پەداگوگتاردىڭ جالاقىسىن ءارى قاراي ءوسىرۋ پروتسەسى جالعاسادى - ءبىلىم ءمينيسترى
بۇل تۋرالى ۇكىمەت وتىرىسىندا «BILIMDI ŪLT» بارشاعا ارنالعان ساپالى ءبىلىم» ۇلتتىق جوباسىن تانىستىرۋ كەزىندە ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«ورتا ءبىلىم بەرۋ جۇيەسىنىڭ ساپاسىن ارتتىرۋعا توقتالساق، ۇلتتىق جوبا اياسىندا ءبىر جاعىنان قالا مەن اۋىل جانە وڭىرلەر اراسىنداعى ءبىلىم ساپاسىنداعى الشاقتىقتى ازايتۋ، ەكىنشى جاعىنان جالپى رەسپۋبليكانىڭ ءبىلىم ساپاسىن ارتتىرۋ ءۇشىن كەشەندى شارالار قاراستىرىلادى. مەملەكەت باسشىسىنىڭ تاپسىرماسى بويىنشا پەداگوگتاردىڭ جالاقىسىن ءارى قاراي ءوسىرۋ ماسەلەسى قامتىلدى. وقۋلىقتاردى ازىرلەۋ جانە ولارعا ساراپتاما جۇرگىزۋگە جاڭا تاسىلدەر ازىرلەنەدى، پەداگوگتاردىڭ كاسىبي دامىتۋ جۇيەسى جەتىلدىرىلەتىن بولادى»، - دەدى ا. ايماعامبەتوۆ.
ونىڭ ايتۋىنشا، پاندەمياعا جانە الدىڭعى وقۋ جىلىنداعى قاشىقتان وقىتۋعا بايلانىستى «سيفرلىق ۇستاز» جوباسىن ىسكە اسىرۋ ۇلتتىق جوباعا ەنگىزىلدى. «قازىرگى ۋاقىتتا ءبىلىم سالاسىنداعى تاربيە جۇمىسىنىڭ ماڭىزدىلىعىن ەسكەرە وتىرىپ، «قۇندىلىقتارعا نەگىزدەلگەن ءبىلىم بەرۋ» تاربيە جوباسىن ىسكە اسىرۋ، مەكتەپ پەن اتا- انانىڭ ءوزارا قارىم- قاتىناسى جۇيەسىن جەتىلدىرۋ، ءوزىن- ءوزى باسقارۋ، دەبات قوزعالىستارىن ودان ءارى دامىتۋ سياقتى جوبالار دا قاراستىرىلدى. بۇعان قوسا 2023 -جىلدان باستاپ تولىق جيناقتالعان اۋىل مەكتەپتەرىن جان باسىنا قارجىلاندىرۋعا بىرتىندەپ كوشىرۋ جوسپارلانۋدا. بۇل دا قالا مەن اۋىل مەكتەپتەرى اراسىنداعى ساپا الشاقتىعىن شەشۋگە مۇمكىندىك بەرەدى»، - دەدى مينيستر. بۇدان بۇرىن حابارلانعانداي، بارلىق بالاباقشادا بالانى دامىتۋدىڭ جاڭا مودەلى ەنگىزىلەدى.
