شەتەلدەگى قازاق ءتىلىن وقىتۋشىلار بىلىكتىلىگىن ارتتىردى

نۇر-سۇلتان. قازاقپارات - «اباي ينستيتۋتى» باعدارلاماسى اياسىندا ا ق ش، تۇركيا، رەسەي، فرانسيا، گەرمانيا، بريتانيا، بەلگيا، يران، موڭعوليا، وزبەكستان، ماجارستان مەملەكەتتەرىندە تۇراتىن قازاق دياسپوراسى وكىلدەرىنە قازاق ءتىلىن ۇيرەتىپ جۇرگەن وقىتۋشىلارى ادىستەمەلىك كومەك الدى.

قازاقستان رەسپۋبليكاسى ءبىلىم جانە عىلىم مينيسترلىگى ءتىل ساياساتى كوميتەتىنىڭ تاپسىرىسىمەن جۇزەگە اسقان شارا اياسىندا وقىتۋشىلارعا ادىستەمەلىك كومەك رەتىندە «قازاق ءتىلىن ۇيرەتۋ: وتاندىق جانە شەتەلدىك تاجىريبە» كۋرسى ۇيىمداستىرىلدى، دەپ حابارلايدى قازاقپارات.

«وتانداستار» قورىمەن بىرلەسە وتىرىپ قازان ايىندا ونلاين رەجيمدە وتكىزىلگەن شارانىڭ ۇزاقتىعى ءبىر اپتانى قۇرادى.

كۋرستىڭ باستى ماقساتى شەتەلدەردەگى قازاق مادەني ورتالىقتارىنا عىلىمي- ادىستەمەلىك قولداۋ كورسەتۋ جانە قازاقستان اۋماعىنان تىس جەردە تۇرىپ، قازاق ءتىلىن ۇيرەنىپ جانە ۇيرەتىپ جۇرگەن قانداستارىمىزعا قولداۋ كورسەتۋ. كۋرستى قازاق ءتىلىن ۇيرەتىپ جۇرگەن وتاندىق وقىتۋشىلار مەن ادىسكەرلەر وزدەرىنىڭ جىلدار بويى قالىپتاسقان تاجىريبەلەرى نەگىزىندە دەڭگەيلەر بويىنشا (ا1، ا2، ۆ1، ۆ2، س1) جۇرگىزدى.

«ءتىل- قازىنا» ورتالىعىنىڭ ادىستەمە باسقارماسىنىڭ باسشىسى ايگۇل ورمانوۆا شاراعا قاتىسۋشىلارعا ساندىق تەحنولوگيانىڭ كومەگىمەن قازاق ءتىلىن انا ءتىلى جانە ەكىنشى شەت ءتىلى رەتىندە وڭتايلى ۇيرەتۋ، وقىتۋداعى ءادىس- تاسىلدەردى، ادىستەمەلەردى، تەحنولوگيالاردى قازىرگى كەزەڭ تالاپتارىنا بايلانىستى قولدانۋ جولدارىن كورسەتتى.

قاتىسۋشىلار ءتىلدى قاشىقتان ءتيىمدى وقىتۋدىڭ ءادىس- تاسىلدەرىمەن تانىسىپ، ءوزارا تاجىريبە الماستى. سونداي-اق وقىتۋشىلار قازاق ءتىلىن ۇيرەتۋگە ارنالعان ۇزدىك وقۋ- ادىستەمەلىك قۇرالدارمەن تانىستى. كۋرسقا 250-گە جۋىق تىڭداۋشى قاتىسىپ، سەرتيفيكاتقا يە بولدى.