وتاندىق تەلەارنالار قازاقستان مەن بەلگيا ىنتىماقتاستىعى تۋرالى دەرەكتى فيلمدى كورسەتەدى

نۇر- سۇلتان. قازاقپارات – ق ر پرەزيدەنتىنىڭ تەلەراديوكەشەنى مەملەكەت باسشىسى قاسىم- جومارت توقايەۆتىڭ بەلگياعا ساپارى قورىتىندىسىنا ارنالعان «قازاقستان مەن بەلگيا: ديالوگ فورماتىندا» دەرەكتى فيلمىنىڭ كورسەتىلەتىندىگىن جاريا ەتتى، دەپ حابارلايدى قازاقپارات ءتىلشىسى.

«دەرەكتى فيلمدە قازاقستان پرەزيدەنتىنىڭ بەلگيا كورولدىگىنە رەسمي ساپارى جايىندا باياندالادى. فيلمدە ەكىجاقتى دەڭگەيدە، سونىمەن قاتار ىنتىماقتاستىق پەن سەرىكتەستىكتى كەڭەيتۋ تۋرالى كەلىسىم اياسىندا ەۋروپالىق وداق دەڭگەيىندە وتكەن كەلىسسوزدەردىڭ قورىتىندىسى كورسەتىلگەن. سونىمەن قاتار فيلمدە ساياسي قايراتكەرلەردىڭ، قازاقستاندىق جانە ەۋروپالىق بيزنەس كوشباسشىلارىنىڭ ەكسكليۋزيۆتى سۇحباتتارى ۇسىنىلادى»، - دەلىنگەن پرەزيدەنت تەلەراديوكەشەنى تاراتقان اقپاراتتا. جاڭا فيلم تاياۋ ۋاقىتتا ەلىمىزدىڭ تەلەارنالارىندا كورسەتىلمەك.

ايتا كەتەيىك، 25-قاراشادا قازاقستان پرەزيدەنتى قاسىم- جومارت توقايەۆتىڭ بەلگياعا رەسمي ساپارى وسى ەلدىڭ كورولى فيليپپەن كەزدەسۋدەن باستالدى.

كەزدەسۋدە مەملەكەت باسشىسى كەلەسى جىلدىڭ قىركۇيەك ايىندا ەلىمىزدە الەمدىك جانە ءداستۇرلى دىندەر كوشباسشىلارىنىڭ VII سەزى وتەتىنىن ايتتى. سول ماڭىزدى ءىس- شاراعا كورول فيليپپ تە قاتىسادى دەپ ۇمىتتەنەتىنىن جەتكىزدى. سونىمەن قاتار قاسىم- جومارت توقايەۆ بەلگيانىڭ پرەمەر- ءمينيسترى الەكساندر دە كروومەن كەلىسسوز جۇرگىزدى. كەزدەسۋ بارىسىندا تاراپتار ساۋدا- ەكونوميكالىق جانە ينۆەستيتسيالىق ىنتىماقتاستىقتى نىعايتۋعا ەرەكشە نازار اۋداردى.