قاراعاندىدا ەرەكشە شاشتاراز اشىلدى

قاراعاندى. قازاقپارات - «حارەكەت» رەسپۋبليكالىق قورى قاراعاندىدا ەرلەرگە ارنالعان سۇلۋلىق سالونىن اشتى.

سالوننىڭ بارلىق تابىسى قايىرىمدىلىققا كەتەدى. تۇسكەن قاراجاتقا از قامتىلعان جانە كوپبالالى وتباسىلار ءۇشىن تۇرعىن ءۇي ساتىپ الىنادى، دەپ حابارلايدى قازاقپارات ءتىلشىسى.

«حارەكەت» قورى قاراعاندى فيليالىنىڭ ديرەكتورى اقتوتى ءجۇنىسوۆانىڭ ايتۋىنشا، باربەرشوپ دەمەۋشىلىك كومەكتىڭ ارقاسىندا اشىلعان. «دەمەۋشى ءوز ەسىمىن اتاعىسى كەلمەيدى. ول وڭتۇستىك- شىعىس شاعىناۋدانىندا ءۇي- جاي الىپ، قاجەتتى جابدىقتى ساتىپ الدى. التى شەبەر جۇمىس ىستەيتىن بولادى. ازىرگە ءبىر باربەر جۇمىس ىستەپ جاتىر»، - دەدى اقتوتى ءجۇنىسوۆا. سالوندا تەك ەر ادامدارعا - ەرەسەكتەرگە جانە بالالارعا قىزمەت كورسەتىلەدى.

ءاربىر شاش قيۋ اقىسى قايىرىمدىلىق رەتىندە قاراستىرىلادى. جينالعان قاراجاتقا تۇرعىن ۇيگە مۇقتاج ادامدارعا: كوپبالالى وتباسىلارعا، مۇگەدەكتەرگە، جالعىزباستى انالارعا، جەتىم بالالارعا باسپانا ساتىپ الىنادى. قور جۋىردا كەڭ پاتەردىڭ كىلتىن تەمىرتاۋ قالاسىنىڭ تۇرعىنى اقەركە بەرەكبايەۆاعا تابىس ەتتى. ءبىرىنشى توپتاعى مۇگەدەك ايەل ءۇش بالا تاربيەلەپ وتىر.

«حارەكەت» قايىرىمدىلىق قورى 2017 -جىلى قۇرىلعان. بۇگىنگى تاڭدا ۇيىم بۇكىل قازاقستان بويىنشا وتباسىلار ءۇشىن 503 پاتەر ساتىپ الدى، ونىڭ ىشىندە 87 ى قاراعاندىلىقتار.

قور تۋرالى قوسىمشا اقپاراتتى Instagram الەۋمەتتىك جەلىسىنەن بىلۋگە بولادى: @xareket_qory_official.