىرعاسىنداعى ءومىرىم وتە ءبىر ءساتتى كەزەڭ دەپ بىلەمىن. ەندى، قاي جەردە ەلگە، مەملەكەتكە پايدام كوبىرەك تيەدى، سول جەردە بولعاندى مىندەت دەپ تانىعاندىقتان، ءومىردىڭ كەلەسى كەزەڭىنە قادام باسىپ جاتىرمىن. ءبىراز جۇمىس ىستەدىك، ارتىق ايتقان ءسوزىمىز بولسا، جازا باسقان جەرىمىز بولسا، كەيبىر ارىپتەستەرىمنەن كەشىرىم سۇرايمىن، عافۋ وتىنەمىن»، - دەدى ب. تىلەۋحان.

سونىمەن قاتار ول پارلامەنت دەپۋتاتتارىنا ءوز ءوتىنىشىن جەتكىزدى.

«قازاق دەيتىن ۇلتتىڭ ءتىلىنىڭ، مادەنيەتىنىڭ، تاريحىنىڭ، عىلىمىنىڭ، رۋحانياتىنىڭ، سالت- ءداستۇرىنىڭ قازاقستان رەسپۋبليكاسىنان باسقا بارار جەرى، باسار تاۋى جوق، باسقا داميتىن جەرى جوق. قازاق - ول شابۋىلشى جۇرت ەمەس، قورعانۋشى جۇرت، تاريحتا ەسەسى كەتكەن جۇرت. وسى نارسە ەستەرىڭىزدە بولىپ، پاراسات كوزدەرىڭىز تاريحي سانامەن، مەملەكەتشىلدىك ويمەن ءارقاشان جۇرەكتەرىڭىزدىڭ تۇكپىرىندە تۇرسا ەكەن دەگەن ءوتىنىشىم بار. مۇنى دەپۋتات رەتىندە ەمەس، سايلاۋشى رەتىندە ايتىپ وتىرمىن. ىستەرىڭىزگە بەرەكە تىلەيمىن»، - دەدى بەكبولات تىلەۋحان. بۇدان بۇرىن حابارلانعانداي، ەكس-دەپۋتات بۇكىلالەمدىك ەتنوسپورت كونفەدەراتسياسىنىڭ ءبىرىنشى ۆيتسە-پرەزيدەنتى بولىپ تاعايىندالدى.

اۆتور: رۋسلان عابباسوۆ