مەملەكەتتىك حاتشى قازاقستاننىڭ حالىق ءارتىسى جولجاقسىنوۆقا «وتان» وردەنىن تابىس ەتتى - فوتو

الماتى. قازاقپارات- الماتىدا ق ر مەملەكەتتىك حاتشىسى قىرىمبەك كوشەربايەۆ قازاقستاننىڭ حالىق ءارتىسى، مەملەكەتتىك سىيلىقتىڭ ەكى دۇركىن يەگەرى دوسحان جولجاقسىنوۆقا «وتان» وردەنىن سالتاناتتى تۇردە تابىس ەتتى، دەپ حابارلايدى قازاقپارات ءتىلشىسى.

بۇل مارتەبەلى ماراپات تانىمال اكتەرگە ۇلتتىق مادەنيەتتى، كينەماتوگرافيانى جانە تەاتر ونەرىن دامىتۋداعى ايرىقشا ۇلەسى ءۇشىن قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن بەرىلدى.

شاراعا ق ر مەملەكەتتىك حاتشىسى قىرىمبەك كوشەربايەۆ، مادەنيەت جانە سپورت ءمينيسترى اقتوتى رايىمقۇلوۆا، كومپوزيتور تولەگەن مۇحامەدجانوۆ، الماتى قالاسى اكىمىنىڭ ورىنباسارى ەرجان باباقۇماروۆ، مادەنيەت پەن ونەر قايراتكەرلەرى قاتىستى.

«قۇرمەتتى دوسحان قالي ۇلى، ءسىزدىڭ سان قىرلى شىعارماشىلىعىڭىزدى ەلىمىزدە بىلمەيتىن ادام جوق شىعار. قارشادايىڭىزدان قازاق رۋحانياتىنا قىزمەت ەتىپ، ەلدىڭ ەسىندە، جۇرتتىڭ ساناسىندا ماڭگىلىككە ساقتالاتىن رولدەردى سومدادىڭىز. سوندىقتان ءسىزدىڭ تەاتر ساحناسى مەن كينو ەكرانىندا شوقتىعى بيىك كەيىپكەرلەردى بەينەلەگەن اكتەرلىك شەبەرلىگىڭىزگە، ناقىشىمەن ءان ورىنداۋ ونەرىڭىزگە ءتانتى بولعان ونەرسۇيەر قاۋىم مەن قاراپايىم كورەرمەن وتە كوپ. كينورەجيسسەر رەتىندە «ءبىرجان سال»، «قۇنانباي» سەكىلدى كەسەك دۇنيەلەردى ءتۇسىرىپ، ۇلتتىق كينەماتوگرافيامىزدىڭ داماۋىنا سۇبەلى ۇلەس قوستىڭىز»، - دەدى قىرىمبەك كوشەربايەۆ.

سالتاناتتى راسىمدە مەملەكەتتىك حاتشى دوسحان جولجاقسىنوۆتى 70 جاسقا تولعان بەلەسىنە وراي ىزگى تىلەگىن جەتكىزىپ، تۇڭعىش پرەزيدەنت - ەلباسى ن. ءا. نازاربايەۆتىڭ جانە مەملەكەت باسشىسى ق. ك. توقايەۆتىڭ مەرەيتوي يەسىنە جولداعان قۇتتىقتاۋىن وقىپ بەردى.

دوسحان قالي ۇلى 1951 -جىلى 7-قازاندا شىعىس قازاقستان وبلىسى كۇرشىم اۋدانىندا دۇنيەگە كەلگەن. 1969 -جىلى الماتى مەملەكەتتىك ونەر ينستيتۋتىنا (قازىرگى قازاق ۇلتتىق كونسەرۆاتورياسى) وقۋعا ءتۇستى. 1972 -جىلى قازاق جاستار مەن بالالار تەاترىندا اكتەر بولىپ، كەيىن سول تەاتردا ديرەكتور قىزمەتىن اتقاردى. اكتەر تەاتر ساحناسىندا جانە كينودا 200 دەن استام ءرولدى سومداعان. سونىمەن قاتار حالىق اندەرى مەن قازىرگى قازاق كومپوزيتورلارى اندەرىن شەبەر ورىنداۋشى رەتىندە كەڭىنەن تانىمال.

دوسحان جولجاقسىنوۆ ۇلتتىق كينو ونەرىنىڭ دامۋىنا ءوز ۇلەسىن قوسىپ، «گاۋھارتاس»، «دالاداعى قۋعىن»، «التىن كۇز»، «ومپا»، «اق بارىستىڭ ۇرپاقتارى»، «كوشپەندىلەر»، «ءبىرجان سال» جانە باسقا فيلمدەرگە تۇسكەن.

اۆتور: الما مۇقانوۆا