وكىنىشتەن كوزىمە جاس كەلدى: سوفيا بەرۋلسەۆا جەڭىسىن مارقۇم ۇستازىنا ارنادى
7-تامىز كۇنى قازاقستاندىق كاراتەشى سوفيا بەرۋلسەۆا وليمپيادا ويدىندارىنان ەل قورجىنىنا قولا جۇلدەنى سالدى. 20 جاسار سپورتشى توپتىق كەزەڭدە ۇزدىك اتانىپ، ۋاقىتىنان بۇرىن جارتىلاي فينالعا جولداما الدى. الايدا جارتىلاي فينالدا ەگيپەتتىك فەريال ابدەلازيزگە 5:4 ەسەبىمەن جول بەرىپ، قولا جۇلدەنى قاناعات تۇتتى.
جارىستان كەيىن جۋرناليستەرگە بەرگەن سۇحباتىندا سپورتشى اسەرىن ءبولىسىپ، كوزىنە جاس الدى.
«ارينە، قۋانىشتىمىن. ءبىراق فينالعا شىعۋعا بولاتىن ەدى. بارىمدى سالدىم. كىشكەنە جەتپەي قالدى... فينالعا كىشكەنە جەتپەي قالعاندا وكىنىشتەن كوزىمە جاس كەلدى. بۇگىنگى قارسىلاستارىمنىڭ ەشقايسىسىمەن وسى ۋاقىتقا دەيىن جارىستا كەزدەسكەن ەمەسپىن. جارتىلاي فينالدا ءبىر- ەكى سوققى العاننان كەيىن كىشكەنە تاپىراقتاپ قالدىم. بۇل جەردە تورەشىنى دە، ەشكىمدى كىنالاي المايسىڭ. ءبارى ءادىل ءوتتى. ناتيجەسى وسى»، - دەيدى.
سوفيا بەرۋلسەۆا وليمپيادا ويىندارىنا جولدامانى سوڭعى ساتتە الدى. ول كاراتەدەن رەيتينگ بويىنشا دا، ليتسەنزيالىق جارىستا دا ۇتىلىپ قالىپ، وليمپيادا جولداماسىنان تىس قالعان بولاتىن. الايدا ازيا ايماعىندا وليمپيادالىق تسيكلدا ايەلدەر اراسىندا ەڭ كوپ ۇپاي جيناعان سپورتشى رەتىندە حالىقارالىق كاراتە فەدەراتسياسىنىڭ D3 كارتاسىنا يە بولىپ، توكيو وليمپياداسىنا قاتىسۋعا مۇمكىندىك الدى. «جولدامانى سوڭعى ساتتە العانىم وزىمە جاقسى بولدى. كوبىسى رەيتينگ بويىنشا جولداماعا يە بولىپ، ءبىراز جارىستارعا قاتىسپاي ءجۇردى. ءبىز جارىستى دا، جاتتىعۋ جيىندارىن دا توقتاتقان جوقپىز. ءوز فورمامىزدى ساقتاپ، سوڭعى ساتكە دەيىن دايىندالدىق. وسى تۇرعىدان جولدامانى سوڭىندا العاننىڭ مەن ءۇشىن پايداسى كوپ بولدى».
سوفيانىڭ مەدالى كاراتەدەن قازاقستان قۇراماسىنىڭ توكيو وليمپياداسىنداعى ەكىنشى جۇلدەسى. ول كاراتەدەن وليمپيادا ويىندارىندا ايەلدەر اراسىندا جۇلدە العان تۇڭعىش قازاقستاندىق سپورتشى رەتىندە ەل سپورتىنىڭ تاريحىنا ەندى. كاراتەشى وليمپيادانىڭ قولا جۇلدەسىمەن توقتاپ قالمايتىنىن جەتكىزدى.
«بىزگە مۇنىمەن توقتاۋعا بولمايدى. الدا ءبىزدى ازيا جانە الەم چەمپيوناتى كۇتىپ تۇر. ءبىراز دەمالىستان كەيىن قالپىمىزعا ورالىپ، جاتتىعۋىمىزدى ءارى قاراي جالعاستىرامىز». 20 جاسار جانكەشتى سوفيا بۇگىنگى جۇلدەسىن مارقۇم ۇستازى جاستالاپ ساناۋوۆقا ارنادى. كاراتەدەن قازاقستان ۇلتتىق قۇراماسىنىڭ باس باپكەرى بولعان ول 2020 -جىلدىڭ 31-جەلتوقسانىندا مەزگىلسىز دۇنيەدەن ءوتتى.
«جاستالاپ اعانىڭ ومىردەن وزعانى بارىمىزگە وتە قاتتى اسەر ەتتى. ول كىسى ءبىزدىڭ وسى وليمپياداعا كەلۋىمىز ءۇشىن بارىن سالدى. بىزگە دە كومەكتەستى، فەدەراتسياعا دا كومەكتەستى. مەدالىمدى سول كىسىگە (جاستالاپ ساناۋوۆقا) ارنايمىن»، - دەپ كوزىنە جاس الدى سپورتشى.
كاراتەدەن توكيو وليمپياداسىندا ەل ىقىلاسىنا بولەنگەن سپورتشى كىم؟
سوفيا بەرۋلسەۆا 2000 -جىلى شىمكەنت قالاسىندا دۇنيەگە كەلگەن. كاراتەمەن 6 جاسىنان باستاپ شۇعىلدانعان.
«ءوزىم وقىعان مەكتەپتە كاراتە ۇيىرمەسى بولدى. سوعان قىزىعىپ، انامنان رۇقسات سۇرادىم. ول «مەيلى، سپورتقا قاتىسىپ، شىنىقساڭ دەنساۋلىعىڭ ءۇشىن جاتتىعۋ ىستەيسىڭ عوي» دەپ، رۇقساتىن بەردى. مىنە، 14 جىلدان بەرى دەنساۋلىعىم ءۇشىن جاتتىعۋ جاساپ كەلە جاتىرمىن»، - دەپ كۇلەدى سپورتشى.
«نەگە ەكەنىن بىلمەيمىن، قىزىمنىڭ تاڭداۋى و باستا كاراتەگە ءتۇستى. 5 جاسىندا جاتتىقتىرۋشى بوريس زاريپ ۇلى ونىڭ كىشكەنتاي ەكەنىن ايتىپ، كەلەسى جىلى الىپ كەلىڭىزدەر دەدى. ءبىراق مەن قىزىما «جاقسى وقىساڭ عانا كاراتەگە باراسىڭ» دەپ تالاپ قويدىم. 6-قاراشادا التىعا تولدىق. ەرتەڭىنە بىردەن كاراتە ۇيىرمەسىنە بەت الدىق. وسى ۋاقىتقا دەيىن سول ارەكەتىمىزگە وكىنگەن ەمەسپىز»، - دەيدى سپورتشىنىڭ اناسى ۆيكتوريا بەرۋلسەۆا قىزىنىڭ سپورتقا العاش باسقان قادامىن ەسىنە الىپ.
سوفيا سپورتپەن اينالىسۋدى 6 جاستان باستاعانىمەن العاشقى جەڭىسىنە قالالىق جارىستا 8 جاسىندا، ال ءبىرىنشى التىن مەدالىنە 9 جاسىندا قول جەتكىزگەن. كاراتەشى قىز جەڭىستىڭ كىلتى ەڭبەكتە جانە جاقىندارىنىڭ قولداۋىندا دەپ ەسەپتەيدى.
«ەڭ باستىسى - انامنىڭ قولداۋى عوي. ءبىراق ۇتىلساڭ وعان ايتا المايسىڭ. مەن جارىسقا كەتسەم قاتتى ۋايىمدايدى، وتە سەزىمتال، جۇرەگى نازىك ادام. انام مەكتەپتە باستاۋىش سىنىپتارعا ساباق بەرەتىن ءمۇعالىم. اكەم 2016 -جىلى قايتىس بولدى. وتباسىمدا جالعىز بالامىن. قازىر اجەم، انام جانە مەن - ۇشەۋمىز بىرگە تۇرامىز». سوفيانىڭ اناسى ەگەر باسقا بالالارى بولعاندا ءبارىنىڭ سوفياداي بولعانىن قالاعانىن جاسىرمادى.
«كوبى مەنەن «نەگە سىزدە جالعىز بالا؟» دەپ سۇرايتىن. مەن ءازىل-شىنى ارالاس «جالعىز بولسا دا، ساپالى» دەپ جاۋاپ بەرەمىن. ەگەر مەندە تاعى بالالار بولسا، سوفياعا ۇقساسا دەپ ارماندايتىنمىن. سەبەبى ول تياناقتى، ماقساتى بەرىك، ەشكىمگە سالماق سالمايدى. ۇلكەندەردى قۇرمەتتەۋى، دوستارىن سىيلاۋى - ول بولەك اڭگىمە».
توكيو وليمپياداسىنىڭ قولا جۇلدەگەرى اتانعان كاراتەشى قىز بوس ۋاقىتىندا باسسەيندە جۇزگەندى ۇناتادى. سونداي-اق، قازاق، ورىس، اعىلشىن جانە تۇرىك ءتىلىن ەركىن مەڭگەرگەن. وسى ۋاقىتقا دەيىن سپورت مانسابىنداعى ەڭ جوعارعى جەتىستىگى - جاستار اراسىنداعى الەم چەمپيونى (2017) اتاعى مەن ەرەسەكتەر اراسىندا ازيا چەمپيوناتىنىڭ كۇمىس جۇلدەسى (2019) بولعان.
