وركەشتىڭ ىشىندەگى نە؟

نۇر-سۇلتان.قازاقپارات - تۇيە كورگەن بالانىڭ تاڭعالارى انىق. كورىپ جۇرگەن جانۋارىنان ەرەكشە. ۇستىندە تاۋ- تاۋ وركەشى بار.

«ول نە، ونىڭ ىشىندە نە بار؟ « دەپ سۇراپ قويمايتىنى تاعى بار. وعان كوبىمىز «وركەشتىڭ ىشىندەگى - ماي» دەپ جاۋاپ بەرىپ جاتامىز. بۇل قانشالىق راس؟

ويسىل قارا ۇرپاعى كليماتى قاتقىل، سۋى مەن ءشوبى جوق مەكەندە ءومىر سۇرەتىن جانۋار. سۋ مەن ءشوپتى ۇنەمدەۋ اسا ماڭىزدى. نۋلى جەرگە تاپ بولعان تۇيە ودان كوپ ازىق پەن كالوريا، سۋ الىپ قالعىسى كەلەدى. تۇيە ءبىر ىشكەندە، 114 ليتر سۋ ىشەدى.

ال ازىقتى ساقتاۋدىڭ بيولوگيالىق مۇمكىندىك بەرگەن ەڭ ءتيىمدى جولى - بۇل ماي. تۇيە جەگەن ءشوپتىڭ كوبىن مايعا اينالدىرىپ، وركەشىنە جينايدى. ەگەر بايقاساڭىز، سەمىز تۇيەنىڭ وركەشى قارىنعا سالىنعان مايدا دوپ- دومالاق كەلەدى، تىك تۇرادى. ودان تۇيە ءشوپ جەمەي، 4-5 اي جۇرۋگە قاۋقارلى. ال ارىق تۇيەنىڭ وركەشى دە سولىپ جاتادى.

ادام دا، جانۋار دا ماي جينايدى. ءبىراق اركىم ءارتۇرلى. ادام قارىنعا، بەلگە ماي جيناسا، ايۋ تابانىنا جينايدى. الايدا جانۋار اتاۋلىنىڭ ىشىندە مايدى وسىنداي قىزىق، ءبىرتوعا جينايتىن تۇيە عانا. نەگە دەسەڭىز؟ بۇل تۇيەنىڭ اناتوميالىق جاراتىلىسىمەن تىكەلەي بايلانىستى.

تۇيەنىڭ قارىن تۇسىندا تومپەشىك بار. ول ءشول دالادا جاتقاندا، دەنەسىنە ىستىق پەن سۋىقتى وتكىزبەيدى. سول تومپەشىك تۇيەگە مايدى قارىن تۇسقا جيناۋعا مۇمكىندىك بەرمەيدى.

ەكىنشى جاعىنان تۇيەنىڭ وركەشى كۇننىڭ ىستىعى مەن كۇن وتۋدەن، كۇيىك شالۋدان قورعايدى.

تۇيەنىڭ ءبىز بىلە بەرمەيتىن تاعى ءبىر قابىلەتى بار. ول - اۋاداعى ىلعالمەن ءشولىن قاندىرا الاتىنى. بۇل دا ءبىر ءشول سۇراپىل تابيعاتقا بەيىمدەلگەن ەرەكشەلىگى بولسا كەرەك.

massaget.kz