دارىگەرلەر كوروناۆيرۋستىڭ بالالار اراسىندا تارالۋ جاعدايىنا تۇسىنىك بەردى
بۇل تۋرالى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باس مامانى جەلەۋحان ءپرىمقۇلوۆ ءمالىم ەتتى، دەپ حابارلايدى قازاقپارات ءتىلشىسى.
«وقۋ جىلى باستالدى، وقۋشىلار، ستۋدەنتتەر ءداستۇرلى وقۋ فورماتىنا ورالدى. ارينە، بۇل بارلىعىمىزعا قۋانىشتى جاڭالىقتاردىڭ ءبىرى بولدى. ەگەردە جاز ايلارداعى جاعداي قايتالانباسىن دەسەك، دەنساۋلىقتى ساقتاۋ ماسەلەرىنە ءتيىستى ءمان بەرۋىمىز قاجەت. ءبىلىم بەرۋ مەكەمەلەرىندە بالالار اراسىندا اۋرۋدىڭ ورشۋىنە جول بەرمەۋىمىز كەرەك. ول ءۇشىن اتا-انالار مەن مۇعالىمدەر ۆاكسينا الۋ ءتيىس. جۇرگىزىلىپ جاتقان ۆاكسيناتسيالاۋ ءوزىڭىزدى جانە بالالاردى ىندەتتى جۇقتىرىپ الۋدان قورعايدى. وقۋ جىلىنىڭ باستالۋىمەن قالا مەكتەپتەرىندەگى مەديتسينا قىزمەتكەرلەرى وقۋشىلارعا نۇسقاۋلىق جۇرگىزىپ، بالالارعا ەپيدەميولوگيالىق تالاپتاردىڭ ساقتالۋىنا ءمان بەرىپ وتىر. قول گيگيەناسىنىڭ ماڭىزدىلىعى، بەتپەردە تاعۋ تۋرالى تۇسىندىرمەلى جۇمىستارى الداعى ۋاقىتتا دا جالعاسىن تابادى»، - دەدى جەلەۋحان ءپرىمقۇلوۆ ونلاين بريفينگىدە.
ونىڭ ايتۋىنشا، سىرقاتتانۋشىلىقتىڭ ءوسۋى جاز مەزگىلىندە بايقالدى. ماۋسىم ايىنان باستاپ بالالار ايقىن كورىنگەن كلينيكالىق بەلگىلەرمەن تۇسە باستادى.
«بالالاردىڭ وتباسىنداعى ەكپە الماعان ادامدارمەن بايلانىستان سوڭ اۋىرا باستاعانى بايقالدى. ياعني ءبىرىنشى كەزەكتە ۆاكسينا سالدىرماعان تۋىستارى مەن جاقىندارى ءوز بالالارىنا جۇقتىرىپ الىپ ءجۇر. قازىرگى كەزدە ك ۆ ي- دىڭ وڭ ناتيجەسى بار 43 بالا ستاتسيونارلىق ەم قابىلداپ جاتىر. رەانيماتسيا بولىمشەسىندە بالالار بىزدە جوق. جىل باسىنان بەرى ك ۆ ي- مەن 10 مىڭنان استام بالا اۋىرىپ شىقتى»، - دەدى باسقارما وكىلى.
اۆتور: رۋسلان عابباس
