قاسىم-جومارت توقايەۆ ماجارستان پرەمەر-ءمينيسترىنىڭ ورىنباسارى ميحاي ۆارگانى قابىلدادى
مەملەكەت باسشىسى قازاقستان مەن ماجارستاننىڭ ستراتەگيالىق كەڭەسىنىڭ بەسىنشى وتىرىسىنا جانە بيزنەس-فورۋمعا قاتىسۋ ءۇشىن نۇر-سۇلتان قالاسىنا كەلگەن ماجارستان پرەمەر-ءمينيسترىنىڭ ورىنباسارى - قارجى ءمينيسترى ميحاي ۆارگانى قابىلدادى.
كەزدەسۋ بارىسىندا ساۋدا-ەكونوميكالىق، قارجى، ينۆەستيتسيا جانە مادەني-گۋمانيتارلىق سالالارداعى ەكىجاقتى قاتىناستاردى دامىتۋدىڭ پەرسپەكتيۆالارى قاراستىرىلدى. سونداي-اق پاندەمياعا قارسى كۇرەس شارالارىنا، كليماتتىڭ وزگەرۋىنە جانە ايماقتىق كۇن تارتىبىنە قاتىستى ماسەلەلەر ءسوز بولدى.
قازاقستان پرەزيدەنتى ەلىمىزدىڭ تىلەۋلەس دوسى ميحاي ۆارگاعا ءىلتيپات ءبىلدىرىپ، ونىڭ قازاقستانعا ساپارى تابىستى بولاتىنىنا جانە ەكى مەملەكەت اراسىنداعى ىنتىماقتاستىقتى ودان ءارى دامىتۋعا تىڭ سەرپىن بەرەتىنىنە سەنىم ءبىلدىردى.
ماجارستان پرەمەر-ءمينيسترىنىڭ ورىنباسارى - قارجى ءمينيسترى كەزدەسۋگە مۇمكىندىك بەرگەنى ءۇشىن قاسىم-جومارت توقايەۆقا العىس ءبىلدىرىپ، الەمدەگى قازىرگى جاعدايعا قاراماستان، قازاقستان مەن ماجارستان اراسىنداعى بايلانىستاردىڭ دامۋ قارقىنى باسەڭدەمەگەنىن ايتتى.
قازاقستان پرەزيدەنتى مەن ماجارستان پرەمەر-ءمينيسترىنىڭ 2019-جىلعى ساۋىردە نۇر-سۇلتان قالاسىندا تابىستى كەزدەسۋ وتكىزگەنىن ايتقان ميحاي ۆارگا ماجارستان باسشىلىعى قاسىم- جومارت توقايەۆتىڭ بۋداپەشتكە الداعى ۋاقىتتا جاسايتىن ساپارىن اسىعا كۇتىپ وتىرعانىن جەتكىزدى.
ماجارستان ساياساتكەرى مەملەكەتىمىزدىڭ باسشىسىنا پاندەميا كەزىندە كورسەتكەن قولداۋى ءۇشىن العىس ءبىلدىرىپ، نۇر-سۇلتان قالاسىنداعى بيزنەس-فورۋمنىڭ تابىستى وتكەنىن ايتتى.
اتالعان شارا بارىسىندا ءبىرقاتار ماڭىزدى ينۆەستيتسيالىق كەلىسىمگە قول قويىلدى.