مىسىردا سۇلتان بەيبارىسقا قاتىستى كونە جادىگەر تابىلدى
نۇر- سۇلتان. قازاقپارات - مىسىردا سۇلتان بەيبارىس مەدرەسەسى قاقپاسىنىڭ ەش جەردە جاريالانباعان سۋرەتى تابىلدى، دەپ حابارلايدى قازاقپارات ءتىلشىسى.
ءسۇيىنشىلى حاباردى قازاقستاننىڭ مىسىرداعى توتەنشە جانە وكىلەتتى ەلشىسى قايرات لاما شاريف Facebook-پاراقشاسىندا جازدى.
«ءسۇيىنشى، اعايىن! سۇلتان بەيبارىس مەدرەسەسىنىڭ اشەكەيلى قاقپاسىنىڭ سۋرەتى تابىلدى. مىسىرلىق ماملۇكتانۋشىلار بۇرىن- سوڭدى الەۋمەتتىك جەلىلەردە جاريالانباعان از- زاحاريا مەدرەسەسى قاقپاسىنىڭ سۋرەتىن تاۋىپ بەردى. وسى ءۇشىن يماد وسمان ماحران باستاعان ماملۇكتانۋشىلارعا جانە مىسىردىڭ كونە ەسكەرتكىشتەر مەن تۋريزم مينيسترلىگىنىڭ قىزمەتكەرلەرىنە شەكسىز العىسىمدى ايتامىن»، - دەپ جازدى ديپلومات.
ەلشىنىڭ ايتۋىنشا، 1262 -جىلى اين جالۇت شايقاسىنان جەڭىسپەن ورالعان سۇلتان بەيبارىس كايردە تەڭدەسى جوق جاڭا ۇلگىدەگى مەدرەسە سالىپ، ونىڭ باس قاقپاسىن كايردىڭ قولونەر شەبەرلەرىنە جاساتقان.
«قاقپانىڭ ماڭدايشاسىندا «موڭعول- تاتار باسقىنشىلارى مەن كرەسشىلەرگە مىسىر جەرىن باستىرماعان ءال- ماليك از- زاھير رۇكن اد- دين بەيبارىس» دەپ جازىلعان. كونە كاير شاھارىنىڭ تورىندە وسىنداي اشەكەيلى جەڭىس قاقپاسىن ورناتقان سۇلتان بەيبارىستىڭ ساۋلەت ونەرىندەگى تالعامى زور بولعانىن ايعاقتايدى»، - دەپ جازدى قايرات لاما شاريف.
اۆتور: ەسىمجان ناقتىباي
