جاۋعان قاردى ۆيدەوعا تۇسىرگەن باياناۋىلدىق اپا شەنەۋنىكتەردەن كەشىرىم سۇرادى

نۇر-سۇلتان. قازاقپارات - پاۆلودار وبلىسى باياناۋىل اۋدانىنىڭ تۇرعىنى الەۋمەتتىك جەلىدە جاريالانعان ۆيدەوسى ءۇشىن كەشىرىم سۇرادى.

ول جەردە ايەل قار جاۋىپ جاتقانىن ايتتى.

«2021 -جىلدىڭ 6-قازانى. مىنە، اقپان مەن قاڭتار سياقتى ەكى مەترگە دەيىن ەسىكتىڭ الدىن قار ءۇيىپ تاستاعان. كەشەدەن بەرى وسىنداي قارلى بوران، بىرەۋدى بىرەۋ كورمەيدى. ەسىگىمىز اشىلماي جاتىر، ۇيدەن شىعا الماي جاتىرمىز. باياناۋىل، ەگىندىبۇلاق ەلدى مەكەنى»، - دەيدى ول ۆيدەودا.

الايدا Instagram جەلىسىندە @tipavlo پاراقشاسى تاعى ءبىر ۆيدەو جاريالادى. ول جەردە اپا جاۋعان قاردى ۆيدەوعا تۇسىرگەنى ءۇشىن كەشىرىم سۇراعان.

«ايەل باياناۋىل اۋدانى ەگىندىبۇلاق اۋىلىندا قار جاۋعانى تۋرالى ۆيدەو تۇسىرگەن. قانداي دا ءبىر شاعىم ايتپاعان. وسىدان كەيىن اكىمدىك قىزمەتكەرلەرى سول ارەكەتى ءۇشىن كەشىرىم سۇراتقان»، - دەلىنگەن ۆيدەو سيپاتتاماسىندا.

تۇرعىن ۆيدەونى الەۋمەتتىك جەلىدە جاريالاماعانىن، تۋىستارىنا جىبەرگەنىن ايتتى.

«بۇل ۆيدەونى ءوزىمنىڭ تۋىستارىما جىبەرگەنمىن، كىمنىڭ جەلىگە سالعانىن بىلمەيمىن. قۇداي ساقتاسىن، مەندە ەشقانداي شاعىم جوق. «پاۆلوداردا قار جوق« دەگەن سوڭ قاينىما جىبەرگەنمىن، تاراتىپ جىبەرگەن عوي. شاعىم جاسايتىن ادام ەمەسپىن»، - دەيدى ايەل.

ال اكىمدىك قىزمەتكەرى «بەتالدى ۆيدەو سالماڭىزدار. وسىنداي بولىپ شىعا كەلەدى» دەيدى.

«كەشىرىڭىزدەر، كەشىرىم سۇرايمىن. ەندى مۇنداي ۆيدەو سالىنبايدى»، - دەپ جاۋاپ بەرگەن ايەل.

الايدا جەلى قولدانۋشىلارى اكىمدىك قىزمەتكەرىنىڭ ايەلگە نە ءۇشىن كەشىرىم سۇراتقانىن تۇسىنبەي الەك بولدى.

باياناۋىل اۋدانىنىڭ اكىمى قانات كارىموۆ Sputnik قازاقستان تىلشىسىنە بۇل كەلەڭسىز جاعدايعا وزىنە بەرىلگەن تاپسىرمانى دۇرىس تۇسىنبەگەن اۋىل اكىمى كىنالى ەكەنىن ايتتى.

«اكىم بۇگىن تاڭەرتەڭ ءوزى وسى ايەلگە بارىپ كەشىرىم سۇراعانىن ايتتى. ارينە، ءبىز قىزمەتكەرىمىزدى تارتىپتىك جازاعا تارتامىز. بۇل ءبارىمىز ءۇشىن ساباق بولادى»، - دەدى اۋدان باسشىسى.

قانات كارىموۆ اۋداندا قار تازالاۋ جۇمىستارى ءجۇرىپ جاتقانىن، تاۋلىگىنە ءبىر جارىم ايلىق نورمانىڭ تۇسكەنىن ايتتى. باياناۋىلدىڭ وزىندە كوشەلەر قاردان تازارتىلىپ، قالا سىرتىنا شىعارۋ جالعاسىپ جاتىر.