قاسىم-جومارت توقايەۆ: قازاقستاندا ءبىر عانا مەملەكەتتىك ءتىل بار
بۇل تۋرالى مەملەكەت باسشىسى قاسىم-جومارت توقايەۆ قازاقستان حالقىنا ارنالعان جولداۋىن جاريالاۋ كەزىندە ايتتى، دەپ حابارلايدى قازاقپارات.
«قازاق ءتىلىن دامىتۋ مەملەكەتتىك ساياستتىڭ باسىم باعىتىنىڭ ءبىرى بولىپ قالا بەرەدى. بۇل سالادا ايتارلىقتاي ناتيجە بار. قازاق ءتىلى شىن مانىندە ءبىلىم مەن عىلىمنىڭ، مادەنيەت پەن ءىس جۇرگىزۋدىڭ تىلىنە اينالۋدا. جالپى، مەملەكەتتىك ءتىلدى قولدانۋ اياسى كەڭەيىپ كەلەدى. بۇل - زاڭدى قۇبىلىس، ءومىردىڭ باستى ءۇردىسى. سوندىقتان قازاق ءتىلىنىڭ ءورىسى تىم شەكتەلىپ بارا جاتىر دەۋگە نەگىز جوق. اتا زاڭ بويىنشا قازاقستاندا ءبىر عانا مەملەكەتتىك ءتىل بار. بۇل - قازاق ءتىلى»، - دەدى مەملەكەت باسشىسى.
سونىمەن قاتار پرەزيدەنت ورىس ءتىلى رەسمي ءتىل مارتەبەسىنە يە ەكەنىن، زاڭناماعا سايكەس ونىڭ قولدانىلۋىنا كەدەرگى جاساۋعا بولمايتىنىن اتاپ ءوتتى.
«بولاشاعىن وتانىمىزبەن بايلانىستىراتىن ءاربىر ازامات قازاق ءتىلىن ۇيرەنۋگە دەن قويۋعا ءتيىس. بۇل وتانشىلدىقتىڭ باستى بەلگىسى دەۋگە بولادى. جاستارىمىز وزگە تىلدەردى، سونىڭ ىشىندە ورىس ءتىلىن جەتىك مەڭگەرسە، بۇدان ەش ۇتىلمايدى. قازاقستان مەن رەسەي اراسىنداعى شەكارا الەمدەگى ەڭ ۇزىن شەكارا. ورىس ءتىلى ب ۇ ۇ- داعى رەسمي التى ءتىلدىڭ ءبىرى. سوندىقتان بۇل ماسەلەگە پاراساتتىلىقپەن قاراۋىمىز قاجەت. ەلىمىز وركەنيەتتى ديالوگ پەن ءوزارا سىيلاستىق مادەنيەتىن دارىپتەۋى كەرەك. قازاقستان حالقى اسسسامبلەياسىنىڭ بۇل سالاداعى ءرولى ايرىقشا. ءبىز وتانىمىز جانە بارلىق ازاماتىمىز ءۇشىن جاۋاپكەرشىلىكتى سەزىنۋىمىز قاجەت»، - دەدى قاسىم-جومارت توقايەۆ.
اۆتور: رۋسلان عابباسوۆ
