نۇرسۇلتان نازاربايەۆ حالقىمىزدىڭ ۇلى پەرزەنتى ەكەنىن دالەلدەدى – پرەزيدەنت

نۇر- سۇلتان. قازاقپارات - تاۋەلسىزدىك جىلدارىنىڭ العاشقى سىناقتارىنان قازاق حالقى دارا باسشىلىعىمەن سۇرىنبەي ءوتتى.

بۇل تۋرالى پرەزيدەنت قاسىم- جومارت توقايەۆ ق ر تاۋەلسىزدىگىنىڭ 30 جىلدىعىنا وراي سالتاناتتى جيىندا ايتتى، دەپ حابارلايدى قازاقپارات.

«ەلباسى ءوزىنىڭ ءبىر سۇحباتىندا ازاتتىقتىڭ العاشقى اسەرىن ەسكە العانى بار. وندا جۇرتتىڭ ءبارى ءبارى ءماز- مەيرام بولىپ جاتتى. مەنىڭ دە قۋانىشىمدا شەك جوق ەدى. ءبىراق قاتتى قوبالجىدىم. ويتكەنى ءارى قاراي نە بولارىنا الاڭداۋلى ەدىم» دەگەن بولاتىن. بۇل ءشۇباسىز اقيقات. ەلباسى ايتقانداي، تاۋەلسىزدىكتى الۋ ءبىر باسقا، ونى ساقتاپ قالۋ ءبىر باسقا. پرەزيدەنتتىڭ الدىندا جاڭا مەملەكەت قۇرۋ مىندەتى تۇردى»، - دەگەن مەملەكەت باسشىسى ەلباسىنىڭ الدىندا وزىنە سەنىم ارتقان حالىقتى قيىندىقتان الىپ شىعۋى مىندەتى تۇرعانىن ەسكە الدى.

«ەلدەگى سان ءتۇرلى ماسەلەنى شەشۋدىڭ باستى جاۋاپكەرشىلىگى مەملەكەت باسشىسىنا جۇكتەلدى. سونىڭ ءبارىن تۇڭعىش پرەزيدەنتىمىز ابىرويمەن ەڭسەرە ءبىلدى. تۇپتەپ كەلگەندە نۇرسۇلتان ءابىش ۇلى نازاربايەۆ حالقىمىزدىڭ ۇلى پەرزەنتى ەكەنىن ءوز ەڭبەگى ارقىلى تولىق دالەلدەدى. جۇرتىمىزدىڭ ونىڭ دارا باسشىلىعىمەن كەدەرگىنىڭ بارىنەن سۇرىنبەي ءوتتى. بۇگىنگى مەرەيلى مەملەكەتىمىز - ەلباسىمىزدىڭ ەرەن ەڭبەگىنىڭ جەمىسى»، - دەدى قاسىم- جومارت توقايەۆ.

پرەزيدەنت قاسىم- جومارت توقايەۆ سالتاناتتى جيىندا ەلباسىنىڭ الەم تاريحىنداعى ورنى تۋرالى وي قوزعادى.

«ول تاۋەلسىز قازاقستاننىڭ نەگىزىن قالاعان تۇلعا رەتىندە الەم تاريحىنان ماڭگى ورىن الادى. تۇڭعىش پرەزيدەنتىمىز - جاھان جۇرتىنىڭ الدىندا ۇلت مۇددەسىن قورعاي بىلگەن كورەگەن ساياساتكەر، قيىننان قيىستىرىپ توسىن شەشىمدەر قابىلداي الاتىن جاسامپاز رەفورماتور. وسىنداي بىرەگەي قاسيەتتىڭ ءبارى بويىنا توعىسقان ءبىرتۋار تۇلعاسى بار قازاق باقىتتى حالىق»، - دەدى مەملەكەت باسشىسى.

ونىڭ ايتۋىنشا، تاۋەلسىزدىك كۇنى - قازاق حالقىنىڭ ءوز مەملەكەتتىلىگى ءۇشىن جۇرگىزگەن كوپ عاسىرلىق كۇرەسىنىڭ ناتيجەسى، حالىق تاباندىلىعىنىڭ، بولاشاققا دەگەن جارقىن ۇمتىلىستارىنىڭ جارقىن كورىنىسى.

«تاۋەلسىزدىك بىزگە سىيلىق رەتىندە نەمەسە كەزدەيسوق كەلگەن جوق. تاۋەلسىزدىك قۇندىلىقتارى ۇلت تاريحىنىڭ كوپتەگەن عاسىرلىق شەجىرەسىنەن قالىپتاستى. ءبىزدىڭ حالقىمىز ءارقاشان مەملەكەتتىلىك يدەياسىنا مۇقيات قارادى، ويتكەنى تاۋەلسىز مەملەكەتى بار ۇلت تاريحي تۇرعىدان تابىستى ۇلت دەپ سانالادى. ويتكەنى ول دامۋ جولىن ءوزى تاڭدايدى»، - دەدى پەرزيدەنت.

اۆتور: ەسىمجان ناقتىباي