ۆاكسينا العاندار دا ماسكا تاعۋعا مىندەتتى - ايجان ەسماعامبەتوۆا
نۇر-سۇلتان. قازاقپارات - ق ر دەنساۋلىق ساقتاۋ مينيسترلىگى سانيتارلىق- ەپيدەميولوگيالىق باقىلاۋ كوميتەتىنىڭ ءتوراعاسى ايجان ەسماعامبەتوۆا نەلىكتەن ماسكا تاعۋدىڭ ءالى دە مىندەتتى ەكەنىن ءتۇسىندىردى، دەپ حابارلايدى قازاقپارات.
ايجان ەسماعامبەتوۆا «تەك «جاسىل» مارتەبەسى بار ادامدار ساۋدا، ويىن-ساۋىق ورتالىقتارىنا بارا السا، ماسكاسىز جۇرە الا ما؟» دەگەن سۇراققا جاۋاپ بەردى.
«جوق، ماسكا تاعۋ مىندەتتى. ويتكەنى قازىر ۆاكسينا العانداردىڭ دا اۋرۋ جۇقتىراتىنى بەلگىلى بولدى. تيىسىنشە، ول دا قاۋىپتى بولۋى مۇمكىن. دەگەنمەن، ۆاكسينا العاندار وڭايلىقپەن ۆيرۋس جۇقتىرمايدى جانە اۋرۋدى دا جەڭىل وتكەرەدى. ينفەكسيانىڭ تارالۋى از، ءبىراق تارالاتىنى راستالدى. سوندىقتان بۇگىندە الەمدە ەشكىم ماسكادان باس تارتقان جوق. شەكتەۋ مەن الدىن الۋ شارالارى اراسىندا تەڭگەرىم بار»، - دەدى ايجان ەسماعامبەتوۆا ۇكىمەت وتىرىسىنان كەيىن تىلشىلەرگە بەرگەن سۇحباتىندا.
سونىمەن بىرگە جۋرناليستەر قازاقستاندىقتاردىڭ قاشان ماسكادان باس تارتاتىنىن سۇرادى. «مەنىڭشە، ناقتى كۇندى ەشكىم اتاي المايدى. بۇل كوپ فاكتورلى ارەكەتتەردىڭ ناتيجەسى بولادى. ۆيرۋس ءالى دە مۋتاتسيالانىپ جاتىر. مۇندا دا ءارقايسىسىمىزدىڭ ۇلەسىمىز بار. ءبىز نەعۇرلىم باياۋ ۆاكسينا الساق، ۆيرۋستىڭ تارالۋى سوعۇرلىم جەدەلدەيدى جانە مۋتاتسيا مۇمكىندىگى سوعۇرلىم جوعارى بولادى. ال ۆيرۋستىڭ مۋتاتسياسىن بۇگىندە بولجاۋ مۇمكىن ەمەس. د د ۇ ۆيرۋستى قاۋىپتى مۋتاتسيالارعا بولەدى، ولار ءجىتى باقىلاۋدا»، - دەدى كوميتەت ءتوراعاسى.
سپيكەر «مەملەكەت ازاماتتاردى %80 ۆاكسينالاسا، ماسكانى شەشۋگە بولا ما؟» دەگەن سۇراققا دا جاۋاپ بەردى.
«ماسكانى قاشان شەشەتىنىمىزدى ايتا المايمىن. تۇسىنەمىن، ءبارىمىز ماسكا تاعۋدان شارشادىق، ءبىراق وكىنىشكە وراي، بۇل كوروناۆيرۋستان قورعاۋ شارالارىنىڭ ءبىرى»، - دەيدى ايجان ەسماعامبەتوۆا.
اۆتور: ايجان سەرىكجان قىزى
