12:25, 19 - قازان 2021 | GMT +5
عارىشقا ساياحاتتىڭ باعاسى قانشا؟
نۇر-سۇلتان. قازاقپارات – 5-قازاندا بايقوڭىر عارىش ايلاعىنان ۇشىرىلعان «سويۋز م س-19» كەمەسىنىڭ ەكيپاجى قۇرامىندا رەسەيلىك اكتريسا يۋليا پەرەسيلد پەن كينورەجيسسەر كليم شيپەنكونىڭ حالىقارالىق عارىش ستانسياسىنا ۇشۋى عارىشتى «تۋريستىك» يگەرۋدىڭ كەزەكتى كەزەڭى بولدى، - دەپ حابارلايدى Kaz.tengritravel.kz سايتى.
ەكسپەديتسيانىڭ ماقساتى - تاريحتا العاش رەت عارىش ستانسياسىنىڭ بورتىندا كوركەم فيلم ءتۇسىرۋ، ءبىراق بۇل دا - «ىسكەرلىك ءتۋريزمنىڭ» ءبىر ءتۇرى.
روسكوسموس ازىرگە كوممەرتسيالىق رەيستەردى ۇسىنبايدى. سونداي-اق، عارىشقا ساياحاتتىڭ باعاسى نەمەسە ۋاقىتى تۋرالى كورپوراتسيا سايتىندا ەشقانداي اقپارات جوق.
ءبىراق 2019 -جىلى روسكوسموس عارىشكەرلەر توبىنا ىرىكتەۋ بايقاۋىن جاريالاعان بولاتىن. ناتيجەسىندە 4 ادام ىرىكتەلدى. ولار وسى جىلدىڭ قاڭتارىندا روسكوسموس عارىشكەرلەر جاساعىنىڭ سىناۋشى- عارىشكەرلەرىنە ۇمىتكەر بولدى. راس، بۇل ولاردىڭ جەرگە جاقىن كەڭىستىككە بارۋىنا كەپىلدىك بەرمەيدى. ءبىراق ەگەر ولار ۇشسا، وندا تولىعىمەن تەگىن بولادى.
