سەنات ءتوراعاسى: بيىل كۇللى تۇركى الەمى ءۇشىن ايرىقشا مەرەيلى جىل
نۇر-سۇلتان. قازاقپارات - ەلورداداعى ۇلتتىق اكادەميالىق كىتاپحانادا ءوتىپ جاتقان «شىعىستىڭ شوقجۇلدىزدارى» اتتى حالىقارالىق كونفەرەنتسيادا كونە تۇركى تىلىندەگى قۇران كىتابى تانىستىرىلدى، دەپ حابارلايدى قازاقپارات ءتىلشىسى.
«بيىل كۇللى تۇركى الەمى ءۇشىن ايرىقشا مەرەيلى جىل. سەبەبى، ادامزاتتىڭ اقىل- وي قازىناسىنا ولشەۋسىز ۇلەس قوسقان ۇلى تۇلعالارىمىزدىڭ مەرەيتويى قاتار كەلىپ وتىر. ولاردىڭ قاتارىندا تۇركى حالىقتارىنىڭ ماقتانىشى، ازەربايجاننىڭ دانىشپان شايىرى نيزامي گانجاۋيدىڭ تۋعانىنا 880 جىل تولدى. بيىل ابىز اقىن، ۇلى ويشىل، وزبەك حالقىنىڭ عۇلاماسى الىشەر ناۋايدىڭ تۋعانىنا 580 جىل، ال جىر الىبى جامبىلدىڭ دۇنيەگە كەلگەنىنە 175 جىل. سونىمەن قاتار، ۇلى ويشىل اقىن يۋنۋس ەمرەنىڭ دۇنيەدەن وتكەنىنە 700 جىل تولىپ وتىر»، - دەگەن سەنات ءتوراعاسى بۇل اتاۋلى داتالاردى باۋىرلاس ەلدەردە جوعارى دەڭگەيدە اتاپ وتكەنىن ەسكە الدى.
ماۋلەن اشىمبايەۆ حالىقارالىق تۇركى اكادەمياسىنىڭ باستاماسىمەن نيزاميدىڭ داستاندارى قازاق تىلىنە، ناۋايدىڭ جىرلارى قازاق جانە ازەربايجان تىلدەرىنە اۋدارىلىپ، باسىلعانىن اتادى.
«بۇگىن سونىمەن قاتار يۋنۋس ەمرەنىڭ جىرلارى انا تىلىمىزگە تولىق اۋدارىلىپ، العاش رەت قازاق وقىرماندارىنا جول تارتىپ وتىر. وسى رەتتە اتالعان تۋىندىلاردى اۋدارعان قازاقتىڭ كورنەكتى اقىندارى نەسىپبەك ايت ۇلىنا، سۆەتقالي سابىرعالي ۇلىنا، عالىم ءتورالى قىدىرعا جانە فيلولوگيا عىلىمدارىنىڭ دوكتورى، پروفەسسور، ازەربايجاننان كەلگەن مەيمانىمىز راميز اسكەرگە العىسىمىزدى بىلدىرەمىز»، - دەدى سەنات سپيكەرى.
