مادەنيەت جانە سپورت ءمينيسترىنىڭ بۇرىنعى ورىنباسارىنا قاتىستى ۇكىم شىقتى
الماتىداعى تۇركسىب اۋداندىق سوتى مادەنيەت جانە سپورت ءمينيسترىنىڭ بۇرىنعى ورىنباسارى ساكەن مۇسايبەكوۆكە قاتىستى ۇكىم شىعاردى. سوت قورىتىندىسى بويىنشا بۇرىنعى ۆيتسە-مينيستر الاياقتىعى ءۇشىن كىنالى دەپ تانىلدى.
ساكەن مۇسايبەكوۆ قىلمىستىق كودەكستىڭ 190-بابى 3-بولىگىنىڭ 1-تارماعى بويىنشا ءىرى كولەمدە الاياقتىق جاسادى دەپ ايىپتالعان بولاتىن.
«سوت ونىڭ مادەنيەت جانە سپورت ۆيتسە-ءمينيسترى رەتىندە 2021 -جىلعى 18-21-اقپان ارالىعىندا اۋىر سىبايلاس جەمقورلىق قىلمىس جاساعانىن انىقتادى. مۇسايبەكوۆ پەن الماتى قالاسى پروكۋرورىنىڭ ورىنباسارى اراسىنداعى كىنانى مويىنداۋ تۋرالى پروتسەسسۋالدىق كەلىسىم بويىنشا پروكۋرور سوتتان مۇسايبەكوۆكە پارا سوماسىنىڭ ون ەسە مولشەرىندە - 6239400 تەڭگە ايىپپۇل تۇرىندە جازا تاعايىنداۋ تۋرالى ءوتىنىش جاسادى»، - دەپ ءتۇسىندىردى تۇركسىب اۋداندىق سوتى. سوت ەكس-شەنەۋنىكتى كىنالى دەپ تانىپ، پروكۋروردىڭ تالابىن قاناعاتتاندىردى.
«جازا تاعايىنداۋ كەزىندە سوت كىنانى مويىنداۋ تۋرالى جاسالعان پروتسەسسۋالدىق كەلىسىم بويىنشا مۇسايبەكوۆكە ۇرلانعان مۇلىكتىڭ ون ەسەلەنگەن مولشەرىندە ايىپپۇل سالۋ تۇرىندەگى جازانى تاعايىنداۋ مۇمكىن ەكەنى تۋرالى قورىتىندىعا كەلدى. سوت ساكەن مۇسايبەكوۆ جاساعان قىلمىستىق قۇقىق بۇزۋشىلىقتىڭ قوعامدىق قاۋىپتىلىك دارەجەسىن، قىلمىستىق جاۋاپتىلىق پەن جازانى جەڭىلدەتەتىن ءمان-جايلاردى، تاعايىندالعان جازانىڭ ونى تۇزەۋگە جانە ونىڭ ءومىر ءسۇرۋ جانە وتباسى جاعدايلارىنا اسەرىن نازارعا الدى. ۇكىم زاڭدى كۇشىنە ەندى»، - دەلىنگەن سوتتىڭ رەسمي مالىمەتىندە.
ەسكە سالساق، اقپان ايىنىڭ اياعىندا مادەنيەت جانە سپورت ۆيتسە-ءمينيسترى بولعان ساكەن مۇسايبەكوۆ قىزمەتتىك لاۋازىمىن پايدالانىپ، بۋكمەكەرلىك سالانىڭ مۇددەسىن قورعادى دەگەن كۇدىككە ىلىنگەن بولاتىن.
اۆتور: ەسىمجان ناقتىباي
