اتتراكسيونداعى ايەلدىڭ ءولىمى: دەپۋتاتتار شەنەۋنىكتەردى جازالاۋدى سۇرادى

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات ارتۋر پلاتونوۆ بارلىق دەڭگەيدەگى اتتراكسيوندارعا جۇيەلى قاداعالاۋدى قامتاماسىز ەتۋدى سۇرادى، دەپ حابارلايدى قازاقپارات ءتىلشىسى.

«قاراعاندىدا ەكى بالانىڭ اناسى «تارزانكادان» سەكىرىپ كوز جۇمدى. كەشە بۇقارالىق اقپارات قۇرالدارىندا اتتراكسيون نۇسقاۋشىسى ۇستالعانى حابارلاندى. «Nur Otan» فراكسياسىنىڭ دەپۋتاتتارى دەمالىس ءارى ويىن-ساۋىق ساياباقتارىنىڭ، اتتراكسيونداردىڭ تەحنيكالىق جاعدايىنا، بالالار الاڭدارى قىزمەتىن باقىلاۋ ماسەلەلەرى بويىنشا جۇيەلى شارالار قابىلداۋ ءۇشىن بۇعان دەيىن بىرنەشە رەت ۇكىمەتكە ۇندەۋ جاساعان ەدى»، - دەدى ا. پلاتونوۆ پرەمەر-ءمينيستردىڭ ورىنباسارى رومانا سكلياردىڭ اتىنا جولداعان ساۋالىندا.

وسى ورايدا ول قايعىلى وقيعالاردى تەكسەرۋ كەزىندە اتالعان جابدىقتاردى ورناتۋدا ەرەجەنى ورەسكەل بۇزۋ فاكتىلەرى انىقتالىپ وتىراتىنىن ايتتى. ءوز كەزەگىندە جەرگىلىكتى اتقارۋشى ورگاندار اتالعان جابدىقتاردى ورناتۋعا رۇقسات بەرمەگەنىن نەمەسە باسقا دا تۇسىنىكتەمەلەردى ايتىپ اقتالىپ جاتادى. دەپۋتاتتىڭ ايتۋىنشا، اتتراكتسيونداردى ماۋسىم الدىندا جانە جوسپارلى تەكسەرۋدى جۇرگىزۋ ءتارتىبىنىڭ ەسەبى مەن باقىلاۋى بولماي تۇر.

«اتتراكسيوندار ەسەپكە قويىلۋى ءتيىس. الايدا ەل بويىنشا قانشا نىسان ەسەپكە قويىلماعان؟ رەگلامەنتتە تاپسىرىلعانداي، قۇرىلعان كوميسسيالار تاراپىنان قانشاسى تەكسەرىلدى؟ اتتراكتسيونداردىڭ بارشاسىنا قاجەتتى اكتىلەر جاسالدى ما؟ قۇرىلعان نورماتيۆتىك بازاعا قاراماستان، ەلدەگى جاعداي وزگەرە قويمادى. وسىنداي نىسانداردا بالالار مەن ەرەسەكتەر قايعىلى جاعدايعا تاپ بولىپ جاتىر، ياعني بۇل تۇرعىدا جاۋاپكەرشىلىكتىڭ جوق ەكەنىن كورىپ تۇرمىز»، - دەدى دەپۋتات.

بۇل تۇرعىدا دەپۋتاتتار كەلەسى ۇسىنىستاردى ايتتى:

1. بارلىق دەڭگەيدە جۇيەلى باقىلاۋدى قامتاماسىز ەتۋ ماڭىزدى. بۇل رەتتە بالالار مەن ەرەكسەكتەردىڭ قاۋىپسىزدىگىنە، جابدىقتىڭ ساپاسىنا جەكەلەي جاۋاپكەرشىلىكتى بەكىتۋ؛

2. وسى سالادا باقىلاۋعا جاۋاپ بەرەتىن شەنەۋنىكتەردى جازاعا تارتۋ؛

3. ءار ءوڭىر بويىنشا اتتراكسيونداردى ليتسەنزيالاۋ تۋرالى مالىمەتتەردى بەرىپ، اكىمدىك ايقىنداعان ناقتى لاۋازىم يەلەرىن كورسەتۋ.

ەسكە سالا كەتەيىك، جاقىندا قاراعاندىدا 25 مەتر بيىكتىكتەن «تارزانكادان» سەكىرگەن ايەل كوز جۇمدى. 12-قازان كۇنى قاراعاندىدا قوناق ءۇيدىڭ شاتىرىنا ورناتىلعان اتتراكسيوندا ايەلدىڭ قازا بولۋ ىسىنە بايلانىستى كۇدىكتى ۇستالدى.

اۆتور: رۋسلان عابباسوۆ