ارقان بايلانباعان: بيىكتىكتەن سەكىرگەن قاراعاندىلىق ايەلدىڭ ءولىمى جايلى كۋاگەرلەر ايتىپ بەردى

نۇر-سۇلتان. قازاقپارات - قاراعاندىدا بيىكتىكتەن سەكىرەم دەپ قازا تاپقان ايەلدىڭ ءولىمى جايلى سۇمدىق دەرەكتەر پايدا بولدى.

قىز ەكسترەمالدى تريۋكتى ورىنداۋ كەزىندە قايتىس بولعان ەدى. الايدا تروسس بايلانباعان بولىپ شىقتى. بۇل تۋرالى كۋاگەرلەر ايتتى.

ەۆگەنيانىڭ تۋىستارى ونىڭ مۇنداي قاۋىپتى ويىندارعا العاش رەت قاتىسىپ تۇرماعانىن العا تارتادى. ال بۇل جولعى سەكىرۋ ايەلدىڭ 33 جاسقا تولۋىنا ارنالعان سىيلىق بولعان، دەپ حابارلايدى astanatv.kz ارناسى.

قاراعاندىدا ارقانمەن سەكىرۋ ەكسترەمالدى ويىنى «سوزۆەزديە» دەپ اتالاتىن بۇرىنعى قوناق ۇيدە ۇيىمداستىرىلعان. سەگىز قاباتتى عيمارات ءبىر كەزدەرى «ۆاليۋت- ترانزيت بانكىنە» تيەسىلى بولعان. قازىر كەرەكسىز ءارى قاڭىراپ تۇرعان ورىندى روۋپدجامپەرلەر يەلەنگەن. 33 جاستاعى ەۆگەنيا ءۇشىن ەكسترەمالدى اتتراكسيون تۋعان كۇنىنە ارنايى جاسالعان سىيلىق ەدى.

بيىكتىكتەن ارقانمەن سەكىرۋ الپينيستەردىڭ كۇردەلى امورتيزاتسيالىق جۇيەسىن قولدانۋ ارقىلى جۇزەگە اسادى. عيماراتتىڭ ۇستىندە جانە جەردە ەكسترەمالدى سپورتشىلاردى ارنايى نۇسقاۋشىلار ساقتاندىرادى. قايعىلى وقيعا ورىن الاتىن كۇنى دە سولاي بولعان. مارقۇمنىڭ جاقىن دوسى سۆەتلانا موروزوۆانىڭ ايتۋىنشا، ەشقانداي قاتەر تۋىنداماعان. ۇيىمداستىرۋشىلار قىزداردان پسيحيكالىق جانە فيزيكالىق دەنساۋلىعى تۋرالى ارنايى قاعاز العان. تومەندە ەۆگەنيانى كۇيەۋى كۇتىپ تۇرعان. سەكىرەر الدىندا ايەل وعان جاقسى كورەتىنى جايلى ايتىپ ۇلگەرەدى.

«ءجاي عانا تروسس تارتىلعان جوق. مۇنى بەينەجازبادان دا كورۋگە بولادى. جانە مەن ول سەكىرگەن كەزدە تروسستىڭ تارتىلعانىن كوردىم. ول سوڭىنان بارىپ ىسكە قوسىلدى. ساقتاندىرعىش ارقان بەكىتىلمەگەن، بايلانباعان ءتىپتى تارتىلماعان»، - دەيدى قايتىس بولعان ايەلدىڭ قۇربىسى سۆەتلانا موروزوۆا.

ەكسترەمالدى اتتراكسيوندى ۇيىمداستىرۋشىلار وقيعا بويىنشا تۇسىنىكتەمە بەرۋدەن باس تارتقان. ينستاگرامداعى پاراقشاسىندا كومپانيا تولىق قاۋىپسىزدىككە كەپىلدىك بەرەتىنىن ايتتى. جەلىدەگى پروفيلگە قاراعاندا جىگىتتەر 12 جىل بويى وسى ىسپەن اينالىسقانىن، 245 مەترلىك بيىكتىكتەن سەكىرۋدى ءساتتى ۇيىمداستىرىپ كەلگەنىن بايقاۋعا بولادى. ال بۇل جولى «سوزۆەزديە» قوناق ۇيىندە نە بولعانى جونىندە ۇيىمداستىرۋشىلار پوليتسياعا جاريا ەتپەۋ تۋرالى كەلىسىم بەرگەندەرىنە سۇيەنىپ، ءتىس جارمادى. بەلگىلىسى ەكسترەمالدى بيزنەستىڭ نەگىزىن قالاۋشى رەسەي ازاماتى جانە ول قازىر شەتەلدە ەكەنى.

«بۇل فاكتى بويىنشا ق ر ق ك 306-بابىنىڭ 3-بولىگىمەن قىلمىستىق ءىس قوزعالدى، قىلمىستىق ءىس اياسىندا پوليتسيا اتتراكسيوندى ۇيىمداستىرۋشىنىڭ ليتسەنزياسى بار-جوعىن انىقتايتىن بولادى. قاۋىپسىزدىك تالاپتارى دۇرىس ساقتالدى ما، ول بويىنشا قازىر تەرگەۋ ءجۇرىپ جاتىر»، - دەدى قاراعاندى وبلىسى پوليتسيا دەپارتامەنتىنىڭ باسپا ءسوز حاتشىسى باقىتجان قۇدياروۆ.

ەۆگەنيانىڭ تۋىستارى مەن دوستارى قازىر ايەلدى جەرلەۋگە دايىندالۋدا. ارتىندا ءۇش بالاسى اناسىز قالدى. وسى ورايدا قاۋىپتى ويىن- ساۋىقتى ۇيىمداستىرۋشىلارعا كوپتەگەن سۇراقتار جينالىپ قالدى: سونىڭ ءبىرى نەگە ايەلدىڭ باسىندا قورعاۋ شلەمى بولماعان؟ سەبەبى ونىڭ باسىمەن بەتون قۇرىلىمىنا سوعىلۋى ولىمگە الىپ كەلگەن بولاتىن. ول كوپ قان جوعالتقان.

قاراعاندى بيلىگى بيىكتىكتەن سەكىرۋگە رۇقسات بەرمەگەنىن مالىمدەدى.

«قاراعاندى قالاسىنىڭ اكىمدىگى سەكىرۋگە رۇقسات بەرمەگەن. ءبىز كوپ قاباتتى ۇيلەردىڭ يەلەرىمەن، ءوزىن-ءوزى باسقارۋ ورگاندارىمەن شاتىرلارعا قاۋىپتى قۇرىلىمدار مەن اتتراكسيونداردى ورناتۋدىڭ الدىن الۋ بويىنشا ءتۇسىندىرۋ جۇمىستارىن جۇرگىزەتىن بولامىز»، - دەپ ءتۇسىندىردى قاراعاندى قالاسىنىڭ اكىمدىگى.

مۇنىمەن قاتار اكىمدىك ويىن- ساۋىقتىڭ بۇل ءتۇرىن قاي مەملەكەتتىك ورگان باقىلايتىنىن تۇسىندىرە المادى. قازىر دەپارتامەنتتىڭ زاڭگەرلەرى بۇل ماسەلەمەن اينالىسۋدا. ەگەر سەكىرۋدى ۇيىمداستىرۋشىلاردىڭ كىناسى دالەلدەنسە، وندا ولار 8 جىلعا دەيىن باس بوستاندىعىنان ايىرىلۋى مۇمكىن.

ەسكە سالا كەتسەك، قاراعاندىلىق ايەل بيىكتىكتەن روۋپدجامپينگپەن (جوعارىدان بەلگە ارقان بايلاپ سەكىرۋ - رەد. ) سەكىرەمىن دەپ مەرت بولعان بولاتىن. 25 مەتر بيىكتىكتەن سەكىرگەن 33 جاستاعى ايەل جەرگە قۇلاپ، اۋىر جاراقات العان. جاراقاتتارىنىڭ سالدارىنان ول اۋرۋحانادا كوز جۇمعان.

Stan.kz