التىن توبىلعى ادەبي بايقاۋىنىڭ جەڭىمپازدارى بەلگىلى بولدى

نۇر- سۇلتان. قازاقپارات - «التىن توبىلعى» رەسپۋبليكالىق ادەبي بايقاۋىنىڭ جەڭىمپازدارى انىقتالدى، دەپ حابارلايدى قازاقپارات.

ەلىمىزدە ادەبي سالادا قابىلەتىن كورسەتكەن شىعارماشىلىق دارىندى جاستار از ەمەس. بۇعان «التىن توبىلعى» رەسپۋبليكالىق بايقاۋىنىڭ قورىتىندىسى دالەل. بيىل جەتىنشى رەت وتكىزىلگەن سايىسقا جاس اقىندار مەن جازۋشىلاردىڭ 156 شىعارماسى ۇسىنىلدى. بۇل زاماناۋي كونكۋرس قازاقستاندىق ادەبيەتتى دامىتۋعا، جاس قالامگەرلەردى قولداۋ مەن شىعارماشىلىعىن ناسيحاتتاۋعا باعىتتالعان. قاتىسۋشىلار بەس نوميناتسيانىڭ ءبىرىنىڭ جەڭىمپازى اتانۋعا بارىن سالدى.

«التىن توبىلعى» بايقاۋى جىل سايىن ەلىمىزدىڭ بارلىق وڭىرىنەن دارىندى ادەبيەتشىلەردى انىقتايدى. بۇل شىعارماشىلىق جاستارعا قاجەتتى ەڭ سۇرانىسقا يە جوبانىڭ ءبىرى. قاتىسۋشىلار ەڭبەگىندە حالىقتىڭ قۇندىلىعىن، تاريحىن، مادەنيەتىن، ادامگەرشىلىك قاسيەتىن، تاۋەلسىزدىك كەزىندەگى قازاقستاندىقتاردىڭ جەتىستىگىن، ەگەمەن قازاقستاننىڭ دامۋىنداعى تۇڭعىش پرەزيدەنتتىڭ ءرولىن كورسەتتى. بايقاۋعا قاتىسىپ، قىزىقتى دۇنيەلەر كورسەتكەنى ءۇشىن ءاربىر اۆتورعا العىس ايتامىز. سىزدەردىڭ ەڭبەگىڭىز زاماناۋي ادەبيەتتى وقۋعا، رۋحاني قۇندىلىقتاردى نىعايتۋعا دەگەن قىزىعۋشىلىقتىڭ ارتۋىنا ىقپال ەتەدى»، - دەپ ەرەكشە اتاپ ءوتتى نۇرسۇلتان نازاربايەۆ قورى اتقارۋشى ديرەكتورىنىڭ ورىنباسارى الكەي مارعۇلان ۇلى.

بايقاۋ جەڭىمپازدارى: - «جىلدىڭ ۇزدىك پروزاسى» نوميناتسياسى ءجاميلا ابدۋللايەۆا («ۇيات، قىزىم!» رومانى)؛

- «جىلدىڭ ۇزدىك پوەزياسى» - دۇيسەنالى ءالىماقىن («كۇزگى كەشتە گۇل ەسىنەر»)؛

- «جىلدىڭ ۇزدىك دراماتۋرگياسى» - الىشەر ايتۋار («يلليۋزيا»)؛

- «جىلدىڭ بالالارعا ارنالعان ۇزدىك شىعارماسى» - جادىرا بايبۇلانوۆا («اشەكەي»)؛

- «قازاقستان تاۋەلسىزدىگىنىڭ 30 جىلدىعىنا ارنالعان ۇزدىك تۋىندى» - شاپاعات ءابدىر ۇلى.

«قازاقستان تاۋەلسىزدىگىنىڭ 30 جىلدىعىنا ارنالعان ۇزدىك تۋىندى» نوميناتسيا يەسى 3 ميلليون تەڭگە، ال قالعان جەڭىمپازدارعا 2 ميلليون تەڭگە تابىس ەتىلدى.