ەلوردادا ازىق-تۇلىك دۇكەندەرىندە ۇرلىق جاساعان ستۋدەنت قىزدار ۇستالدى

نۇر-سۇلتان. قازاقپارات - ەلوردا ۋنيۆەرسيتەتىندە وقيتىن 18 جانە 19 جاستاعى ەكى بويجەتكەن شاعىنماركەتتەردە ۇرلىق جاساپ ءجۇردى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

تەرگەۋ بارىسىندا بويجەتكەندەردىڭ ءبىرى ساتۋشىنىڭ نازارىن وزىنە اۋدارىپ تۇرعاندا، ەكىنشىسى ۇرلىق جاساعانى انىقتالدى. بۇل ارەكەتتەرىن كەزەكتەسىپ جاساپ وتىرعان. دۇكەندەردەن ۇرلاعان تاۋارلار - ازىق-تۇلىك، سۋسىندار، گيگيەنا قۇرالدارىن جولدورباعا سالىپ شىعارعان. وسىلايشا، ولار ەكى دۇكەننەن جالپى سوماسى 50 مىڭ تەڭگەگە جۋىق اقشاعا تاۋار شىعارعان. ۇستالعان بويجەتكەندەر ۇرلىق جاساعانىن مويىندادى. اتالعان فاكتى بويىنشا قىلمىستىق ءىس قوزعالدى. كۇدىكتىلەردىڭ بۇعان دەيىن وسىعان ۇقساس جاسالعان قىلمىستارعا قاتىسى انىقتالۋدا. نۇر-سۇلتان قالاسىنىڭ پوليتسيا دەپارتامەنتى ساۋدا قىزمەتكەرلەرىنە قىراعى بولىپ، كۇمان كەلتىرەتىن تۇلعالارعا نازار اۋدارۋىن، جۇمىس ورنىن قاراۋسىز قالدىرماۋىن كەڭەس ەتەدى.