باتىس قازاقستاندا التىن وردا داۋىرىنە جاتاتىن كەسەنە تابىلدى

ورال. قازاقپارات - باتىس قازاقستان وبلىسىندا التىن وردا داۋىرىنە جاتاتىن كەسەنە تابىلدى، دەپ حابارلايدى قازاقپارات ءتىلشىسى.

ب ق و تاريحي- ولكەتانۋ مۋزەيىنىڭ ديرەكتورى ميربولات ەرسايەۆتىڭ ءمالىم ەتكەنىندەي، كەسەنە تەرەكتى اۋدانى اۋماعىندا شالقار كولى ماڭىندا ورىن تەپكەن. ونىڭ سوزىنە قاراعاندا، باستاپقىدا وعان شالقار اتاۋى بەرىلدى. كەيىنىرەك ارحەولوگيالىق قازبا جۇمىستارىن جۇرگىزۋ جانە جەرگىلىكتى حالىققا ساۋالناما جۇرگىزۋ كەزىندە سول جەردىڭ اتاۋى بويىنشا جاڭاباي دەپ اتالدى.

قۇندىلىعى جوعارى كەسەنەنى مۋزەيدىڭ تاريح جانە ارحەولوگيا ءبولىمىنىڭ عىلىمي قىزمەتكەرى، جاساق باسشىسى يانا لۇقپانوۆا تاپتى. كەسەنەنىڭ جەر قازۋ جۇمىستارى قولمەن جۇرگىزىلدى. ءۇيىندىنى زەرتتەۋ بارىسىندا ساۋلەت قۇرىلىمىنىڭ بارلىق انىقتالعان ەلەمەنتتەرى مەن تابىلعان ارتەفاكتىلەردى تازارتۋ، فوتوفيكساتسيا جۇمىسى اتقارىلدى. يانا لۇقپانوۆانىڭ ايتۋىنشا، كولەمى 25 * 25 سم، قالىڭدىعى 6 س م بولاتىن كولەمدەگى كۇيدىرىلگەن كىرپىشتەن سالىنعان كەسەنە التىن وردا كەزەڭىنە جاتادى. عيماراتتىڭ ءوزى ءتورتبۇرىشتى ءپىشىندى، سىرتقى ولشەمى بويىنشا قابىرعالاردىڭ ۇزىندىعى 7-دەن 8 مەترگە دەيىن، سولتۇستىك- باتىس جاعىنداعى قابىرعالاردىڭ قالىڭدىعى 1,6 مەتر، شيكى كىرپىشتەن 7 قاتارعا بۇكتەلگەن، ەكى جاعىنان كۇيدىرىلگەن كىرپىشپەن قاپتالعان. شىعىس قابىرعاسى ناشار ساقتالعان، ونىڭ شەتتەرى قيراعان.

«قازبا جۇمىسى بارىسىندا تابىلعان ادامنىڭ سۇيەگىن ەر ادامنىڭ قاڭقاسى دەپ بولجام جاساپ وتىرمىز. جاسىن انىقتاۋ مۇمكىن بولمادى، ارينە، ونىمەن انتروپولوگتار جۇمىس ىستەيدى. جەرگىلىكتى تۇرعىندار بىرنەشە جىل بويى جەرلەۋ ورنىن اشۋعا تىرىسقاندىقتان، قاڭقانىڭ زاقىمدالعانى كورىنىپ تۇر. قۇندىلىقتاردى ىزدەگەن كەزدە قالدىقتاردان باسقا كارنەل مونشاعىن تاپتىق. بىردەن ايتايىن، ءدال وسىنداي زاتتار ورتا عاسىرعا ءتان باسقا جەرلەۋ ورىندارىنان دا تابىلعان. ادەتتە، كارنەل مونشاقتارى جۇرەك، بىلەك ايماعىندا جاتادى. استراحاندىق ارحەولوگ ۆياچەسلاۆ ۆاسيليەۆيچ پلاحوۆتىڭ بولجامىنا قاراعاندا، سول كەزدىڭ ادامدارى كارنەل مونشاقتارىن اۋىرعان جەرلەرىنە قويعان. سەبەبى، كارنەلدىڭ سۋلانعان جارانى تەز قۇرعاتىپ، جازاتىن قاسيەتى ءمالىم. ەمدەۋ كەزىندە قىزدىرىلعان كارنەل بولىكتەرىن قولدانۋدىڭ ارقاسىندا قابىنۋ ازايىپ، جارانىڭ تەز ءبىتىپ كەتەتىندىگىن سول كەزدىڭ ادامدارى دا بىلگەن بولىپ تۇر»، - دەدى يانا لۇقپانوۆا.

ەسكە سالا كەتەيىك، قازاقستاننىڭ كيەلى ورىندارىنىڭ قاتارىنا ەنگىزىلگەن تاقساي حانشايىمى جەرلەنگەن قورعان كەشەنى دە وسى تەرەكتى اۋدانى دوليننىي اۋىلى ماڭىندا ورنالاسقان.

ول 2012 -جىلى تابىلىپ، كەيىن «التىن حانشايىم» قالپىنا كەلتىرىلىپ، ەلورداداعى ق ر ۇلتتىق مۋزەيىنە قويىلدى. تاقساي حانشايىمىنىڭ باسىنا اق كەسەنە ورناتىلدى.