14:46, 10 - قازان 2021 | GMT +5
جامبىل وبلىسىنداعى وق- دارىلەر قويماسىندا تاعى دا جارىلىس بولدى
نۇر- سۇلتان. قازاقپارات - جامبىل وبلىسىندا وق- دارىلەر قويماسىنداعى زاقىمدانعان جارىلعىش زاتتار ورتەندى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
«2021 -جىلدىڭ 10- قازانىندا ساعات 7.20 شاماسىندا جامبىل وبلىسىنىڭ سارىكەمەر اۋىلىنداعى ينجەنەرلىك وق- دارىلەر قويماسىنىڭ اۋماعىندا بۇرىن زاقىمدانعان جارىلعىش زاتتار ورتەندى. جارىلىس سالدارىنان وق- دارىلەردىڭ قالدىقتارى مەن بولشەكتەرى جان- جاققا ۇشپاعان. بۇل جۇمىستان تىس ۋاقىتتا ورىن الدى. جاقىن جەردە ادامدار بولماعان. عيماراتتار مەن قۇرىلىستار زاقىمدالماعان. اۋدانداعى احۋال تۇراقتى»، - دەپ ءمالىم ەتتى باسپا ءسوز قىزمەتى.
الداعى ۋاقىتتا دا بۇنداي جاعدايلار ورىن الۋ مۇمكىن. ودان بولەك، قويما اۋماعىندا ءقاۋىپتى وق- دارىلەردىڭ باقىلاناتىن جارىلىستارى جۇرگىزىلەتىن بولادى. قازىرگى ۋاقىتتا ورتەنگەن قويمانىڭ تەحنيكالىق اۋماعىن جارىلعىش زاتتاردان تازارتۋ جۇمىستارى جالعاسۋدا.
