قازاقستانداعى ەڭ ءىرى قارجى پيراميداسىن قۇرعاندار ءىسى سوتقا بەرىلدى
بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ايتتى، دەپ حابارلايدى قازاقپارات.
«وتكەن اپتادا تاۋەلسىز قازاقستان تاريحىنداعى ەڭ ءىرى قارجى پيراميداسى QUESTRA WORLD- دى قۇردى دەپ ايىپتالعاندار ءىسى سوتقا بەرىلدى»، - دەدى ن. وراز اپتالىق بريفينگىدە.
ونىڭ ايتۋىنشا، ءىىم تەرگەۋ- جەدەل توبى وسى قارجى پيراميداسىنىڭ باسشىلارىنا قاتىستى قىلمىستىق ءىس بويىنشا سوتقا دەيىنگى تەرگەۋدى اياقتادى.
«تەرگەۋ بارىسىندا 2016 -جىلدىڭ ناۋرىزىنان 2017 -جىلدىڭ ماۋسىمىنا دەيىن يسپانيا، كابو- ۆەردە جانە رەسەي ازاماتتارى قازاقستان اۋماعىندا QUESTRA WORLD قارجى پيراميداسىن قۇرىپ، ونى قازاقستاندىقتار دا تارتىلعان ترانسۇلتتىق ۇيىمداسقان توپ قۇرامىندا باسقارعانى انىقتالدى. پيراميدا باسشىلارى سالىنعان سومانىڭ %336 دەيىن تابىس تابۋعا كەپىلدىك بەرىپ، سالىمشىلارعا ۆيرتۋالدى ۆاليۋتانى پايدالانۋ ارقىلى 90-نان 500 مىڭ ەۋروعا دەيىنگى ويدان شىعارىلعان ينۆەستيتسيالىق پورتفەلدەر ساتىپ الۋدى ۇسىنعان»، - دەدى نۇردىلدا وراز.
رەسمي وكىلدىڭ ايتۋىنشا، تارتىلعان قاراجات كاسىپكەرلىك قىزمەتتە پايدالانىلماعان، كەيبىر قاتىسۋشىلاردى جاڭا سالىمشىلاردىڭ جارنالارى ەسەبىنەن بايىتا وتىرىپ، ءوز ارالارىندا بولىسكە سالعان. بەلسەندى ءىس- ارەكەت ناتيجەسىندە قارجى پيراميداسىنا قازاقستاننىڭ مىڭداعان ازاماتى تارتىلعان جانە 1 ميلليارد تەڭگەدەن استام شىعىن كەلتىرىلگەن. قىلمىستىق ءىس بويىنشا 4 ادام، ونىڭ ىشىندە بۇرىن بەلارۋستان ەكستراديتسيالانعان رەسەي فەدەراتسياسىنىڭ ازاماتى جاۋاپقا تارتىلدى.
اۆتور: ايجان سەرىكجان قىزى
