قازاقستاندا قارتتاردى قولداۋعا ارنالعان قانداي الەۋمەتتىك كومەك تۇرلەرى بار

نۇر-سۇلتان. قازاقپارات - ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگى ەگدە جاستاعى جاندارعا كورسەتىلەتىن الەۋمەتتىك كومەك ءتىزىمىن جاريالادى، دەپ حابارلايدى قازاقپارات اتالعان ۆەدومستۆوعا سىلتەمە جاساپ.

«بيىل جەرگىلىكتى بيۋدجەتتىڭ مۇمكىندىكتەرىن ەسكەرە وتىرىپ جانە بيزنەستىڭ الەۋمەتتىك جاۋاپكەرشىلىگى اياسىندا قارت ادامداردى الەۋمەتتىك قولداۋعا 11,9 ميلليارد تەڭگەدەن استام قاراجات باعىتتالدى (ونىڭ ىشىندە جەرگىلىكتى بيۋدجەتتەن - 11,5 ميلليارد تەڭگە، تارتىلعان قاراجات ەسەبىنەن - 0,5 ميلليارد تەڭگە)»، - دەلىنگەن حابارلامادا.

سونداي-اق، مينيسترلىك ۇكىمەت تاراپىنان قارتتارعا قانداي الەۋمەتتىك كومەك قاراستىرىلعانىن جانە وعان قانشا قارجى بولىنگەنىن تىزبەكتەپ بەردى.

- ۇلى وتان سوعىسىنداعى جەڭىس كۇنىنە ءبىرجولعى ماتەريالدىق كومەككە - 6,4 ميلليارد تەڭگە (شامامەن 115,8 مىڭ ادام)؛

- ازىق- تۇلىك جيىنتىعىن ۇسىنۋعا - 145,5 ميلليون تەڭگە (31,6 مىڭ ادام)؛

- جەڭىلدىكپەن ءدارى- دارمەكپەن قامتاماسىز ەتۋگە - 46,6 ميلليون تەڭگە (4 مىڭ ادام)؛

- ءتىس پروتەزدەۋگە - 229 ميلليون تەڭگە (2,5 مىڭ ادام)؛

- ساناتورلىق- كۋرورتتىق ەمدەۋدى ۇسىنۋعا - 1 ميلليارد 247,8 ميلليون تەڭگە (24,1 مىڭ ادام)؛

- تۇرعىن ءۇيدى جوندەۋگە - 39,9 ميلليون تەڭگە (517 ادام)؛

- وتىنمەن قامتاماسىز ەتۋگە - 286,5 ميلليون تەڭگە (10,5 مىڭ ادام)؛

- جالپى پايدالانىمداعى كولىكتە جەڭىلدىكپەن جول جۇرۋگە - 878,0 ميلليون. تەڭگە (8 مىڭ ادام)؛

- كومەكتىڭ باسقا تۇرلەرىنە - 2 ميلليارد 667,8 ميلليون تەڭگە (182,5 مىڭ ادام).

ودان بولەك، اتالعان ۆەدومستۆونىڭ مالىمەتىنشە، بۇگىن ەلىمىزدە قارتتار كۇنىنە وراي ايلىق باستالدى. ونىڭ اياسىندا، بارلىق وڭىرلەردە اعا بۋىن وكىلدەرىن الەۋمەتتىك قولداۋعا باعىتتالعان ءىس- شارالار، ەڭبەك ۇجىمدارىمەن كەزدەسۋ، ەمحانالاردا «اشىق ەسىك» كۇندەرىن ۇيىمداستىرۋ تاعى سول سياقتى شارالار وتكىزىلەدى. بۇعان دەيىن ەلىمىزدە 45 مىڭنان استام قارت ارناۋلى الەۋمەتتىك قىزمەتپەن قامتىلعانى حابارلاندى.