قاتەرلى ىسىكتىڭ العاشقى بەلگىلەرى قانداي - ونكولوگتىڭ ەسكەرتۋى

نۇر-سۇلتان. قازاقپارات - قاتەرلى ىسىك (راك) - ادامدى بىلدىرمەي الاتىن اۋرۋ. سول ءۇشىن «اتى جامان اۋرۋ» دەپ كەيدە اتىن اتاماۋدى ءجون كورەمىز.

ەگەر قاتەرلى ىسىكتى اسقىندىرماي (3-شى جانە 4-شى كەزەڭىنە جەتكىزبەي) انىقتاسا، ەمدەۋ وڭاي بولماق. قۇلان-تازا جازىلۋ مۇمكىندىگى جوعارى. ءبىراق ونىڭ العاشقى بەلگىلەرىن قالاي تابامىز، نەدەن كۇدىكتەنەمىز - سول جاعى كۇماندى.

الايدا رەسەيدىڭ ونكولوگ دارىگەرى، مەديتسينا عىلىمدارىنىڭ دوكتورى ميحايل داۆىدوۆتىڭ ايتۋىنشا، راكتىڭ العاشقى بەلگىلەرىن انىقتاۋدىڭ بىرنەشە جولى بار. ەڭ باستىسى - سول بەلگىلەرگە ءمان بەرىپ، دارىگەرگە بارىنشا ەرتە قارالۋ.

«قاتەرلى ىسىكتىڭ بەلگىلەرى باسىندا انىق بولمايدى. ونى باسقا اۋرۋدىڭ بەلگىلەرىمەن شاتاستىرىپ الۋ وڭاي. ىسىك ۇلكەيىپ، مەتاستازعا اينالعاندا عانا بايقاۋىمىز مۇمكىن. دەسە دە، راكتىڭ «العاشقى قوڭىراۋىن« ەستۋدىڭ، سەزىكتەنۋدىڭ جالپى بەلگىلەرى بار. سوعان توقتالايىق»، - دەيدى دوكتور.

ونىڭ ايتۋىنشا، ادام مىنانداي جاعدايدا دارىگەرگە تەز قارالعانى ءجون:

- جوتەل. ۇزاق جوتەلسە. ادام ءبىر ايدان ارتىق جوتەلگەنى - جاقسى ەمەس. جوتەلدىڭ سەبەبى برونحيت نەمەسە تۇماۋ، سول سىندى ماۋسىمدىق اۋرۋلار بولسا، تۇسىنۋگە بولادى. ءبىراق باسقا سەبەبى بولماسا - وندا كۇدىكتەنۋگە تۋرا كەلەدى.

- داۋىس تەمبرى وزگەرسە. داۋىس قىرىلداپ، قارلىعىپ، كەۋدە تۇستان قىسىلىپ شىقسا، كەۋدە جاسۋشالارىنىڭ ءليمفوتۇيىنى بۇزىلعانىنىڭ بەلگىسى. ال بۇل كومەي ىسىگىنىڭ بەلگىسى بولۋى مۇمكىن. سونداي- اق، اۋىز قۋىسىنىڭ ماڭىندا ىسىك، جارا پايدا بولماعان با - سونى دا قاراۋعا كەرەك.

- اسقازاننىڭ اس قورىتۋى بۇزىلسا. ادام ءۇش كۇن بويى اس ىشە الماي، اسقازان ونى سىڭدىرە الماسا، سونداي-اق ءىش ءوتۋ مەن ءىش قاتۋ قاتار جۇرسە - بۇل توق ىشەكتىڭ ونكولوگياسىنان حابار بەرۋى مۇمكىن. ۇلكەن دارەتتە قاننىڭ (قىزارعان نە قارايعان) ءىزى بولسا شۇعىل اۋرۋحاناعا قارالعان ابزال. دارىگەرلەر كولونوسكوپيا جاساپ، ىشەك قۇرىلىسىن تەكسەرەدى.

دارىگەردىڭ ايتۋىنشا، 40-45 جاستان اسقان جاندارعا جىلىنا ءبىر رەت كولونوسكوپيا جاساتقانى ءجون. ويتكەنى بۇل - توق ىشەك ىسىگىن انىقتاۋدىڭ بىردەن- ءبىر جولى.

- دارەت سىندىرۋ جيىلەسە ءارى قيىنداسا. دارەتتە قاننىڭ ءىزى بايقالسا. بۇل - ينفەكتسيالىق اۋرۋدىڭ دا، قۋىقاستى قاتەرلى ىسىگىنىڭ دە بەلگىسى بولۋى مۇمكىن.

- اسقازان ۇنەمى قىجىلداسا، قىشقىل دەڭگەيى كوتەرىلىپ كەتە بەرسە، تاماق جەۋ قيىنداسا - بۇل بەلگىلەردىڭ ءبارى اسقازان مەن وڭەش ىسىگىنە قاتىستى.

- ارقا مەن جامباس اۋىرسا، ءىش كەپسە، اسقازان تاماق قورىتا الماسا، جىنىس مۇشە تۇسىندا قىشىما پايدا بولسا، بەلگىسىز سۇيىقتىق ءبولىنىپ شىقسا - بۇلار انالىق جىنىس بەزى مەن جاتىر ىسىگىنىڭ بەلگىلەرى.

- دەنەدە جارا، ءتۇيىن، ىسىككە ۇقساس تومپاق بۇرشىكتەر پايدا بولسا ءارى ول ۇزاق كەتپەي ءجۇرىپ السا - بۇل دا راكتىڭ بەلگىسى بولۋى ىقتيمال.

- قال مەن مەڭ ۇلكەيسە، دەنەگە جاراقات ءتۇسىپ، ۇزاق جازىلماي جۇرسە، اۋىز قۋىسىندا اۋىرسىنۋ كوبەيسە، ءتىستىڭ اق- قىزىل تۇستەس داقتارى پايدا بولسا - وندا دا دارىگەرگە بارعان ابزال. سونداي- اق، دەنە قىزۋى كوبەرىلسە، باس قاتتى اۋىرسا، تۇندە تەرلەسە، تۇندە ىستىعى كوبەرىلسە - بۇلار دا ونكولوگيانىڭ ءتۇرلى بەلگىلەرىنە جاتادى.

اقپارات دەرەككوزى: massaget.kz