قاسىم- جومارت توقايەۆ ءۇندىستاننىڭ سىرتقى ىستەر ءمينيسترىن قابىلدادى
كەزدەسۋدە تاراپتار ساياسي، ساۋدا- ەكونوميكالىق جانە ينۆەستيتسيا سالالارىنداعى ىنتىماقتاستىقتى كۇشەيتۋ بويىنشا قازاقستان مەن ءۇندىستان اراسىنداعى كوپ جوسپارلى بايلانىستاردى دامىتۋدىڭ كەلەشەگىن تالقىلادى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
قاسىم- جومارت توقايەۆ سۋبرامانيام دجايشانكارمەن اڭگىمەلەسۋ بارىسىندا كەڭەسكە مۇشە مەملەكەتتەردىڭ مينيسترلەرىنىڭ بۇگىنگى كەزدەسۋىنە ءۇندىستاننىڭ قاتىسقانى ماڭىزدى ەكەنىن ايتىپ، ول ەلدىڭ باسشىلىعىنا قازاقستاننىڭ باستامالارىنا قولداۋ بىلدىرگەنى ءۇشىن ريزاشىلىعىن ءبىلدىردى. مەملەكەت باسشىسى مينيسترگە ەلىمىزدە COVID-19-عا قارسى كۇرەس بويىنشا قابىلدانىپ جاتقان شارالار، اۋعانستانداعى جاعدايدى تۇراقتاندىرۋ جانە وعان گۋمانيتارلىق كومەك كورسەتۋگە قازاقستاننىڭ قوسىپ وتىرعان كۇش- جىگەرى تۋرالى ايتتى.
سونداي- اق پرەزيدەنت ەكى ەل اراسىنداعى اۋە بايلانىسىن قالپىنا كەلتىرۋدىڭ ماڭىزدى ەكەنىن، بۇل قازاقستان مەن ءۇندىستان اراسىنداعى بايلانىستاردى ودان ءارى دامىتۋعا تىڭ سەرپىن بەرەتىنىن اتاپ ءوتتى.
ءوز كەزەگىندە ءۇندىستاننىڭ سىرتقى ساياسي ۆەدومستۆوسىنىڭ باسشىسى قاسىم- جومارت توقايەۆقا ورتالىق ازيا ءوڭىرىن ىنتىماقتاستىقتىڭ ماڭىزدى باعىتى سانايتىنىن ءۇندىستاننىڭ پرەمەر- ءمينيسترى نارەندرا موديدىڭ سالەمىن جەتكىزدى. بۇل رەتتە ءۇندى ديپلوماتى ءوز ەلىنىڭ باسشىلىعىنىڭ قازاقستان پرەزيدەنتىن كەلەسى جىلى ءۇندىستانعا ساپارمەن كەلۋگە شاقىراتىنىن جەتكىزدى.
اڭگىمەلەسۋ كەزىندە پاندەميانىڭ سالدارلارىن جويۋ ماسەلەلەرىنە باسا ءمان بەرىلدى. سۋبرامانيام دجايشانكار قاسىم- جومارت توقايەۆقا ەكپە سەرتيفيكاتتارىن ءوزارا مويىنداۋ جونىندەگى ەلىنىڭ ۇسىنىسىن جەتكىزىپ، ءۇندىستاننىڭ فارماتسيەۆتيكا جانە ەكونوميكانى سيفرلاندىرۋ سالالارى بويىنشا ىنتىماقتاستىقتى جانداندىرۋعا ءازىر ەكەنىن ايتتى.
